ޓެކްސް އެޕީލް ޓްރައިބިއުނަލްގެ ހުސްވެފައިވާ މެންބަރުކަމުގެ މަގާމަށް ހަތަރު ބޭފުޅަކު އައްޔަންކުރަން ރައްޔިތުންގެ މަޖިލީހުން މިއަދު ރުހުން ދީފިއެވެ.
ޓެކްސް އެޕީލް ޓްރައިބިއުނަލުން ހަތަރު މަގާމެއް ހުސްވީ އެ ޓްރައިބިއުނަލްގެ މެންބަރުންގެ މައްސަލަތަކެއް ބެލުމަށް ފަހު ޓްރައިބިއުނަލްގެ މެންބަރު އިސްމާއީލް ސާޖިދު ފިޔަވައި ބާކީ ތިއްބެވި ހަތަރު މެންބަރުން މަގާމުން ވަކިކުރުމުންނެވެ. އެއީ، މިދިޔަ އޮގަސްޓް 26 ގައެވެ.
މެންބަރުކަމަށް ކުރިމަތިލާން އާންމުކޮށް ހުޅުވައިލުމުން 13 ބޭފުޅުންވަނީ އެ ކަަމަށް ކުރިމަތިލައްވައިފައެވެ.
އެ ނަންތައް ޖުޑިޝަރީ ކޮމިޓީން ދިރާސާ ކުރުމަށް ފަހު ފޮނުވުމުން މަޖިލީހުގެ ތަޅުމުގައި އެ މަގާމުތަކަށް ކުރިމަތިލެއްވި ބޭފުޅުންގެ ނަންތަކަށް ވަނީ ވޯޓަށް އަހާފައެވެ.
އެ މާގަމަށް ކުރިމަތި 13 ބޭފުޅުންގެ ތެރެއިން މަޖިޅިހުގެ ރުހުން ދިން ނަންތަކަކީ:
-
ހ. ހޯސްސައިޑް, އަބްދުލްޣަނީ މުހައްމަދު
-
ގ. އަލްޝާ, އިބްރާޙިމް ޝަރީފް
-
ގ. މާވަރުލު, ހަސަން ޒުހައިރު މުހައްމަދު
-
ގއ. ނިލަންދޫ, ގަސްދޮށުގެ، ޝިފްޒާ އަބްދުލްގައްޔޫމް
އެ މަގާމުތަކަށް މެންބަރުން އައްޔަންކުރަން ފާސްކޮށްފައިވަނީ ވޯޓުގައި ބައިވެރިވި 68 މެންބަރުންގެ ތާއިދާ އެކުގައެވެ.
ޓެކްސް އެޕީލް ޓްރައިބިއުނަލްގެ މެންބަރުންތަކެއް މަގާމުން ވަކިކުރީ، އެ ތަނުގައި ގިނަ މައްސަލަތަކެއް ހުރިކަން ފާހަގަކޮށް، ރައްޔިތުންގެ މަޖިލީހަށް އެ ގޮތަށް ލަފާ އެރުވުމުންނެވެ.