ދުނިޔޭގެ އެންމެ އަގުބޮޑު ކުންފުނިތަކުގެ ތެރޭގައި ހިމެނޭ އެޕަލް ކުންފުނީގެ މާކެޓް ވެލިއު ހަތަރު ޓްރިލިއަން ޑޮލަރާ ކައިރިވަމުންދާކަމަށް މާލީ ދާއިރާގެ މާހިރުން ބުނެފިއެވެ.
މިހާރު އެޕަލްގެ މާކެޓް ވެލިއު ވަނީ 3.85 ޓްރިލިއަން ޑޮލަރަށް އަރާފައެވެ.
މިގޮތަށް އެޕަލްގެ މާކެޓް ވެލިއު އިތުރުވަމުން ދަނީ އެ ކުންފުނިން އޭއައި ޓެކްނޮލޮޖީއަށް ގެންނަމުންދާ ކުރިއެރުންތަކާ ގުޅިގެންނެވެ. ޚާއްޞަކޮށް އައިފޯނުގެ ވިޔަފާރި އިތުރުކުރުމަށް އެޕަލްއިން ގެންނަމުންދާ އާޓިފިޝަލް އިންޓެލިޖެންސް (އޭއައި)ގެ ކުރިއެރުންތަކުގެ ސަބަބުން އިންވެސްޓަރުންގެ އިތުބާރު އިތުރުވެފައިވާކަމަށް މެކްސިމް ގްރޫޕްގެ އެނަލިސްޓް ޓޮމް ފޯޓެ ވަނީ ފާހަގަކޮށްފައެވެ.
ނޮވެމްބަރު މަހުގެ ފަހުން އެޕަލްގެ ހިއްސާގެ އަގު ވަނީ 16 އިންސައްތަ އިތުރުވެފައެވެ. މިއާއެކު އެޕަލްގެ މާކެޓް ވެލިއު 500 ބިލިއަން ޑޮލަރު އިތުރުވެފައިވެއެވެ.
މިހާރު އެޕަލްގެ މާކެޓް ވެލިއު ވަނީ ޖަރުމަނުވިލާތާއި ސުވިޒަލޭންޑުގެ މައި ސްޓޮކް މާކެޓްތަކުގެ ޖުމްލަ އަގަށްވުރެ ވެސް ބޮޑުވެފައެވެ.
ނަމަވެސް، ފާއިތުވި ދެ އަހަރުގެ ތެރޭގައި އެޕަލްގެ ހިއްސާގެ އަގު ދެގުނަ އިތުރުވެފައިވާއިރު، އޭއައި ދާއިރާގައި އެންމެ ބޮޑު ކުރިއެރުމެއް ހޯދާފައިވާ އެންވީޑިއާ ކުންފުނީގެ ހިއްސާގެ އަގު ވަނީ 800 އިންސައްތައަށްވުރެ ބޮޑަށް އިތުރުވެފައެވެ.
މީގެ އިތުރުން މައިކްރޯސޮފްޓް، އަލްފަބެޓް، އެމެޒޯން އަދި މެޓާ ފަދަ ކުންފުނިތަކުން އޭއައި ދާއިރާގައި ބޮޑެތި ކުރިއެރުންތަކެއް ހޯދަމުންދާއިރު، އެޕަލްއިން މި ދާއިރާގައި ލަސްވަމުންދާކަމަށް ފާޑުކިޔާ ފަރާތްތަކުން ބުނެއެވެ.
އެޕަލް ކުންފުންޏަކީ 1976ވަނަ އަހަރު ސްޓީވް ޖޮބްސް އާއި ސްޓީވް ވޮޒްނިއަކް އަދި ރޮނަލްޑް ވޭން އެކުގައި އުފެއްދި ކުންފުންޏެކެވެ.
މި ކުންފުނިން ފުރަތަމަ އުފެއްދި އެޕަލް I ކޮމްޕިއުޓަރުން ފެށިގެން، މިއަދާ ހަމައަށް އައިއިރު އައިފޯން، އައިޕެޑް، މެކްބުކް އަދި އެޕަލް ވޮޗް ފަދަ އުފެއްދުންތަކާއެކު ޓެކްނޮލޮޖީ ދާއިރާގައި އެންމެ ކުރީ ސަފުގައި ވަނީ ހިމެނިފައެވެ.
2011ވަނަ އަހަރު ސްޓީވް ޖޮބްސް މަރުވުމަށްފަހު، ޓިމް ކުކް ވަނީ ކުންފުނީގެ ސީއީއޯގެ މަޤާމާ ހަވާލުވެފައެވެ. އޭގެފަހުން ވެސް އެޕަލް ވަނީ އާ އުފެއްދުންތަކާއި ޓެކްނޮލޮޖީގެ ރޮނގުން ގިނަގުނަ ކުރިއެރުންތަކެއް ހޯދާފައެވެ.
މިހާރު އެޕަލްއަކީ ދުނިޔޭގެ އެންމެ އަގުހުރި ބްރޭންޑުތަކުގެ ތެރެއިން އެއް ބްރޭންޑެވެ.