މީގެ 79 އަހަރު ކުރިން އދ. އުފެދިގެން މިހާތަނަށް އައިއިރު، ދުނިޔޭގެ އެންމެން އެއްތަނަކަށް ގެނެސްދިން އަސާސްތަކާއި އުއްމީދުތައް ދަމެހެއްޓުމަކީ މިއަދު ދުނިޔޭގެ ގައުމުތަކުގެ ސަރުކާރުތަކާއި ރައްޔިތުންގެ މައްޗަށް އޮތް ޒިންމާއެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެއެވެ.
އދ.ގެ ރައީސްކަން ވެސް ކުރައްވާފައިވާ ޝާހިދު އެފަދައިން ވިދާޅުވީ 'ޔުނައިޓެޑް ނޭޝަންސް ޑޭ 2024' ދުވަހާ ގުޅުވައި އެކްސްގައި ކުރެއްވި ޕޯސްޓެއްގައެވެ.
ޝާހިދު ވިދާޅުވީ އދ.ގެ ޗާޓަރަށް އަމަލުކުރަން ފެށިތާ 79 އަހަރު ފާހަގަކުރާއިރު، އެ ޗާޓަރުގައި ބަޔާންކޮށްފައިވާ އުސޫލުތައް ދެމެހެއްޓުމަކީ، ކުރިއަށްވުރެ މުހިންމު ކަމެއް ކަމަށެވެ. ވަކިން ޚާއްސަކޮށް ދުނިޔޭގެ ގައުމުތަކުގެ އެއްބައިވަންތަކަން ދެމެހެއްޓުމަކީ ވަރަށް މުހިންމު ކަމެއް ކަމަށް ޝާހިދު ވިދާޅުވިއެވެ.
އަޅުގަނޑުގެ ޕްރޮފެޝަނަލް ކެރިއަރުގެ ބޮޑު ބައެއްގައި، އދ.ގެ ޖެނެރަލް އެސެމްބްލީގެ ރައީސްކަން ވެސް ކުރެއްވުމުގެ އިތުރުން، އދ.އާ ވަރަށް ގާތް ގުޅުމެއް ބޭއްވުމުގެ ނަސީބު އަޅުގަނޑަށް ލިބުނު. އަޅުގަނޑު ޔަގީންކަމައެކު ދަންނަވަން އޮތް ކަމަކީ، އދ.ގެ އުނިކަންތައްތަކާއެކު ވެސް ދެމިއޮންނާނެކަން، އެމްޑީޕީގެ ރައީސް އަބްދުﷲ ޝާހިދު
ޝާހިދު ވިދާޅުވީ މީގެ 79 އަހަރު ކުރިން އދ. އުފެދި ދުނިޔޭގެ ގައުމުތައް އެއްތަނަކަށް ގެނެސްދިން އަސާސްތަކާއި އުއްމީދުތައް ދެމެހެއްޓުމަކީ ދުނިޔޭގެ އެކި ކަންކޮޅުތަކުގައި ތިބޭ ގައުމުތަކުގެ ސަރުކާރުތަކާއި، ރައްޔިތުންގެ މައްޗަށް އޮތް ކަމެއް ކަމަށެވެ.
މިއަދު ކުރިމަތިވެފައިވާ ގޮންޖެހުންތަކާއި، ތިމާވެށި ހަލާކުވުމާއި، ފަގީރުކަމާއި، ނަސްލު ނައްތާލުން ފަދަ މައްސަލަތައް ހައްލުކުރުމަށް އަދި އެކަންކަމާ ދެކޮޅަށް ވަކާލާތުކުރުމަށް އދ.ގެ ބޭނުންތެރިކަން ބޮޑުކަން ޝާހިދު ފާހަގަކުރެއްވިއެވެ. އަދި އެ ގޮންޖެހުންތައް ހައްލުކުރެވޭނީ މަޝްވަރާކުރުމާއި، ވިސްނުންތެރިކަމާއެކު އަޒުމް ކަނޑައަޅައިގެންކަމަށާއި އދ.ގެ ސްޓޭންޑަކީ އެއީ ކަމަށް ޝާހިދު ވިދާޅުވިއެވެ.
އދ.ގެ މަސައްކަތުން ދުނިޔޭގެ ސުލްހަ މަސަލަސްކަމާއި، ތަނަވަސްކަމާއި، ކުރިއެރުމަށްޓަކައި، ބޮޑު އަދި ކުދި ކޮންމެ ދައުލަތަކަށް ވެސް އެހީތެރިވެވިދާނެކަމާއި، އެހީ ލިބެންޖެހޭނެކަން، ސާބިތުވެއްޖެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ދިވެހިރާއްޖެއަކީ އަބަދުވެސް މަލްޓިލޭޓަރަލިޒަމްއާއި އދ.އާ މެދު ފަޚުރުވެރިވާ ގައުމެއް ކަމަށެވެ. އެގޮތުން އދ.އާ ގުޅުމަކީ ރާއްޖެއަށް 1965 ވަނަ އަހަރުގެ ޖުލައި މަހުގެ 26 ވަނަ ދުވަހު މިނިވަންކަން ލިބުމަށްފަހު ސަރުކާރުން ނިންމި ޚާރިޖީ ސިޔާސަތުގެ ފުރަތަމަ ނިންމުން ކަމަށް ވެސް ޝާހިދު ވިދާޅުވިއެވެ. އޭގެ ފަހުން ދިވެހިރާއްޖެއިން އަބަދުވެސް އދ.ގެ ތެރޭގައި ހަރަކާތްތެރިވަމުންދާކަން ފާހަގަކުރެއްވިއެވެ.
އދ.ގެ އާންމު މަޖިލީހުގެ ރައީސް ކަމަށް ޝާހިދު އިންތިޚާބުވެ، މަގާމާ ހަވާލުވެވަޑައިގަތީ 2021 ވަނަ އަހަރުގެ ސެޕްޓެމްބަރު 14 ވަނަ ދުވަހުއެވެ.