ފަތުރުވެރިކަމާ ބެހޭ ޓެކްސްތައް އަންނަ އަހަރުގެ ޖޫން މަހު ބޮޑުކުރުން މާ އަވަސް ކަމަށާއި އެ ތާރީޚު ފަސްކުރަންޖެހޭ ކަމަށް މަހިބަދޫ ދާއިރާގެ ޕީއެންސީ މެންބަރު އަހުމަދު ތާރިޤު މިއަދު ވިދާޅުވެއްޖެއެވެ.
މުޅި މަޖިލީހުގެ ކޮމިޓީގައި ވާހަކަދައްކަވަމުން ތާރިޤު ވިދާޅުވީ، ޓީޖީއެސްޓީ 12 ޕަސަންޓުން 16 ޕަސަންޓަށް ބޮޑުކުރިތާ އަދި މިވީ އެއް އަހަރާ ނުވަ މަސް ކަމަށެވެ.
"އަޅުގަނޑު މީގެ އެއް ކަމެއް ފާހަގަކޮށްލާނަން. އެކެއް ޖޫނަކީ ވަރަށް ކުރު މުއްދަތެއް ޓެކްސްއެއް، ޚާއްސަކޮށް ވިޔަފާރިއަކަށް ބަލާއިރު ބޮޑުކުރަން. އެހެންވީމައި އެ މުއްދަތު 31 އޮކްޓޫބަރު 2025 ހިސާބަށް [ބަދަލުކުރަން ފެނޭ]،" އޭނާ ވިދާޅުވިއެވެ.
ތާރިޤު ވިދާޅުވީ، ރިސޯޓުތަކުން އޮޕްރޭޓަރުންނާ ކޮންޓްރެކްޓް ހަދާފައި ހުންނަނީ 31 ޑިސެމްބަރު، 31 އޮކްޓޫބަރުގެ ނިޔަލަށް ނުވަތަ އަހަރުން އަހަރަށް އާކުރާގޮތަށް ކަމަށެވެ.
"އެ ދޭތެރެ މެދުން ކޮންޓްރެކްޓްތަކަށް ޓެކްސް ބޮޑުވެގެން ދިޔައީމާ، އެއީ ގްރީން ޓެކްސް ވިއަސް އަދި ޓީޖީއެސްޓީ ނަމަވެސް އަދި ވިޔަފާރިކުރާ ވިޔަފާރިތަކަށް އުނދަގޫތަކެއް ދިމާވާނެ،" އޭނާ ވިދާޅުވިއެވެ.
މީގެ އިތުރުން، މިދިޔަ ދައުރުގައި ވެސް ޓެކްސް ބޮޑުކޮށް އެއަށް އަމަލުކުރަން ފެށީ ޖަނަވަރީ މަހުކަން ފާހަގަކޮށް އެނާ ވިދާޅުވީ، ވިޔަފާރިވެރިން ޓެކްސް ޑިކްލަޔާކުރުމުގައި "އެގޮތްމިގޮތް" ވާންފެށި ކަމަށެވެ.
"އަޅުގަނޑުމެންނަށް ހިސާބުތައް ބަލައިލީމާ މިހާރު ފެންނަން އޮންނާނެ 2023ވަނަ އަހަރުގެ ޖަނަވަރީ މަހު މީރާއަށް ލިބުނު އާމްދަނީ 2022ވަނަ އަހަރުގެ ޖަނަވަރީގައި މީރާއަށް ލިބުނު އާމްދަނީއަށް ވުރެ ވާނީ ދަށް، އެކަމަކު 12 ޕަސަންޓުން 16 ޕަސަންޓަސް ޓެކްސް ބޮޑުކުރީ 2023ގައި . 2022ގައި ހުރީ 12 ޕަސަންޓުގައި. ރާއްޖެ އައި ފަތުރުވެރިންގެ އަދަދު ވެސް 2023ވަނަ އަހަރުގެ ފުރަތަމަ ކުއާޓަރުގައި އޭގެ ކުރީ އަހަރަށްވުރެ ގިނަވެފައި މީރާއަށް ލިބުނު އާމްދަނީ ވީ ދަށް،" އޭނާ ވިދާޅުވިއެވެ.
