އައްޑޫ ސިޓީގެ ފަތުރުވެރިކަން ކުރިއަރުވަން އަންނަ އަހަރު އެ ސިޓީގައި ސިމްޕޯޒިމްއެއް ބާއްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
އައްޑޫގެ ފަތުރުވެރިކަމަށް ޚާއްސަ ބްރޭންޑާއި ވެބްސައިޓް ލޯންޗު ކުރުމަށް ރޭ ބޭއްވި ރަސްމިއްޔާތުގައި ފައިސަލް ވިދާޅުވީ، އަންނަ އަހަރުގެ ފުރަތަމަ ނުވަތަ ދެވަނަ ކުއާޓަރުގެ ތެރޭގައި ސިމްޕޯޒިމް ބާއްވަން މަސައްކަތް ކުރާނެ ކަމަށާއި އެ މަސައްކަތުގައި އިސްކޮށް ހަރަކާތްތެރިވާނީ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) ކަމަށެވެ.
އެ ސިމްޕޯޒިމްގައި ޗައިނާއާއި އިންޑިއާގެ ޓުއާ އޮޕަރޭޓަރުންނާއި ބައެއް އެއާލައިންތަކާއި ބުކިން.ކޮމް އާއި އަގޯޑާ ފަދަ އޭޖެންސީތައް ބައިވެރިކުރުމަށް މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.
"މި މަސައްކަތް ވެގެންދާނީ ވަރަށް މުހިންމު މަސައްކަތަކަށް. މިގޮތަށް އެންމެން އެއްކޮށް ނެޓްވޯކިން ސެޝަންއެއް ނުވަތަ އެއް ދުވަހު ނުވަތަ ދެ ދުވަހުގެ ވޯކިން ސެޝަންއެއް ކުރިއަށް ގެންދެވިއްޖެއްޔާ ވަރަށް ބޮޑަށް ނެޓްވޯކިން ބިލްޑް ކުރެވިގެންދާނެ. އޭގެ ސަބަބުން އައްޑޫގެ ޓޫރިޒަމް ތަރައްގީ ވުމަށް އެޅޭ ވަރަށް މުހިންމު ފިޔަވަޅަކަށް ވެގެންދާނެ،" ފައިސަލް ވިދާޅުވިއެވެ.
އޭނާ ވިދާޅުވީ އެ ސިމްޕޯޒިއަމްގައި ފުވައްމުލައް ސިޓީ އާއި ގއ. އަދި ގދ. އަތޮޅުގެ ފަތުރުވެރިކަމާ ގުޅުންހުރި ވިޔަފާރިތައް ބައިވެރިކުރާނެ ކަމަށެވެ. އަދި ހުރިހާ ފަރާތްތަކުން އެއްކޮށް މަސައްކަތް ކޮށްގެން ނޫނީ މި ސިނާއަތް ކުރިއެރުވެން ނެތް ކަމަށް ފައިސަލް ވިދާޅުވިއެވެ.
މީގެ އިތުރުން، މުސްތަގުބަލުގައި އެހެން އަތޮޅުތަކުގައި ވެސް މިފަދަ ސިމްޕޯޒިއަމްތައް ބާއްވާނެ ކަމަށް އޭނާ ވިދާޅުވިއެވެ.
"އެންމެ އުފާވެރި ޚަބަރަކީ އިރާދަކުރެއްވިއްޔާ މި އަންނަ އަހަރު ވެގެންދާނީ ދިވެހި ރާއްޖެ ޕްރޮމޯޓް ކުރުމަށް ޚާއްސަކޮށް ކުރެވޭނެ އެންމެ ވަރުގަދަ މަސައްކަތްތައް ކުރެވޭ އަހަރަށް. ދެން ހަމަ ކުރިއަށް މި އޮތް ހަތަރު އަހަރު ވެސް އަޅުގަނޑުމެންނަށް މި ފަހިވެފައިވާ ފުރުސަތާ އެކީގައި ކުރިއަށްދެވޭނެ،" ފައިސަލް ވިދާޅުވިއެވެ.
މިދިޔަ އޮގަސްޓު މަހު ޓޫރިޒަމް މިނިސްޓްރީން ވަނީ ދެކުނުގެ ފަތުރުވެރިކަން ތަރައްގީކުރުމާ ގުޅޭ ގޮތުން މާލޭގައި ސިމްޕޯޒިއަމްއެއް ބާއްވައިފައެވެ.
އެ ސިމްޕޯޒިއަމްގައި، އައްޑޫ ސިޓީއާއި ފުވައްމުލައް ސިޓީގެ އިތުރުން ހުވަދު އަތޮޅަށް ފަތުރުވެރިން ޒިޔާރަތް ކުރާ މިންވަރު އިތުރު ކުރުމަށް ކުރެވޭނެ ކަންތައްތަކާ ގުޅޭ ގޮތުން މަޝްވަރާކޮށްފައިވެއެވެ.