ތުރުކީވިލާތުގެ ވެރިރަށް އަންކާރާ ކައިރީގައި އޮންނަ އޭވިއޭޝަން ކުންފުންޏެއްގެ މައި އޮފީހުގެ ބޭރުގައި ގޮވުމެއް ގޮވައި އެތައް ބަޔަކު މަރުވެއްޖެ ކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
ކަމާބެހޭ ފަރާތްތަކުން ބުނާ ގޮތުގައި އެއީ ޓެރަރިސްޓް ހަމަލާއެކެވެ.
އެންޓީވީ ޓީވީ ޗެނަލުން ފުރަތަމަ ދައްކާފައިވާ ފުޓޭޖްތަކުން ފެންނަ ގޮތުގައި އަންކާރާއިން ބޭރުން ގާތްގަނޑަކަށް 40 ކިލޯމީޓަރު ދުރުގައި އޮންނަ ތުރުކީވިލާތުގެ އެއަރޮސްޕޭސް އިންޑަސްޓްރީސް (ޓީއޭއައި) އަށް ވަންނަ ދޮރުމަތީގައި ބޯ ދުންގަޑެއް ފެނެއެވެ. އަދި ބަޑީގެ އަޑު އިވުނު ކަމަށްވެސް އެ ގައުމުގެ މީޑިއާތަކުން ރިޕޯޓުކޮށްފައިވެއެވެ.
ބީބީސީން ބުނީ އެ ގޮވުން ގޮވާފައިވަނީ އެތަނުގެ މުވައްޒަފުންގެ ޑިއުޓީ ބަދަލުވި ވަގުތު ކަަމަށެވެ.
އަލިފާން ނިއްވާ މީހުންގެ ޓީމާއި، ސިއްޚީ ފަރުވާދޭ މީހުންގެ ޓީމުތައް އެ ސަރަހައްދަށް ދިޔަ ކަމަށް އެ ނޫހުން ބުނެއެވެ.
ޓީއޭއައި އަކީ ތުރުކީވިލާތުގެ އެއަރޮސްޕޭސް އިންޑަސްޓްރީގައި މުހިންމު ދައުރެއް އަދާކުރާ ކުންފުންޏެއް ކަމަށާއި، ވިޔަފާރިއާއި އަސްކަރީ ބޭނުންތަކަށް އެކިއެކި މަތިންދާބޯޓުތައް ޑިޒައިންކޮށް،، އުފައްދާ ކުންފުންޏެއް ކަމަށް ރިޕޯޓުތައް ބުނެއެވެ.