އެޕަލް ކުންފުނީގެ ބާނީ ސްޓީވް ޖޮބްސްގެ އައިފޯނު އީޖާދަށް ފަހު އެޕަލްއިން ބިނާކުރުވަނިވި ކަމެއް ކުރާތަން ނުފެންނަ ކަމަށް ވިދާޅުވެ، މެޓާގެ ސީއީއޯ މާކް ޒަކަބާގު އެޕަލްއަށް ފާޑުކިޔައިފިއެވެ.
ޖޯ ރޯގަން އެކްސްޕީރިއަންސް ޕޮޑްކާސްޓްގައި ވާހަކަދައްކަވަމުން ޒަކަބާގު ވިދާޅުވީ، އައިފޯނުން ލިބުނު ކުރިއެރުންތަކަކީ މުހިންމު ކަމެއް ނަމަވެސް، އެޕަލްއިން މިހާރު އެ ޕްލެޓްފޯމް ބޭނުންކޮށްގެން ގިނަ އަދަދެއްގެ ބޭކާރު ޤަވާއިދުތަކެއް ތަންފީޒުކުރަމުންދާ ކަމަށެވެ.
އެޕަލްގެ އީޖާދީ މަސައްކަތްތަކާ މެދު ޒަކަބާގު ވިދާޅުވީ، ސްޓީވް ޖޮބްސް އައިފޯނު އީޖާދުކުރެއްވި ފަހުން، އެޕަލްއިން ވަނީ އިތުރު މުހިންމު އީޖާދެއްނުކޮށް، އެންމެ ފުރަތަމަ އީޖާދުކުރި އައިފޯނުގެ މައްޗަށް ބަރޯސާވެފައި ކަމަށެވެ.
އޭނާ ފާހަގަކުރެއްވި ގޮތުގައި އެޕަލްއިން މިހާރު ތަރައްޤީކުރަމުންދަނީ އައިފޯނުގެ ކުރީގެ މޮޑެލްތަކާ މާ ބޮޑު ތަފާތެއް ނެތް އާ މޮޑެލްތަކެކެވެ.
މީގެ އިތުރުން، އެޕަލްއިން މިހާރު ފައިދާ ހޯދަމުންދަނީ ޑިވެލޮޕަރުންގެ އަތުން 30 ޕަސެންޓްގެ ޓެކްސްއެއް ނަގައިގެންނާއި އައިފޯނާ ގުޅޭ އިތުރު އާލާތްތައް ވިއްކައިގެން ކަމަށް ޒަކަބާގު ވިދާޅުވިއެވެ. އޭގެ ތެރޭގައި އެއާޕޮޑްސް ފަދަ ތަކެތި ހިމެނެއެވެ. އެޕަލްއިން ވަނީ އެހެން ފަރާތްތަކަށް އައިފޯނާ ގުޅޭ މިފަދަ އާލާތްތައް އުފެއްދުމުގެ ފުރުސަތު ވަރަށް ބޮޑަށް ހަނިކޮށްފައި ކަމަށް ޒަކަބާގު ފާހަގަކުރެއްވިއެވެ.
ސެކިއުރިޓީއާއި ޕްރައިވަސީގެ ނަމުގައި އެޕަލްއިން މި ޤަވާއިދުތައް ތަންފީޒުކުރަމުންދާ ކަމަށާއި، ނަމަވެސް މިއީ އެކަށީގެންވާ ސަބަބެއް ނޫން ކަމަށް ޒަކަބާގު ވިދާޅުވިއެވެ. އެޕަލްއިން މި "ބޭކާރު ޤަވާއިދުތައް" ނުހިންގާނަމަ، މެޓާގެ ފައިދާ ދެގުނަ އިތުރުވާނެ ކަމަށް ވެސް އޭނާ ވިދާޅުވިއެވެ.
ޕޮޑްކާސްޓްގައި ޒަކަބާގު ވަނީ އެޕަލްގެ ވިޝަން ޕްރޯ ހެޑްސެޓަށް ވެސް ފާޑުކިޔުއްވާފައެވެ. އެމެރިކާގެ ވިއްކުންތައް ދަށްވެފައިވާ މި ހެޑްސެޓަކީ އެޕަލްއިން އާ އެއްޗެއް އުފެއްދުމަށް ކުރި ބޮޑު މަސައްކަތެއް ކަމަށާއި، ނަމަވެސް އޭގެ ފުރަތަމަ ވާޝަނުން އެދެވޭ ކާމިޔާބީއެއް ނުލިބޭ ކަމަށް އޭނާ ވިދާޅުވިއެވެ. އެއީ، ފިލްމު ބެލުމަށް ރަނގަޅު އެއްޗެއް ކަމަށް ވެސް ވިދާޅުވިއެވެ.
ސީއެންބީސީން މި ކަމާ ގުޅޭގޮތުން އެޕަލްގެ ކޮމެންޓަކަށް އެދުމުން، އެ ކުންފުނިން އެއްވެސް ޖަވާބެއް ދީފައިނުވާ ކަމަށް އެ ނޫހުން ބުނެއެވެ.
މެޓާ (ކުރީގެ ފޭސްބުކް)އާއި އެޕަލްގެ ކޯޅުން ފެށުނުތާ އެތައް އަހަރެއް ވެއްޖެއެވެ. ޚާއްޞަކޮށް 2021 ވަނަ އަހަރު އެޕަލްއިން އައިފޯނުގެ ޕްރައިވެސީ ސެޓިންގްސްއަށް ގެނައި ބަދަލާ ގުޅިގެން، މެޓާއަށް އިޝްތިހާރުތަކުން ލިބޭ އާމްދަނީއަށް ބޮޑެތި އަސަރުތަކެއް ކުރިއެވެ. ޗެޓިން އެޕްލިކޭޝަންތަކުން އެޕަލްއިން ނަގައި 30 ޕަސެންޓްގެ ޓެކްސްއަކީ ވެސް މެޓާއިން އަބަދު ވެސް ފާޑުކިޔަމުންދާ ކަމެކެވެ. ފަހަކަށް އައިސް ވާޗުއަލް އަދި އޯގްމެންޓެޑް ރިއަލިޓީގެ ދާއިރާގައި ވެސް މި ދެ ކުންފުނި ވަނީ ވާދަވެރި ވިޔަފާރިއެއްގައި ބައިވެރިވެފައެވެ.