އޭއައި މޮޑެލްތައް ރައްކާތެރިކަމާއެކު ތަޢާރަފުކުރުމަށް ގޫގުލުން އައު އޮނިގަނޑެއް ހުށަހަޅައިފިއެވެ.
ބުރާސްފަތި ދުވަހު ގޫގުލުން އިޢުލާނުކުރި ގޮތުގައި، އާޓިފިޝަލް އިންޓެލިޖެންސް (އޭއައި) މޮޑެލްތައް ރައްކާތެރިކަމާއެކު ތަޢާރަފުކުރުމަށް އެ ކުންފުނިން ގެންގުޅޭ އެންމެ ރަނގަޅު އުސޫލުތައް ހިއްސާކުރުމަށް އައު ޓޫލެއް ތަޢާރަފުކޮށްފިއެވެ. މިއީ ފާއިތުވި އަހަރު ތަޢާރަފުކުރި ސެކިއުރ އޭއައި ފްރޭމްވޯކް (އެސްއޭއައިއެފް) ގެ ދަށުން ތައްޔާރުކޮށްފައިވާ ޓޫލެކެވެ.
މި ޓޫލަކީ ސުވާލު އަދި ޖަވާބުގެ މައްޗަށް ބިނާކޮށް ތައްޔާރުކޮށްފައިވާ އެއްޗެކެވެ. މި ޓޫލް ބޭނުންކުރާ ފަރާތްތަކުން ދޭ ޖަވާބުތަކުގެ މައްޗަށް ބިނާކޮށް، އޭއައި މޮޑެލްގެ ރައްކާތެރިކަން އިތުރުކުރުމަށް އަޅަންޖެހޭ ފިޔަވަޅުތަކުގެ ޗެކްލިސްޓެއް ތައްޔާރުކޮށްދޭނެއެވެ.
ގޫގުލްގެ ބްލޮގް ޕޯސްޓެއްގައި ބުނެފައިވާ ގޮތުގައި، މި ޓޫލްގެ ސަބަބުން އޭއައި ދާއިރާގައި މަސައްކަތްކުރާ އެހެން ފަރާތްތަކަށްވެސް ގޫގުލްގެ އެންމެ ރަނގަޅު އުސޫލުތަކުން ފައިދާ ލިބިގެންދާނެއެވެ. ބޮޑެތި ލޭންގުއޭޖް މޮޑެލްތަކުގެ ސަބަބުން އެތައް ނޭދެވޭ އަސަރުތަކެއް ކުރުމުގެ ފުރުސަތު އޮވެއެވެ.
މީގެ ތެރޭގައި އެކަށީގެންނުވާ އަދި ބޭއަދަަބީ ލިޔުންތައް އުފެއްދުމާއި، ޑީޕްފޭކްސް އަދި ދޮގު މަޢުލޫމާތު ފެތުރުމާއި، ކެމިކަލް، ބަޔޮލޮޖިކަލް، ރޭޑިއޯލޮޖިކަލް އަދި ނިއުކްލިއާ (ސީބީއާރްއެން) ހަތިޔާރުތަކާ ގުޅޭ ނުރައްކާތެރި މަޢުލޫމާތު އުފެއްދުން ހިމެނެއެވެ.
އޭއައި މޮޑެލެއް ކިތަންމެ ރައްކާތެރި ކަމުގައިވިޔަސް، ނުބައި ނިޔަތުގައި ހަރަކާތްތެރިވާ ފަރާތްތަކުން އެ މޮޑެލް ޖެއިލްބްރޭކްކޮށް، އެ މޮޑެލް ފަރުމާކޮށްފައިވާ ގޮތާ ޚިލާފަށް މަސައްކަތްކުރުވުމުގެ ފުރުސަތު އޮވެއެވެ. މިފަދަ ބޮޑެތި ނުރައްކާތަކެއް އޮތުމާއެކު، އޭއައި މޮޑެލްތައް ތައްޔާރުކުރާ ފަރާތްތަކުން އެކަށީގެންވާ ރައްކާތެރިކަމުގެ ފިޔަވަޅުތައް އަޅަންޖެހެއެވެ.
