ޕެރިސް (23 އޮކްޓޯބަރު 2024): ފަރަންސޭސި ރައީސް އިމަނުއެލް މެކްރޮންއާ ދެކޮޅަށް ފިޔަވަޅު އެޅުމަށް އިސްރާއީލުން ނިންމި ނިންމުމާ މެދު ފަރުވާލެއް ނެތް ކަމަށް މެކްރޮން ވިދާޅުވެއްޖެއެވެ.
ޕެރިސްގައި ދެއްވި ބަޔާނެއްގައި މެކްރޮން ވިދާޅުވީ، އިސްރާއީލުން އޭނާއާ ދެކޮޅަށް ފިޔަވަޅު އެޅި ނަމަވެސް އޭނާ ނިންމަވާފައިވާ ނިންމުން ބަދަލުނުކުރައްވާނެ ކަމުގައެވެ. މެކްރޮންއަކީ އެމެރިކާއާއި ޔޫރަޕްގެ އެހެން ލީޑަރުންނެކޭ އެއްގޮތަށް އިސްރާއީލަށް ވާގިވެރިވާ އަދި އިސްރާއީލުން ހިންގާ އިންސާނީ ހައްގުތަކާ އިދިކޮޅު ޖަރީމާތަކަށް ލޯމަރާލައިގެން ހުންނަވާ ބޭފުޅެކެވެ.
ނަމަވެސް، މި ފަހަކަށް އައިސް މެކްރޮންވަނީ އިސްރާއީލުން ޣައްޒާގެ އާންމުން މެރުމަށް ދޭ ހަމަލާތަކާ އަދި ލުބްނާނުގެ އާންމުން މެރުމަށް ދޭ ހަމަލާތަކާ ދެކޮޅަށް ވާހަކަދައްކަވާފައެވެ. އަދި، އިސްރާއީލަށް ހަތިޔާރު ވިއްކުން މަނާކުރާނެ ކަމަށް ވެސް ވަނީ ވިދާޅުވެފައެވެ. މިގޮތަށް، ވިދާޅުވުމުން އިސްރާއީލުން ވަނީ މޮކްރޮންއަށް އެއްޗެހި ގޮވައި ފަރަންސޭސިވިލާތް ކުށްވެރިކޮށް ބަޔާން ނެރެފައެވެ.
މެކްރޯންއަކީ ޔަހޫދީންނާ ޖައްސާލައިގެން އުޅޭ މީހެއް ކަމަށް ސިފަކޮށް ބޭޒާރުކުރަން އުޅުމުން މެކްރޮންގެ ގަނޑުވަރުކަމަށްވާ ފަރަންސޭސި ރިޔާސީ ގަނޑުވަރުންވަނީ އިސްރާއީލަށް ހަތިޔާރު ވިއްކުން މަނާކުރާނެކަމަށް ވިދާޅުވެ އޭނާ ދެއްކެވި ވާހަކަތަކާ އިދިކޮޅަށް ބަޔާނެއް ނެރެފައެވެ. އެ ބަޔާނުގައި އިސްރާއީލަށް ހަތިޔާރު ވިއްކުން މަނާ ކުރަން ފަރަންސޭސި ސަރުކާރުން ރަސްމީ ސިފައެއްގައި ނޫޅޭކަމަށްވަނީ ބުނެފައެވެ.
ނަމަވެސް، މި މައްސަލާގައި އިސްރާއީލާއި ފަރަންސޭސިވިލާތުގެ ގުޅުންތައްވަނީ ވަރަށް ގޯސްވެފައެވެ.
އިސްރާއީލަށް ވާގިވެރިވާ ޔަހޫދީ ޒަޔަނިސްޓް މޫމަންޓަކީ ހުޅަނގުގެ އިސްތިއުމާރީ އަދި މާފިޔާ ހަރަކާތެކެވެ. މި ހަރަކާތުގެ ބާރު އެމެރިކާއެކޭ އެއްގޮތަށް ފަރަންސޭސިވިލާތާ އަދި ޔޫރަޕްގައި ވެސް ވަރަށް ގަދައެވެ.
އިސްރާއީލުގެ އަނިޔާވެރިކަމާއި ލާއިންސާނިއްޔަތާ ދެކޮޅަށް ބަހެއް ބުނެފިނަމަ ޒަޔަނިސްޓް މުމަންޓުން އެ މީހަކާ ދެކޮޅަށް ނުކުމެ އޭނާއަކީ ޔަހޫދީންނާ ޖައްސާލައިގެން އުޅޭ ނުބައި ނުލަފާ މީހެއް ކަމަށް ސިފަކޮށް އެ މީހަކު ބޭޒާރުކޮށްލާނެއެވެ. ބައެއް ހާލަތްތަކުގައި ސިއްރިޔާތުގައި އެފަދަ މީހުން މަރާލުންފަދަ ބޮޑެތި ޖަރީމާތައް ވެސް ޒަޔަނިސްޓު މޫމެންޓުން ހިންގާކަމަށް ވެއެވެ.
