ޔުއޭފާ ޗެމްޕިއަންސް ލީގުގެ ލީގު ފޭސްގައި އިނގިރޭސި ޕްރިމިއާ ލީގުގެ ލިވަޕޫލާއި ޖަރުމަނު ބުންޑެސްލީގާގެ އާރްބީ ލެއިޕްޒިގް ބައްދަލުކުރި މެޗު ލިވަޕޫލުން ކާމިޔާބުކޮށްފިއެވެ.
ލެއިޕްޒިގްގެ ދަނޑުގައި ކުޅުނު މި މެޗު ލިވަޕޫލުން ކާމިޔާބުކޮށްފައިވަނީ 1-0 އިންނެވެ.
މެޗުގެ 27 ވަނަ މިނެޓުގައި މުހައްމަދު ސަލާހް ތަނަވަސްކޮށްދިން ފުރުސަތަކުން ޑާވިން ނޫނޭޒް ލިވަޕޫލަށް ލީޑު ނަގައިދިނެވެ. މި ނޫނަސް، ކެޕްޓަން ވާޖިލް ވެން ޑައިކަށާއި ކޯޑީ ގަކްޕޯއަށް ލަނޑު ޖަހާނެ ރަނގަޅު ފުރުސަތެއް ލިބިގެންދިޔައިރު އެލެކްސިސް މެކް އެލިސްޓާ ފޮނުވާލި ހަމަލާއެއްވަނީ ލެއިޕްޒިގްގެ ގޯލުގެ ދަނޑިއަށް އަމާޒުވެފައެވެ.
ލިވަޕޫލުން މިހާރުވަނީ މިހާތަނަށް ރަށުން ބެރުގައި ކުޅުނު ހަ މެޗު ވެސް ކާމިޔާބުކޮށްފައެވެ.
މި ކާމިޔާބީއާ އެކު ލިވަޕޫލް މިހާރު އޮތީ ކުޅުނު ތިން މެޗު ކާމިޔާބުކޮށް ތާވަލުގެ ދެވަނައިގައެވެ. އެއީ، އެއްވަނައިގައި އޮތް ޕްރިމިއާ ލީގަށް ނިސްބަތްވާ އެސްޓަން ވިލާއާ އެއްވަރަށް ނުވަ ޕޮއިންޓް ލިބި، ފައިދާ ގޯލަށް ބަލާއިރު ވިލާއަށް ކުރި ލިބޭތީއެވެ.
މެޗުން ބަލިވުމުން ލެއިޕްޒިގް މި ފަހަރުގެ މުބާރާތުގައި މިހާތަނަށް ކުޅުނު ތިން މެޗުން ވެސް ވަނީ ބަލިވެފައެވެ. އެ ޓީމު އޮތީ ޕޮއިންޓެއް ނުލިބި ތާވަލުގެ 31 ވަނައިގައެވެ.