ސަރުކާރަށް އަހަރެއް ފުރުން މިއަދު ފާހަގަ ކުރާއިރު ފަތުރުވެރިކަމުގެ ދާއިރާއިން ވެސް ތަފާތު ކާމިޔާބީތައް މި ސަރުކާރުން ހޯދައިފިއެވެ. އެގޮތުން ބައެއް ކާމިޔާބީތައް ޚަބަރުތަކުގެ ފަލަ ސުރުޚީއަށް އެރި ނަމަވެސް، ވޭތުވެދިޔަ އަހަރު ހޯދުނު އެންމެ ބޮޑު ކާމިޔާބީއާ ގުޅޭގޮތުން ޓޫރިޒަމް މިނިސްޓަރު އިބްރާހީމް ފައިސަލްގެ ޚިޔާލު ތަފާތެވެ.
އެއް އަހަރުގެ ކާމިޔާބީއާ ގުޅިގެން "ސަން"އާ ވާހަކަ ދައްކަވަމުން ފައިސަލް ވަނީ ފަތުުރުވެރިކަމުގެ ރޮނގުން ރާއްޖެއަށް ލިބިފައިވާ ކާމިޔާބީތައް ހިއްސާކުރައްވައިފައެވެ.
އެގޮތުން ކޮންމެ އަހަރަކު ވެސް ފަތުރުވެރިކަމުން އެތައް ރިކޯޑެއް ރާއްޖެއިން މުގުރާ ބީދައިން މިއަހަރު ވެސް ވަނީ ރާއްޖެއަށް ރިކޯޑުތަކެއް ގާއިމް ކުރެވިފައެވެ. އޭގެތެރޭގައި އެންމެ ގިނަ ފަތުރުވެރިން އެއް ދުވަހެއްގައި އައުމާއި އެންމެ ގިނަ ފަތުރުވެރިން އެއް މަހެއްގައި އައުން ވެސް މިއަހަރު ވަނީ ފާހަގަކޮށް ޚަބަރުތަކުގެ ފަލަ ސުރުޚީން ޖާގަ ހޯދާފައެވެ.
"ދެން ފާހަގަކޮށްލެވޭ ކަންކަމަކީ އެރައިވަލްސްއަށް ބަލާއިރު ސިންގަލް ޑޭއެއްގެ އެންމެ ގިނަ އެރައިވަލްސް ދިވެހި ރާއްޖެއަށް އައީ މިއަހަރުގެ ފެބްރުއަރީ މަހުގައި. އެއީ 10،000އަށް ވުރެ ގިނަ ފަތުރުވެރިން އެއް ދުވަހަކު، ރިކޯޑެއް. ދެން އެއް މަހެއްގެ އެންމެ ގިނަ ފަތުރުވެރިން އައީ ވެސް މިއަހަރު ފެބްރުއަރީ މަހު، އެއީ 218000 ފަތުރުވެރިން. އެއީ ވެސް ރިކޯޑެއް. ދެން އެއް މިލިއަން ފަތުރުވެރިން އެންމެ އަވަހަށް ހަމަކުރެވުނީ ވެސް މިއަހަރު. އެއީ ޖޫން މަހުގެ 26ވަނަ ދުވަހު،" ފައިސަލް ވިދާޅުވިއެވެ.
ނަމަވެސް، މިއީ ވޭތުވެދިޔަ އަހަރު ކާމިޔާބު ކުރެވުނު އެންމެ ބޮޑު ކާމިޔާބީ ނޫންކަން ފާހަގަ ކުރައްވައި މިނިސްޓަރު ވިދާޅުވީ، ޓޫރިޒަމް ސިނާއަތަށް ސަރުކާރަކުން ކޮށްދެވޭނެ އެންމެ މުހިންމު މަސައްކަތަކީ ޒުވާނުން ބިނާކުރުން ކަމަށެވެ.
އެގޮތުން ރައީސުލްޖުމްހޫރިއްޔާގެ ވައުދުފުޅާ އެއްގޮތަށް މިމަހުގެ ނުވަވަނަ ދުވަހު ރާއްޖޭގައި ފަސްތަރީގެ ރިސޯޓެއް ތަރައްގީކޮށް ހޮޓެލް ސްކޫލެއް ގާއިމްކުރުމަށް ޓޫރިޒަމް މިނިސްޓްރީން ގައުމީ ޔުނިވާސިޓީއާ ހަވާލުކޮށްފައި ވާކަމަށް މިނިސްޓަރު ވިދާޅުވިއެވެ. ޓްރެއިނިން ރިސޯޓު ގާއިމްކުރަނީ ލ. މާމެންދޫ ކައިރީގައި އޮންނަ ހުޅިމެންދޫގައެވެ.
