ޣައްޒާގެ އުތުރުގައި ޚިދުމަތްދޭ ހަމައެކަނި ހޮސްޕިޓަލް، ކަމާލް އަދުވާންގެ މުވައްޒަފުންނާ ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)އާ ގުޅުން ކެނޑިފައިވާ ކަމަށް ޑަބްލިޔުއެޗްއޯ އިން ބުނެފިއެވެ. ގުޅުން ކެނޑިފައި ވަނީ އިސްރާއީލު ސިފައިން އެ ސަރަހައްދުގައި ހަރަކާތްތެރިވާކަން އިއުލާނުކުރި ފަހުންނެވެ.
ޣައްޒާގެ ހެލްތު މިނިސްޓްރީން ބުނީ ކަމާލް އަދުވާން ހޮސްޕިޓަލުގައި އެތައް ސަތޭކަ ބަލިމީހުންނާއި މުވައްޒަފުން ބަންދުކޮށްފައިވާ ކަމަށެވެ.
"އިއްޔެ ހެނދުނު ޣައްޒާގެ އުތުރުގެ ކަމާލް އަދުވާން ހޮސްޕިޓަލަށް ވަދެ ފާސްކުރި ކަމަށް ރިޕޯޓްތައް ލިބުނު ފަހުން އެތަނުގެ މުވައްޒަފުންނާ ނުގުޅޭ" ޑަބްލިޔުއެޗްއޯގެ ވެރިޔާ ޓެޑްރޯސް އަދަނޮމް ގެބްރެޔެސަސް އެކްސްގައި ވިދާޅުވިއެވެ.
ޓެޑްރޯސް ވިދާޅުވީ ޑަބްލިއުއެޗްއޯ އާއި ޕާޓްނާ އެޖެންސީތައް ބުދަ ދުވަހުގެ ރޭ ދަންވަރު ހޮސްޕިޓަލަށް ގޮސް 23 ބަލިމީހުންނާއި 26 އެހީތެރިއަކު ފަލަސްތީނުގެ ސަރަހައްދުގެ މައި ހޮސްޕިޓަލް ކަމަށްވާ، އަލް ޝިފާ ހޮސްޕިޓަލަށް ބަދަލުކޮށްފައިވާ ކަމަށެވެ.
"ކަމަލް އަދުވާން ހޮސްޕިޓަލުގައި 200 އާ ގާތްކުރާ އަދަދަކަށް ބަލިމީހުން އެބަތިބި. ބޯހިޔާވަހިކަން ހޯދައިގެންތިބި އެތައް ބަޔަކުވެސް އެ ހޮސްޕިޓަލްގައި އެބަތިބި."ޓެޑްރޮސް ވިދާޅުވިއެވެ.
ވަގުތުން ހަނގުރާމަ ހުއްޓާލުމަށާއި، ފަލަސްތީނަށް އިންސާނީ އެހީތެރިކަން ފޯރުކޮށްދިނުމަށް ވެސް ޓެޑްރޮސް ވަނީ ގޮވައިލައްވާފައެވެ.