މި ކަމާހެދި ހުޅަނގުގައި އިސްރާއީލުގެ އަނިޔާވެރިކަމާ ދެކޮޅަށް އެއްޗެއް ބުނެ އުޅެންކެރެނީ ވަރަށް މަދު މީހަކަށެވެ. އިސްރާއީލާ ޖެހުމުން އިންސާނީ ހައްގުތަކެއް އަދި ޚިޔާލު ފާޅުކުރުމުގެ މިނިވަންކަމެއް ވެސް އެެމެރިކާއާއި ޔޫރަޕްގައި ނޯވެއެވެ.
މި ފަހަރު އިސްރާއީލުން ފަރަންސޭސި ރައީސް އިމަނުއެލް މެކްރޮންއާ ޖައްސާލައިގެން މި އުޅެނީ ފަރަންސޭސި ވެރިރަށް ޕެރިސްގައި ބާއްވަން ތައްޔާރުވާ ކަނޑުގެ ސިފައިންނާ ބެހޭ ޝޯ ޔޫރޯނޭވަލްގައި ބައިވެރިވުމުގެ ފުރުސަތު އިސްރާއީލުގެ ކުންފުނިތަކަށް ނުދިނުމަށް އޭނާ ނިންމެވުމުންނެވެ. މެކްރޮންގެ އަރިސް ބޭފުޅަކުވަނީ އިސްރާއީލުގެ ފިއްތުންތައް ކިތަންމެ ބޮޑުވިޔަސް މި ފަހަރު އޭނާގެ ނިންމުން ބަދަލުނުކުރައްވާނެކަން ހާމަކޮށްފައެވެ.
އަންނަ ނޮވެންބަރު މަހުގެ ހަތަރުވަނަ ދުވަހުން ހަތްވަނަ ދުވަހަށް ޕެރިހުގައި ބާއްވާ ޔޫރޯނޭވަލް ޓްރޭޑް ޝޯގައި ބައިވެރިވުމުގެ ފުރުސަތުން އިސްރާއީލުގެ ކުންފުނިތަކަށް ނިދުނުމަށް މެކްރޯން ނިންމެވީ ޣައްޒާއާއި ލުބްނާނުގައި އިސްރާއީލުން އާންމުން މަރައި ހިންގާ އިންސާނިއްޔަތާ ޚިލާފު ޖަރީމާތައް އިންސާނުންގެ ބުއްދިއަށް ގަބޫލުކުރަން ދަތިވާ ހިސާބަށް މައްޗަށް ދިޔުމުންކަމަށް ފަރަންސޭސި ނޫސްތަކުން ބުނެއެވެ.
އިސްރާއީލުގެ ހަރުކަށި މަސްއޫލުވެރިއެއް ކަމަށްވާ އެ ގައުމުގެ ޚާރިޖީ ވަޒީރު އިސްރާއެލް ކާތްޒް ވަނީ މެކްރޯންއާ ދެކޮޅަށް އިސްރާއީލުން ޑިޕްލޮމެޓިކް ގޮތުންނާއި ގާނޫނީ ހަރުކަށި ފިޔަވަޅު އަޅާނެކަމުގެ އިންޒާރު ދީފައެވެ. މިއީ ކިހާވަރެއްގެ ފިޔަވަޅުތަކެއްކަން އޭނާ ހާމައެއް ނުކުރެއެވެ. ނަމަވެސް، މީގެ ތެރޭގައި އިސްރާއީލަށް ވަނުން މެކްރޯންއަށް މަނާކުރުން ހިމެނޭކަމަށް ރިޕޯޓްތައް ބުނެއެވެ.
ދާދި ފަހުން އިސްރާއީލުން ވަނީ އދ. ގެ ސެކްރެޓަރީ ޖެނެރަލް އެންތޯނިއޯ ގުޓަރެސްއާ ދެކޮޅަށް ވެސް ޑިޕްލޮމެޓިކް ފިޔަވަޅުތައް އަޅާފައެވެ. މީގެ ތެރޭގައި ގުޓަރެސް އިސްރާއީލަށް ދަތުރުކުރުން މަނާކުރުން ހިމެނެއެވެ. އެއީ، އީރާނުން އިސްރާއީލަށް ދިން ރައްދު ހަމަލާ ކުށްވެރި ނުކުރެއްވުމުންނެވެ.