"އަޅުގަނޑަށް ގަބޫލުކުރެވެނީ އެއީ ދިވެހި ރާއްޖޭގެ ޓޫރިޒަމް ސިނާއަތަށް ސަރުކާރަކުން ކޮށްދެވޭނެ އެންމެ މުހިންމު މަސައްކަތް ކަމަށް އިނގޭތޯ. އެއީ ރައީސްގެ ވަރަށް ޚާއްސަ ވައުދުފުޅެއް،" މިނިސްޓަރު ވިދާޅުވިއެވެ.
މިނިސްޓަރު ވަނީ މި ޓްރެއިނިން ރިސޯޓާމެދު ދެކޭ ތަސައްވުރު ހާމަކުރައްވައިފައެވެ. އެގޮތުން، މި މަސައްކަތް ކާމިޔާބު ކުރެވުމާއެކު ރާއްޖޭގައި ހޮސްޕިޓާލިޓީ ދާއިރާ ވަރުގަދަވެ، ފަސްތަރީގެ ޓްރެއިނިން ރިސޯޓަށް ދުނިޔޭގެ އެކި ގައުމުތަކުން މީހުން ކިޔަވަން އައުމަކީ ދެކެން ބޭނުންވާ ދުވަހެއް ކަމަށް މިނިސްޓަރު ވިދާޅުވިއެވެ.
"ހޮސްޕިޓާލިޓީ އިންޑަސްޓްރީގެ ކޯސްތައް ފުރިހަމަކުރަން ކުދިން އައިސް އެތަނުން ތައުލީމު ހާސިލްކޮށް ދުނިޔޭގެ ވަރުގަދަ ބްރޭންޑުތަކުގައި މަސައްކަތް ކުރާ މަންޒަރު ދެކެން ބޭނުންވަނީ. އެއީ އެޑިއުކޭޝަނަލް ޓޫރިޒަމް ވަރަށް ބޮޑަށް އެކްސްޕްލޯ ކުރެވިގެން ދާނެ ދާއިރާއެއްކަމަށް އަޅުގަނޑަށް ގަބޫލު ކުރެވެނީ،" މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވަނީ ރާއްޖޭގައި މިވަގުތު އެންމެ މަގުބޫލު ފަތުރުވެރިކަމުގެ މާކެޓުތަކާއި މި މާކެޓުތަކުން ހޯދާފައިވާ ކާމިޔާބީތައް ވެސް ހިއްސާކުރައްވާފައެވެ. މިނިސްޓަރު ހިއްސާކުރެއްވި ގޮތުގައި މިއަހަރު މިހާތަނަށް އެންމެ ގިނަ ފަތުރުވެރިން އައީ ޗައިނާއިންނެވެ. އެގައުމުން ރާއްޖޭގެ މާކެޓުގައި ވަނީ، 51.5 އިންސައްތައިގެ ކުރިއެރުމެއް ހޯދާފައެވެ.
ދެވަނައިގައި އުޅޭ ރަޝިއާއިން 3.4 އިންސައްތައިގެ ކުރިއެރުމެއް ހޯދާފައި ވާއިރު ތިންވަނައިގައި އުޅޭ އިނގިރޭސިވިލާތުން ވަނީ 16.3 އިންސައްތައިގެ ކުރިއެރުމެއް ހޯދާފައެވެ.
މިދިޔަ އަހަރު އެންމެ ކުރީގައި އުޅުން އިންޑިއާ މާކެޓު މިއަހަރު ފެށުމާއެކު ވަރަށް ބޮޑަށް ދަށްވިކަން ފާހަގަކުރައްވައި މިނިސްޓަރު ވިދާޅުވީ، އިންޑިއާ މާކެޓުން ރާއްޖެއަށް ފަތުރުވެރިން ގެނައުމަށް ވަރަށް ބޮޑަށް މަސައްކަތްތަކެއް ކުރެވުނު ކަމަށެވެ.
އެގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިތުރުން، މިނިސްޓަރު ވެސް އިންޑިއާއަށް ވަޑައިގަތްކަން އޭނާ ފާހަގަަކުރެއްވިއެވެ. އަދި ރައީސްގެ އިސްނެންގެވުމުގެ މަތިން މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ)ން އިންޑިއާގައި ވެލްކަމް ރޯޑްޝޯ ނަމުގައި ހަމަރާތްތަކެއް ބާއްވާފައި ވާކަން ވެސް މިނިސްޓަރު ފާހަގަކުރެއްވިއެވެ.
