ރާއްޖޭގެ މާހައުލު ސާފުކޮށް ދެމެހެއްޓުމަށް "ރީތި ރާއްޖެ"ގެ ނަމުގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ން މިއަދު ކެމްޕެއިނެއް ފަށައިފިއެވެ.
މަޓީން ޕާލޭ މޯލްޑިވްސްއާ ގުޅިގެން ބޭއްވި ހަރަކާތެއްގައި ރީތި ރާއްޖެ ކެމްޕެއިން ފަށައިފައި ވަނީ އާޓިފިޝަލް ބީޗުގައެވެ. ސްކޫލް ކުދިންނަށް ޚާއްސަކޮށްގެން މިއަދު ބޭއްވި ހަވީރުގައި ތިމާވެށި ރައްކާތެރިކުރުމާ ގުޅުން ހުރި ތަފާތު ހަރަކާތްތަކުގައި ބައިވެރިވުމުގެ ފުރުސަތު އެ ކުދިންނަށް ދިނެވެ. އޭގެ ތެރޭގައި އެ މައުޟޫއާ ގުޅުން ހުރި ސުވާލުތައް ހިމެނޭ 'އޯޝެން ޓްރިވިއާ' ފަދަ ގޭމްތައް ހިމެނުނެވެ.
''ރީތި ރާއްޖެ'' ކެމްޕެއިން ފަށަން ބޭއްވި ހަރަކާތުގެ ތެރެއިން: މި ކެމްޕެއި ރާއްޖޭގެ ހުރިހާ އަތޮޅެއްގައި ވެސް ކުރިއަށްގެންދާނެ -- ސަން ފޮޓޯ/ އަމަން ލަތީފް
މަޓީން ބުނެފައިވާ ގޮތުގައި، އެއް އަހަރު ދުވަހަށް ކުރިއަށްގެންދާ ރީތި ރާއްޖެ ކެމްޕެއިންގެ މަގުސަދަކީ ދެމެހެއްޓެނިވި ގޮތެއްގައި ކުނި ނައްތާލުމަށް ހިތްވަރު ދިނުމާއި އާންމު ތަންތަނަށް ކުނި އެޅުން ހުއްޓުވުމެވެ. އެގޮތުން ފަރުދީ ފެންވަރުގައިއާއި އިޖުތިމާއީ ފެންވަރުގައި ކުރެވޭނެ ކަންކަމަށް އަލިއަޅުވާލާނެ މި ހަރަކާތުގެ ތެރެއިން، ރާއްޖޭގެ ފަތުރުވެރިކަމާއި މުސްތަގުބަލަށްޓަކައި ގައުމުގެ ރީތިކަން ދެމެހެއްޓުމުގެ މުހިންމުކަން ފާހަގަކުރާނެ ކަމަށް އެ އެސޯސިއޭޝަނުން ބުންޏެވެ.
މަޓީން ވަނީ ޕާލޭ މޯލްޑިވްސްއާ ގުޅިގެން މި ކެމްޕެއިން ހުރިހާ އަތޮޅެއްގައި ވެސް ކުރިއަށްގެންދިޔުމަށް ނިންމައިފައެވެ. އެގޮތުން މި އަހަރު ކެމްޕެއިން ހަރަކާތްތައް ބާއްވާނެ ތާރީޚާއި އަތޮޅުތަކަކީ:
- ނޮވެމްބަރު 24، 2024: އައްޑޫ ސިޓީ
- ނޮވެމްބަރު 27، 2024: ފުވައްމުލަކު ސިޓީ
- ޑިސެމްބަރު 2024: ގއ. އަދި ގދ. އަތޮޅު
''ރީތި ރާއްޖެ'' ކެމްޕެއިން ފަށަން ބޭއްވި ހަރަކާތުގެ ތެރެއިން: މި ކެމްޕެއިން އެއް އަހަރު ދުވަހަށް ކުރިއަށްގެންދާނެ -- ސަން ފޮޓޯ/ އަމަން ލަތީފް
އަންނަ އަހަރު ކެމްޕެއިން ބާއްވާނީ:
- ޖެނުއަރީ: ލ. އަތޮޅު
- ފެބްރުއަރީ: ފ.، ދ.، އަދި ތ. އަތޮޅު
- މާޗު: ވ. އަދި މ. އަތޮޅު
- އޭޕްރިލް: އއ. އަދި އދ. އަތޮޅު
- މެއި: ރ. އަދި ބ. އަތޮޅު
- ޖޫން: ހއ. އަދި ހދ. އަތޮޅު
- ޖުލައި: ށ. އަދި ނ. އަތޮޅު
- އޮގަސްޓު: ޅ. އަތޮޅު
- ސެޕްޓެމްބަރު: ކ. އަތޮޅު
އެ ހަރަކާތާ ގުޅޭ ގޮތުން މަޓީގެ ޑެޕިއުޓީ އެގްޒެކެޓިވް އޮފިސަރު މުޙައްމަދު ޔާސިރު މީގެ ކުރިން "ސަން"އަށް ވިދާޅުވީ، މި ކެމްޕެއިންގެ ތެރެއިން ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކާއި އާންމު ފަރުދުންނާ ގުޅިގެން ކުނި މެނޭޖުކުރުމުގެ އާދަ އެންމެންގެ ކިބައިގައި އަށަގަންނަވަން މަސައްކަތް ކުރާނެ ކަމަށެވެ.
ރީތި ރާއްޖެ ކެމްޕެއިންގެ މީޑިއާ ޕާޓްނަރަކީ ސަން ސިޔާމް މީޑިއާއެވެ.