ޓެކްނޮލޮޖީ ދުނިޔޭގެ އެންމެ ބޮޑު އެއް ކުންފުނި އެޕަލްއިން ހަކުރުބަލި ޓެސްޓްކުރެވޭ ޚާއްޞަ އެޕެއް ތައްޔާރުކުރަމުން އަންނަ ކަމަށް ބްލޫމްބާގްއިން ރިޕޯޓުކޮށްފިއެވެ.
މި އެޕަކީ ލޭގައި ހުންނަ ހަކުރުގެ މިންވަރު ވަޒަންކުރުމަށް ހަށިގަނޑަށް އެއްވެސް އެއްޗެއް ވެއްދުމަކާނުލައި ބޭނުންކުރެވޭނެ އެޕެއް ކަމަށް ބުނެއެވެ.
ރިޕޯޓުގައިވާ ގޮތުން، އެޕަލްގެ މުވައްޒަފުންގެ ގްރޫޕަކުން މި އަހަރުގެ ކުރީކޮޅު މި އެޕް ޓެސްޓުކޮށް ވަނީ ނިންމާފައެވެ. އަންނަ އަހަރު މި އެޕް ބޭނުންކުރެވޭ ގޮތަށް ނެރުމަށް ރާވާފައިވާ ކަމަށް ބެލެވެއެވެ. މި އެޕަކީ ޓައިޕް 2 ޑައިބީޓީސް ޖެހުމުގެ ނުރައްކާ އޮތް މީހުންނަށް އަމާޒުކޮށްގެން ތައްޔާރުކުރެވޭ އެޕެއް ކަމަށް ވެސް ރިޕޯޓުގައި ބުނެފައިވެއެވެ.
މީގެ އިތުރުން، ކާތަކެތި މި އެޕް މެދުވެރިކޮށް ލޮގްކުރެވޭނެ ކަމަށާއި، އޭގެ މައްޗަށް ބިނާކޮށް ލޭގައި ހުންނަ ހަކުރުގެ މިންވަރު ހަމަ މިނުގައި ބެހެއްޓުމަށް އެންމެ ރަނގަޅު ކާނާ ހުށަހަޅައިދޭނެ ކަމަށް ވެސް ރިޕޯޓްގައި ބުނެފައިވެއެވެ.
އެޕަލްއިން ކުރިން ވެސް ވަނީ އެޕަލް ވޮޗާއި އެހެނިހެން ޑިވައިސްތަކުގައި ޞިއްޙަތާ ގުޅުންހުރި އެކި ފީޗާތައް ތަޢާރަފުކޮށްފައެވެ. މީގެ ތެރޭގައި އީސީޖީ، ހިތުގެ ވިންދު ބެލުން، ނިދުމުގައި ދިމާވާ އެޕްނިއާ ބެލުން އަދި އެއާޕޮޑްސް ޕްރޯއަށް ހިއަރިން އެއިޑް ހިމެނެއެވެ.
މި އެޕް ތަޢާރަފުކުރުމާ ގުޅޭގޮތުން އެޕަލްއިން އަދި ރަސްމީ އެއްވެސް ބަޔާނެއް ނެރެފައެއް ނުވެއެވެ.