އެމެރިކާގެ ޓެކްނޮލޮޖީ މައި ކުންފުނި އެޕަލްއިން އެ ކުންފުނީގެ ވާޗުއަލް އެސިސްޓެންޓް ސިރީ ބޭނުންކޮށްގެން މީހުންގެ އަޑު ރކޯޑުކޮށް ޖާސޫސްކުރި ކަމަށް ބުނެ އުފުލާފައިވާ މަދަނީ ދަޢުވާއެއް 95 މިލިއަން ޑޮލަރު ދައްކައިގެން ހައްލުކުރަން އެއްބަސްވެއްޖެއެވެ.
ކެލިފޯނިއާގެ އޯކްލޭންޑްގައި ހުންނަ ފެޑެރަލް ކޯޓަކަށް މި ހަފުތާގެ އަންގާރަ ދުވަހު ހުށަހެޅި މި އެއްބަސްވުމުގައި ވަނީ، އެޕަލްއިން ވޭތުވެދިޔަ 10 އަހަރަށްވުރެ ގިނަ ދުވަހު ސިރީ ބޭނުންކޮށްގެން ސިއްރުން މީހުންގެ ވާހަކަތައް ރިކޯޑުކޮށްފައިވާ ކަމަށް ތުހުމަތުކޮށް ފަސް އަހަރު ކުރިން އުފުލާފައިވާ ދަޢުވާއެއް ހައްލުކުރުމަށެވެ.
އެޕަލްއިން މި އެއްބަސްވުމުގައި އެއްވެސް ކުށެއް ޤަބޫލުކޮށްފައެއް ނުވެއެވެ. މި އެއްބަސްވުން އަދިވެސް ވަނީ ޔޫއެސް ޑިސްޓްރިކްޓް ޖަޖް ޖެފްރީ ވައިޓްގެ ހުއްދައަށް ބޭނުންވެފައެވެ.
މި މައްސަލައިގައި ހިމެނޭ ވަކީލުން ވަނީ މި އެއްބަސްވުމުގެ ޝަރުތުތައް މުރާޖަޢާކުރުމަށް ފެބްރުއަރީ 14 ވަނަ ދުވަހު އޯކްލޭންޑްގައި ކޯޓު އަޑުއެހުމެއް ބޭއްވުމަށް ހުށަހަޅާފައެވެ.
މި އެއްބަސްވުން ފާސްވެއްޖެނަމަ، ސެޕްޓެމްބަރު 17، 2014 އިން ފެށިގެން މިދިޔަ އަހަރުގެ ނިޔަލަށް އައިފޯނާއި އެޕަލްގެ އެހެނިހެން ޑިވައިސްތައް ބޭނުންކުރި މިލިއަނުން ގުނާލެވޭ މިންވަރަކަށް ކަސްޓަމަރުންނަށް ބަދަލު ހޯދުމަށް ހުށަހެޅޭނެއެވެ.
މި އެއްބަސްވުމުގެ ދަށުން ޝަރުތު ހަމަވާ ކޮންމެ ކަސްޓަމަރަކަށް ވެސް ސިރީ ހިމެނޭ ކޮންމެ ޑިވައިސްއަކަށް 20 ޑޮލަރާ ހަމައަށް ލިބިދާނެއެވެ. ނަމަވެސް މި އަދަދު ބަދަލުވެދާނެ ކަމަށް ވެއެވެ. ގިނަވެގެން ފަސް ޑިވައިސްއަށް ބަދަލު ހޯދުމަށް ހުށަހެޅޭނެއެވެ.