އޭނާ ވިދާޅުވީ، ޓެކްސް ބޮޑުކުރުމުގެ މުއްދަތު ކުޑަކޮށް، އެއް މަސް ދުވަސް ތެރޭ ޓެކްސް ޑިކްލަޔާކުރަން ހުށަހެޅުމުން ވިޔަފާރިވެރިން ޓެކްސް ޑިކްލަޔާކުރީ ޑިސެމްބަރު މަހު ކަމަށެވެ. އެހެންކަމުން އާމްދަނީ ދަށްވީކަން ފާހަގަކޮށް އޭނާ ވިދާޅުވީ، މި ފަހަރު ވެސް ކުޑަ މުއްދަތެއް ތެރޭ ޓެކްސް ބޮޑުކޮށްފިނަމަ، މިހެން ކަންތައްވުން އެކަށީގެންވާ ކަމަށެވެ.
އެހެންކަމުން ފަތުރުވެރިކަމާ ގުޅޭ ޓެކްސްތައް ބޮޑުކުރުމުގެ ބިލުގައި އަންނަ އަހަރުގެ ޖޫން މަހު ޓެކްސް ބޮޑުކުރަން ހުށަހަޅާފައިވާ މާއްދާ 31 އޮކްޓޫބަރަށް ބަދަލުކުރަން ތާރިޤު ހުށަހެޅުއްވިއެވެ.
މީގެ އިތުރުން، ތުލުސްދޫ ދާއިރާގެ މެންބަރު އިބްރާހީމް ނަސީމް ވަނީ ޓީޖީއެސްޓީ 16 ޕަސަންޓުން 17 ޕަސަންޓަށް ބޮޑުކުރުމާއި ނިޒާމުން ބޭރުގައި ފަތުރުވެރިކަމުގެ ވިޔަފާރި ކުރާ ފަރަތްތައް ނިޒާމުގެ ތެރެއަށް ވެއްދުމުގެ ތެރެއިން ފައިދާ ބޮޑުވާނީ ކޮންކަމެއް ކުރުމުންތޯ ބެލުމަށް ހުށަހަޅުއްވާފައެވެ. އޭނާ ވަނީ އެ ހުށަހެޅުމަށް ބަހުސްކުރަން ކޮމިޓީއަށް ފޮނުވުމަށް ހުށަހަޅުއްވާފައެވެ.
ތާރިޤާއި ނަސީމުގެ މި ހުށަހެޅުމަށް ގިނަ މެންބަރުންތަކެއް ވަނީ ތާއީދުކުރައްވާފައެވެ.
މި ދެ ހުށަހެޅުމަށް ވެލިދޫ ދާއިރާގެ މެންބަރު މުހައްމަދު އައްބާސްއާއި ފޭދޫ ދެކުނު ދާއިރާގެ މެންބަރު އިބްރާހީމް ދީދީ، ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީގެ އިތުރުން ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލް ވެސް ތާއީދުކުރެއްވިއެވެ.
އެކަމަކު، އެ އިސްލާހުތަކަށް މުޅި މަޖިލީހުގެ ކޮމިޓީގައި ވޯޓަކަށް ނާހައެވެ. އެއީ، އެ ބިލުތައް ދިރާސާކުރަން ސަބްކޮމިޓީއަށް ފޮނުވަން ނިންމުމުންނެވެ. އެހެންވެ، އިސްލާހުތައް ގެންނާނީ ސަބް ކޮމިޓީގެ މަރުހަލާގައި ކަމަށް ރިޔާސަތުގައި އިންނެވި މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވިއެވެ.