މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)އާއި ޓޫރިޒަމް މިނިސްޓްރީ ގުޅިގެން އިންތިޒާމުކޮށްގެން ބާއްވާ މި އަހަރުގެ ފަތުރުވެރިކަމާ ބެހޭ މަހާސިންތާ މިއަދު ކްރޮސްރޯޑްސްގައި ފަށައިފިއެވެ.
މި މަހާސިންތާގައި ފަތުރުވެރިކަމާ ބެހޭ އެކި ދާއިރާތަކުން 150 އަށްވުރެ ގިނަ މީހުން ބައިވެރިވެއެވެ. މީގެ ތެރޭގައި، ރިސޯޓްތަކާއި ގެސްޓްހައުސްތަކާއި ލިވާބޯޑް އަދި ލޯކަލް ޓުއަރިޒަމްގައި ހަރަކާތްތެރިވާ ފަރާތްތަކާއި ޓްރެވަލް އެޖެންޓުންގެ އިތުރުން ފަތުރުވެރިކަމާ ބެހޭ ޖަމިއްޔާތަކާއި ޓްރެވަލް މީޑިއާތައް ހިމެނެއެވެ.
މި މަހާސިންތާގައި ޓޫރިޒަމް މިނިސްޓަރު އިބްރާހިމް ފައިސަލާއި އެމްއެމްޕީއާރްސީގެ މެނޭޖިން ޑިރެކްޓަރު ޝިއުރީ އިބްރާހިމާއި އެމްއެމްޕީއާރްސީގެ ޗެއަރްޕާޝަން އަބްދުﷲ ގިޔާސް ބައިވެރިވެވަޑައިގަންނަވައެވެ.
ފަތުރުވެރިކަމާ ބެހޭ މަހާސިންތާގެ ތެރެއިން: 150 އަށްވުރެ ގިނަ ބައިވެރިންނާއެކު ފަތުރުވެރިކަމާ ބެހޭ މަހާސިންތާ ފަށައިފި --- ފޮޓޯ/ އެމްއެމްޕީއާރުސީ
އޭގެ އިތުރުން، މަހާސިންތާގައި ފަތުރުވެރިކަމަށް އާ ސެގްމަންޓްތައް ތައާރަފުކުރުމަށް މަޝްވަރާކުރަން އެޖެންޑާ ކުރެވިފައިވާއިރު، ޕެނަލް ޑިސްކަޝަންއަކާއި ގްރޫޕް ޑިސްކަޝަންތައް ވެސް ކުރިއަށް ގެންދިއުމަށް ވަނީ ނިންމާފައެވެ.
އެމްއެމްޕީއާރްސީން ބުނީ، މި މަހާސިންތާގެ މަޤުޞަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާ ބެހޭ ގޮތުން ދާއިރާގެ ފަރާތްތަކާއި މަޝްވަރާކޮށް، އާ ޚިޔާލުތަކާއި ވިސްނުންތައް ދެނެގަތުން ކަމަށެވެ.