ތުރުކީވިލާތުގެ ވެރިރަށް އަންކާރާގެ ކައިރީގައި ހުންނަ ޓާކިޝް އޭރޯސްޕޭސް އިންޑަސްޓްރީޒްގެ މައި މަރުކަޒަށް އަމާޒުކޮށް ދިން ޙަމަލާއާ ގުޅިގެން ފުރާނަ ގެއްލުނު މީހުންގެ އާއިލާތަކަށާއި އެމީހުންގެ ގާތްތިމާގެ މީހުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ.
ރައީސް އޮފީހުން ބުނީ، އެ ހަމަލާއާ ގުޅިގެން ތުރުކީގެ ރައީސް ރަޖަބް ތައްޔިބް އުރްދުޣާނަށް ރައީސް މުއިއްޒު މެސެޖެއްގައި ފޮނުއްވާފައިވާ ކަމަށެވެ.
ތުރުކީއަށް ދިން ހަމަލާގެ ޚަބަރު އެއްސެވީ ފުން ހިތާމައާއެކުގައި ކަމަށާއި ދިވެހި ސަރުކާރާއި ދިވެހި ރައްޔިތުންގެ ނަމުގައި އެ ހަމަލާ ކުށްވެރިކުރައްވާފަ ކަމަށް އެ ސިޓީގައި ރައީސް ވިދާޅުވެފައިވެއެވެ. އަދި، ހަމަލާގައި އަނިޔާވި މީހުންނަށް އަވަސް ޝިފާއެއް ދެއްވުން އެދި އެމަނިކުފާނު ވަނީ ދުޢާކުރައްވާފައެވެ.
ރައީސްގެ މި މެސެޖު ނިންމަވާލެއްވީ، ދިވެހި ރައްޔިތުން ތިބީ ތުރުކީވިލާތުގެ އަޚުންނާއި އުޚުތުންނާ އެކުގައި ކަމުގެ ޔަޤީންކަން ދެއްވަމުންނެވެ.
ރައީސުލްޖުމްހޫރިއްޔާކަމުގެ ހުވާ ކުރެއްވުމަށް ފަހު ރައީސް އެންމެ ފުރަތަމަ ރަސްމީ ދަތުރުފުޅު ކުރެއްވީ ތުރުކީއަށެވެ.
ބޭރުގެ މީޑިއާތަކުން ރިޕޯޓުކޮށްފައިވާ ގޮތުން، އަންކަރާ ކައިރީގައި އޮންނަ އޭވިއޭޝަން ކުންފުންޏެއްގެ މައި އޮފީހުގެ ބޭރުގައި ގޮވުމެއް ގޮވައި އެތައް ބަޔަކު މަރުވެފައިވެއެވެ.
އެންޓީވީ ޗެނަލުން ފުރަތަމަ ދައްކާފައިވާ ފުޓޭޖްތަކުން ފެންނަ ގޮތުގައި އަންކާރާއިން ބޭރުން ގާތްގަނޑަކަށް 40 ކިލޯމީޓަރު ދުރުގައި އޮންނަ ތުރުކީވިލާތުގެ އެއަރޮސްޕޭސް އިންޑަސްޓްރީސް (ޓީއޭއައި)އަށް ވަންނަ ދޮރުމަތީގައި ބޯ ދުންގަޑެއް ފެނެއެވެ. އަދި ބަޑީގެ އަޑު އިވުނު ކަމަށްވެސް އެ ގައުމުގެ މީޑިއާތަކުން ރިޕޯޓުކޮށްފައިވެއެވެ.
ބީބީސީން ބުނީ އެ ގޮވުން ގޮވާފައިވަނީ އެތަނުގެ މުވައްޒަފުންގެ ޑިއުޓީ ބަދަލުވި ވަގުތެވެ.