ގޫގުލްގެ އެސްއޭއައިއެފް ޓޫލްގައި ހިމެނޭ ސުވާލުތަކުގެ ތެރޭގައި މޮޑެލްތައް ތަމްރީނުކުރުމާއި، ޓިއުން ކުރުމާއި، އިވެލުއޭޓް ކުރުމާއި، މޮޑެލްތަކާާއި ޑޭޓާ ސެޓްތަކަށް އެކްސެސް ކޮންޓްރޯލް ކުރުމާއި، ހަމަލާތަކާއި ގެއްލުންދެނިވި އިންޕުޓްތައް ހުއްޓުވުމާއި، އަދި ޖެނެރޭޓިވް އޭއައި ބޭނުންކޮށްގެން މަސައްކަތްކުރާ އޭޖެންޓްތަކާ ގުޅޭ ސުވާލުތައް ހިމެނެއެވެ.
މިސާލަކަށް، "ތިޔަ ފަރާތުގެ ތަމްރީނު، ޓިއުނިންގ ނުވަތަ އިވެލުއޭޝަން ޑޭޓާގައި ގަސްތުގައި ނުވަތަ އެނގިގެންނާ ނޭނގި ހުންނަ ނުރަނގަޅު ބަދަލުތައް ދެނެގަނެ، ނައްތާލައިް އަދި އިސްލާހުކުރެވޭތޯ؟" ފަދަ ސުވާލުތައް ހިމެނެއެވެ.
މި ޓޫލް މެދުވެރިކޮށް ޑޭޓާ ޕޮއިޒަނިން، ޕްރޮމްޕްޓް އިންޖެކްޝަން، މޮޑެލް ސޯސް ޓެމްޕަރިންގ ފަދަ ނުރައްކާތައް ދެނެގަނެވޭނެއެވެ. މިއިން ކޮންމެ ނުރައްކަލަކަށް ވެސް ވަކި ޙައްލެއް ގޫގުލްގެ ޓޫލުން ހުށަހަޅައިދޭނެއެވެ.
މީގެ އިތުރުން، ގޫގުލުން ވަނީ ކޯލިޝަން ފޮރ ސެކިއުރ އޭއައި (ކޯސާއީ) އަށް 35 އައު ޞިނާޢީ ބައިވެރިން އިތުރުކޮށްފައެވެ. މި ގްރޫޕުން އޭއައި ސެކިއުރިޓީ ޙައްލުތައް ތިން ދާއިރާއަކުން ތަރައްޤީކުރާނެއެވެ. އެއީ އޭއައި ސިސްޓަމްތަކަށް ސޮފްޓްވެއާ ސަޕްލައި ޗެއިން ސެކިއުރިޓީ، ބަދަލުވަމުންދާ ސައިބާ ސެކިއުރިޓީ ވެށްޓަކަށް ދިފާޢުކުރާ ފަރާތްތައް ތައްޔާރުކުރުމާއި، އަދި އޭއައި ރިސްކް ގަވަނަންސްއެވެ.
މި އައު ޓޫލް ތަޢާރަފުކުރުމާއެކު، އޭއައި ޓެކްނޮލޮޖީ ތަރައްޤީކުރުމުގައި ރައްކާތެރިކަމާއި ސަލާމަތީ ފިޔަވަޅުތަކަށް އިތުރު އަހައްމިއްޔަތުކަމެއް ދޭކަން ގޫގުލުން ދައްކުވައިދީފައިވެއެވެ. މި ފިޔަވަޅުތަކުގެ ސަބަބުން އޭއައި ޓެކްނޮލޮޖީ ބޭނުންކުރާ ފަރާތްތަކަށް އިތުރު ރައްކާތެރިކަމެއް ލިބިގެންދާނެކަމަށް ބެލެވެއެވެ.