"އަޅުގަނޑު ވެސް އިންޑިއާއަށް ރަސްމީ ދަތުރެއްކޮށް އިންޑިއާގެ ޓޫރިޒަމް މިނިސްޓަރާއި ސިވިލް އޭވިއޭޝަން މިނިސްޓަރާ އެކީގައި ވެސް މަޝްވަރާތަކެއް ކުރިން. ދެން ވަރަށް ބޮޑަށް އިންޑިއާ މާކެޓަށް [ރަނގަޅު] ބަދަލެއް މި އައީ ރައީސް އިންޑިއާގެ ބޮޑުވަޒީރު ހުވާކުރެއްވުމުގެ ރަސްމިއްޔާތުގައި ބައިވެރިވި ފަހުން އަދި ފާފި ފަހުން ރައީސް މި ވަނީ އިންޑިއާއަށް ރަސްމީ ދަތުރުފުޅެއް ވެސް ކުރައްވާފައި. އަޅުގަނޑު ވެސް އެ ދަތުރުގައި ބައިވެރިވީން. އަދި އިންޑިއާގެ ވަރަށް ގިނަ ސެލެބްރިޓީންނާ އެކީގައި އަޅުގަނޑުމެން ޓޫރިޒަމް އިވެންޓެއް ވެސް އެތަނުގައި ބޭއްވިން،" މިނިސްޓަރު ވިދާޅުވިއެވެ.
މި މަސައްކަތުން އިންޑިއާ މާކެޓު މިހާރު ލައްކައަކަށް ވުރެ މަތި ކުރެވިފައި ވާކަން މިނިސްޓަރު ފާހަގަކުރެއްވިއެވެ.
ރާއްޖޭގެ ފަތުރުވެރިކަމުގެ ސިނާއަތުގައި އެންމެ ފަޚުރުވެރިކަމަކީ ޖެހިޖެހިގެން ހަތަރު އަހަރު "ވޯލްޑް ލީޑިން ޑެސްޓިނޭޝަން"ގެ މަގާމު ހޯދުމެވެ. ފަސްވަނަ ފަހަރަށް މި މަގާމު ދިފާއު ކުރުމަށް ކުރެވިފައި ހުރި މަސައްކަތްތައް ފާހަގަކުރައްވައި މިނިސްޓަރު ވިދާޅުވީ، މި މަގާމު މިއަހަރު ވެސް ދިފާއު ކުރެވޭނެކަމުގެ ޔަގީންކަން ވަރަށް ބޮޑަށް އެބަ އޮތްކަމަށެވެ.
"އަޅުގަނޑު މިހުރީ ވަރަށް އުންމީދާ އެކީގައި އަޅުގަނޑުމެން މުޅި އެމްއެމްޕީއާރުސީ ޓީމުގައި ވެސް އޭގެ ވޯޓު ހޯދުމަށް ވަރަށް މަސައްކަތް ކުރެވުން. އަދި ހަމަ ރާއްޖޭގެ ވަރަށް ގިނަ ރައްޔިތުން އެކަމުގައި ސަޕޯޓު ދެއްވާ ބައެއް އާޓިސްޓުން ހަމަ ވީޑިއޯ ކްލިޕްތައް ހަދާ ވޯޓު ދެއްވުމަށް މަސައްކަތް ކޮށްދެއްވި. އެހެންވީމާ އަޅުގަނޑަށް ވަރަށް އުންމީދު ކުރެވޭ،" ފައިސަލް ވިދާޅުވިއެވެ.
މީގެ އިތުރުން، މިނިސްޓަރު ވަނީ މިއަހަރަށް ކަނޑައެޅި އަމާޒުކަމުގައިވާ ދެ މިލިއަން ފަތުރުވެރިން ރާއްޖެ ގެނައުމުގެ އަމާޒަށް ވާސިލުވާނެކަމުގެ ޔަގީންކަން ވެސް ދެއްވާފައެވެ.
"އަޅުގަނޑުމެންނަށް ވަރަށް ޔަގީންކުރެވޭ ﷲގެ ހެޔޮ ރަހުމަތްފުޅާ އެކީގައި ޑިސެމްބަރު މަހުގެ ފަހު ހަފުތާތެރޭގައި އަޅުގަނޑުމެންނަށް ދެ މިލިއަން ފަތުރުވެރިން ހަމަކުރެވޭނެ ކަމުގެ ރާއްޖެއަށް،" އޭނާ ވިދާޅުވިއެވެ.
ފައިސަލް ވިދާޅުވީ އަހަރެއްތެރޭ މި ހޯދުނު ކާމިޔާބީގެ ފަހަތުގައި ވަނީ ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުން ކަމަށެވެ. އެހެންކަމުން އެ މަސައްކަތްތެރިންގެ އަގު ވަޒަންކޮށް މިނިސްޓަރު ވަނީ އެމީހުންނަށް ޝުކުރު އަދާކުރައްވައިފައެވެ.