ދުރު ހިސާބުތަކަށް ފަތުރުވެރިކަން ގެންދަން އެ ހިސާބުތަކުގެ ޓެކުހާއި ކުލި ކުޑަ ކުރަން ޖެހޭ ކަމަށާއި އެކަން ކުރުމުގެ މަސައްކަތްތައް މިހާރު ކުރަމުން އަންނަ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގައި މެންބަރުންގެ ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ، ރާއްޖޭގައި ފަތުރުވެރިކަން އެންމެ ފުޅާ ދާއިރާއެއްގައި ކުރެވެނީ، މާލެ އަތޮޅާއި ރ. އަތޮޅާއި ބ. އަތޮޅާއި ވ. އަތޮޅާއި އދ. އަތޮޅާއި އއ. އަތޮޅުގައި ކަމަށެވެ. އަދި، ބޭރުގެ އިންވެސްޓަރުން އެންމެ ގިނައިން ޕްރޮޕޯސަލް ހުށަހަޅަނީ ވެސް އެ އަތޮޅުތަކަށް ކަމަށް މިނިސްޓަރު ވިދާޅުވިއެވެ.
އެގޮތުން، ފަތުތުވެރިކަން ނެތް އަތޮޅުތަކަށް ފަތުރުވެރިކަން ގެންދިޔުމަށްޓަކައި އެ ސަރަހައްދުތަކަށް އިންވެސްޓު ކުރާ ފަރާތްތަކަށް ބޮޑެތި ލުއިތަކެއް ދޭން ސަރުކާރުން ނިންމާފައިވާ ކަމަށް މިނިސްޓަރު ވިދާޅުވިއެވެ.
ފަތުރުވެރިކަމާ ބެހޭ ވަޒީރު ފައިސަލް: އޭނާ ވިދާޅުވީ ދުރު ހިސާބުތަކަށް ފަތުރުވެރިކަން ގެންދަން އެ ހިސާބުތަކުން ޓެކުހާއި ކުލި ކުޑަކުރަން ޖެހޭ ކަމަށް -- ފޮޓޯ/ މިނިސްޓްރީ
އަޅުގަނޑު ގަބޫލު ކުރަނީ އެ ތަންތަނުގެ އިކުއިޒިޝަން ކޯސްޓު ވެސް ކުޑަވެގެން ދާން ޖެހޭނެ ކަމަށް އަދި ލޭންޑް ރެންޓު ވެސް ކުޑަ ވެގެން ދާން ޖެހޭނެ ކަމަށް، އަދި ޓެކްސްގެ ތެރެއިން ވެސް ލުއިތަކެއް ލިބިގެން ދާން ޖެހޭނެ ކަމަށް
މިނިސްޓަރު ވިދާޅުވީ، އެކަންތައް މަޖިލީހަށް ގެނައުމަށް ގާނޫނަށް ގެންނަން ޖެހޭ އިސްލާހުތައް މިނިސްޓްރީން ހުށަހަޅާނެ ކަމަށާއި އެގޮތަށް ކަން ކުރެވިގެން ނޫނީ ފަތުރުވެރިކަން ނެތް އަތޮޅުތަކަށް އެކަން ގެންދެވިދާނެކަމަށް ގަބޫލު ނުކުރެއްވޭ ކަމަށެވެ.
އެގޮތުން، ގާނޫނަށް އިސްލާހުތައް ގެނައުމުގެ މަސައްކަތް ކުރަމުން އަންނަ ކަމަށާއި އެ މަސައްކަތް ނިމުމަށް ފަހު ބަންޑާރަ ނައިބު އަހުމަދު އުޝާމް މެދުވެރިކޮށް މަޖިލީހަށް އިސްލާހުތައް ހުށަހަޅުއްވާނެކަން ފައިސަލް ވަނީ ފާހަގަކުރައްވާފައެވެ.
ފައިސަލް މިފަދައިން ވިދާޅުވެފައިވާއިރު، ފަތުރުވެރިކަމާ ގުޅޭ ޓެކްސްތަކެއް ބޮޑުކުރަން ސަރުކާރުން ދާދިފަހުން ވަނީ ނިންމާފައެވެ. އެއީ، ޓީޖީއެސްޓީ، ގްރީން ޓެކްސް، އަދި އެއާޕޯޓް ޑިވޮލޮޕްމަންޓް ފީއެވެ.
މި ފީތައް ބޮޑުކުރަން ނިންމާފައިވާ ރޭޓުތަކަކީ:
- ޓީޖީއެސްޓީ 16 އިންސައްތައިން 17 އިންސައްތައަށް ބޮޑުކުރުން
- ގްރީން ޓެކްސް، ގެސްޓްހައުސްތަކުން - 3 ޑޮލަރުން 6 ޑޮލަރަށް ބޮޑުކުރުން
- ގްރީން ޓެކްސް، ސިޓީ ހޮޓާ އަދި ރިސޯޓުތަކުން - 6 ޑޮލަރުން 12 ޑޮލަރަށް ބޮޑުކުރުން
މީގެ އިތުރުން، އެއާޕޯޓު ޑިވޮލޮޕްމަންޓް ފީގެ ގޮތުގައި ޑޮލަރުން ނަގަމުން އައި ޓެކުހަށް ވެސް ވަނީ ބަދަލުތަކެއް ހުށަހަޅައިފައެވެ. އެ ބަދަލުތަކަކީ:
- އިކޮނަމީ ކްލާހުން ދަތުރުކުރާ ބިދޭސީން އަތުން ނަގައި ފީ 30 ޑޮލަރުން 50 ޑޮލަރަށް ބޮޑުކުރުން
- އިކޮނަމީ ކްލާހުން ދަތުރުކުރާ ދިވެހީން އަތުން ނަގައި ފީއަށް ބަދަލެއް ނުގެންނާނެ
- ބިޒްނަސް ކްލާހުން ފުރާ މީހުން އަތުން ނަގައި ފީ 60 ޑޮލަރުން 120 ޑޮލަރަށް ބޮޑުކުރުން
- ފަސްޓް ކްލާހުން ފުރާ މީހުން އަތުން ނަގައި ފީ 90 ޑޮލަރުން 240 ޑޮލަރަށް ބޮޑުކުރުން
- ޖެޓުގައި ފުރާ މީހުން އަތުން ނަގައި ފީ 120 ޑޮލަރުން 480 ޑޮލަރަށް ބޮޑުކުރުން
މި ބަދަލާ އެކު ތިން ބިލިއަން ރުފިޔާއާ ގާތްކުރާ އަދަދަކަށް އާމްދަނީ އިތުރުކުރެވޭނެ ކަމަށް މާލީ ވުޒާރާއިން އަންދާޒާކުރެއެވެ.