އުމުރުން ދުވަސްވީ މީހެއްގެ ކޭޝް ކާޑުން 25،000 ރުފިޔާ ވަގަށް ނަގައިގެން އުޅުނު ދެ މީހަކު ކަނޑުމަތިން ހައްޔަރުކޮށްފިއެވެ.
ފުލުހުން ބުނީ ގއ. ވިލިނގިލީގައި އުމުރުން ދުވަސްވީ އަންހެނެއްގެ ކޭޝް ކާޑުން މާމެންދޫ ބީއެމްއެލް އޭޓީއެމުން ފައިސާ ނަގާފައިވާ މައްސަލައެއް އިއްޔެ 20:13 އެހާކަންހާއިރު ރިޕޯޓުކޮށްފައިވާ ކަމަށެވެ.
މި ރިޕޯޓާ ގުޅިގެން ކުރިޔަށް ގެންދިޔަ އޮޕަރޭޝަނުގައި ކާޑު ވަގަށް ނެގި ކަމަށް ތުހުމަތު ކުރެވޭ މީހުން މާމެންދޫއިން ވިލިނގިއްޔަށް ދަނިކޮށް ކަނޑުމަތިން ހުއްޓުވައި، ދެ މީހަކު ހައްޔަރުކޮށްފައިވާ ކަމަށް ފުލުހުން ބުންޏެވެ.
އެ މީހުން ހައްޔަރުކޮށް، އެ މީހުން ދަތުރުކުރި ލޯންޗު ބަލައިފާސްކުރިއިރު، އެ ކޭޝް ކާޑު ބޭނުންކޮށްގެން އެ މީހުން ވަގަށް ނެގި ކަމަށް ބެލެވޭ 25،000 ރުފިޔާގެ ތެރެއިން 23،000 ރުފިޔާ ފެނިފައިވާ ކަމަށް ފުލުހުން ބުންޏެވެ.
މި މައްސަލައާ ގުޅިގެން ހައްޔަރުކޮށްފައިވަނީ ގއ. ވިލިނގިލި، ލައިފް، އުމުރުން 22 އަހަރުގެ މުހައްމަދު ޝައިން ޝަމީޒްގެ އިތުރުން، ލ. ގަން ތުނޑި، ނޯތުހެވަން އުމުރުން 24 އަހަރުގެ ހަމްދޫން ޚަލީލެވެ.
އަހަރުގެ މިހާތަނަށް އެންމެ ގިނައިން ފުލުހަށް ރިޕޯޓުކޮށްފައިވަނީ ވެސް ވައްކަމުގެ މައްސަލަތަކެވެ. އެ ގޮތުން ވައްކަމުގެ 3،005 މައްސަލައެއް ރިޕޯޓު ކޮށްފައިވާ ކަމަށް ފުލުހުން އާންމުކޮށްފައިވާ ތަފާސްހިސާބުތަކުން ދައްކައެވެ.