ރާއްޖޭގެ ހާލަތު މިއަދު އޮތީ ނުކައި ބަނޑަށް ހުންނަން ޖެހުނުކަމަށްވީ ނަމަވެސް ސިނގިރޭޓު ގަނެގެން ނޫނީ ނުއުޅެވޭ މިންވަރުގައި ކަމަށް ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ މިއަދު ވިދާޅުވެއްޖެއެވެ.
ދުންފަތް ކޮންޓްރޯލްކުރުމާބެހޭ ގާނޫނަށް ގެންނަ އިސްލާހުތަކުގެ ބިލަށް ބަހުސްކުރައްވަމުން ޣަފޫރު ވިދާޅުވީ ދުންފަތުގެ އިސްތިއުމާލުކުރުމުން ސިއްހަތަށް ގެއްލުންވުން އެއީ ދެބަސްވެވެން ނެތް ހަގީގަތެއް ކަމަށެވެ.
ނަމަވެސް ރައްޔިތުން އެ ކަމުން ދުރުކުރުމުގެ ނަމުގައި ދުންފަތުން ނަގާ ޑިއުޓީ ބޮޑުކުރާއިރު އެއީ ރައްޔިތުންނަށް ތަހައްމަލުކުރެވޭނެ ކަމެއްތޯ ސުވާލު އުފެދޭ ކަމަށް އޭނާ ވިދާޅުވިއެވެ.
"މިއަދު މި ހާލަތު އޮތް ވަރަކީ ގޭގައި ކައްކައި ނުކެޔަސް ގަންނަންޖެހޭ ސިނގިރޭޓު ގަނެގެން ނޫނިއްޔަކާ އުޅެވޭކަށް ނެތް އިއްޒަތްތެރި ރައީސް. އެއީ މި ގައުމުގެ ހާލަތު. އެެހެންވީމާ އެ ހާލަތަށް ވެއްޓިގެންދާއިރުގައި މި ހާލަތަށް އަގު އަރައިގެން ދިޔައިމާ ވާނެ ގޮތާ ދޭތެރޭގައި ހަމަ ވިސްނައިފައި އަޅުގަނޑުމެން ގޮތްތައް މިއަދު ނިންމަން ޖެހޭނީ ވެސް،" ޣަފޫރު ވިދާޅުވިއެވެ.
ޣަފޫރު ވިދާޅުވީ ސިނގިރޭޓުގެ ޑިއުޓީ ބޮޑުކުރުމާ ދެކޮޅު ނުހައްދަވާ ކަމަށެވެ. ނަމަވެސް މިހާރު ބޮޑުކުރަން ހުށަހަޅައިފައި އޮތް މިންވަރަށް ބޮޑުކުރުމަކީ "ކަނޑައެޅިގެން ދެކޮޅު" ކަމެއް ކަމަށް ވިދާޅުވިއެވެ. އަދި މިއީ ހާލަތާ ނުބައްދަލު ބާރެއް ބޭނުންކުރުން ކަަމަށް ވެސް އޭނާ ވިދާޅުވިއެވެ.
"މި ކަން މި ހިސާބުގައި އޮއްވައި ރައްޔިތުންނަށް ތަހައްމަލުނުކުރެވޭ ވަރު ބޮޑު އަގެއް އަޅުގަނޑުމެން މީގައި ޖެހީމާ ދެން ގައުމަށް ވާނެ ގޮތް އެއީ އަޅުގަނޑުމެން ދެވަނަ ފަހަރަށް ވެސް ވިސްނައިލަން ޖެހޭނެ ކަމެއް އިއްޒަތްތެރި ރައީސް،" ރާއްޖޭގެ 18 އަހަރުން މަތީގެ 40 ޕަސެންޓު މީހުން ދުންފަތް ބޭނުންކުރާކަން ފާހަގަކުރައްވައި ޣަފޫރު ވިދާޅުވިއެވެ.
ޣަފޫރު ވިދާޅުވީ މިއީ ދައުލަތަށް އާމްދަނީ އިތުރުކުރުމަށް ވެސް ކޮށްގެންވާނެ ކަމެއް ނޫންކަމަށެވެ. ސަބަބަކީ ވޭޕާއި ސިނގިރޭޓުގެ ވިޔަފާރިއަކީ ވެސް ފުޅާ ދާއިރާއެއްގައި ރާއްޖޭގައި ގިނަ ބަޔަކު "އިންވެސްޓު"ކޮށްގެން އޮތް ވިޔަފާރިއެއްކަމަށް ވާތީކަމަށް ވިދާޅުވިއެވެ.
އަދި ސަރުކާރުގެ މި ނިންމުމުގެ ސަބަބުން އެ ވިޔަފާރިވެރިންނަށް ލިބޭ ގެއްލުމަށް ދައުލަތުން ބަދަލެއް ދޭނެތޯ ވެސް އެއީ އުފެދޭ ސުވާލެއްކަމަށް ޣަފޫރު ވިދާޅުވިއެވެ.
ހަމައެއާއެކު ރާއްޖެ އަންނަ ފަތުރުވެރިންގެ ތެރެއިން ގިނަ ބަޔަކު ވޭޕް ބޭނުންކުރާއިރު ވޭޕް ބޭނުންކުރުން މަނާކުރުމުން ދެން ފަތުރުވެރިން އަމަލުކުރާނީ ކިހިނެއްތޯ ވެސް އެއީ ވިސްނަން ޖެހޭކަމެއް ކަމަށް ޣަފޫރު ވިދާޅުވިއެވެ.
މީގެ އިތުރުން، ދުވަހުން ދުވަހަށް ވޭޕާއި ސިނގިރޭޓު ބޭނުންކުރާ މީހުން ރާއްޖޭގައި ވެސް އިތުރުވަމުން އަންނައިރު، މިއަދާ ހަމައަށް ވެސް ސަރުކާރުތަކަށް އެ ކަމުގެ ގެއްލުން އެންމެ ރަނގަޅަށް ބުނެދެވިފައި ނުވާކަމަށް ވެސް ޣަފޫރު ވިދާޅުވިއެވެ.
އަދި ސިނގިރޭޓުގެ އަގު ބޮޑުކުރާއިރު، އެ އަގަކީ ރައްޔިތުންނަށް އުފުލޭނެ ވަަރު ބުރައެއްގެ މިންވަރަށް އެ ކަން ކުރުމަށް ތަކުރާރުކޮށް އޭނާ ވަނީ ގޮވައިލައްވައިފައެވެ.
ސަރުކާރުން މިހާރު ހުށަހަޅައިފައިވަނީ އެކްސްޕޯޓް އިމްޕޯޓްގެ ގާނޫނުގެ ހަތްވަނަ މާއްދާގެ ޗެޕްޓަރު 24ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރުމަށެވެ.
އަދި ސިނގިރެޓާއި ބިޑިން ނެގޭ އެޑްވަލޮރަމް ރޭޓް 50 އިންސައްތަ މަތިކުރުމަށެވެ.