އެއް އަހަރު ތެރޭގައި މި ސަރުކާރަށް ވުރެ ގިނައިން ލޯނު ނެގި ސަރުކާރެއް އަދި ނާންނަ ކަމަށް އިދިކޮޅު އެމްޑީޕީއަށް ނިސްބަތްވާ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ މިއަދު ވިދާޅުވެއްޖެއެވެ.
މެންބަރު ޣަފޫރު އެފަދައިން ވިދާޅުވީ ޓުރިޒަމާ ބެހޭ ގާނޫނަށް ހުށަހަޅާފައިވާ އިސްލާހަށް ބަހުސް ކުރައްވަމުންނެވެ. އެ އިސްލާހުގައި ވަނީ ޓޫރިސްޓުން އަތުން ނަގާ ގްރީން ޓެކްސް ދެގުނަ ކުރަން ހުށަހަޅާފައެވެ.
އިސްލާހާ ދެކޮޅުހައްދަވައި، ޣަފޫރު ވިދާޅުވީ ދައުލަތުގެ ޚަރަދު ކުޑަނުކޮށް، ޓެކްސް ބޮޑު ކުރި ނަމަވެސް އޭގެ ފައިދާއެއް ނުކުރާނެ ކަމަށެވެ. އަދި އޭގެ އަސަރު ކުރާނީ ރައްޔިތުންނަށް ކަމަށް އޭނާ ވިދާޅުވިއެވެ.
"މިދާގޮތަށް ދަންޏާ މަގުމައްޗަށް ނުކުމެ އުޅެން ވެސް ޓެކްސް ދައްކަންޖެހޭނެ. ކާޑު އަގެއް ވެސް ކުޑައެއް ނުވި، ކަރަންޓެއް ވެސް ކުޑައެއް ނުވި، ފެނެއް ވެސް ކުޑައެއް ނުވި. ކުރިން ނުނަގާ އެއްޗިހިން ޓެކްސް ނަގަނީ ނުވިތާކަށް ޓެކްސް ބޮޑުކުރަނީ،" ޣަފޫރު ވިދާޅުވިއެވެ.
ދައުލަތުގެ ޚަރަދު ކުޑަކުރުމަށްޓަކައި އިއްޔެ ރައީސް ޑރ. މުހައްމަދު މުއިއްޒު، 228 ސިޔާސީ މުވައްޒަފުން ވަކިކުރަން ނިންމި ނިންމުން ފާހަގަކުރައްވާ ޣަފުރު ވިދާޅުވީ އެއީ ރަނގަޅު ނިންމުމެއް ކަމަށެވެ. ނަމަވެސް އެބޭފުޅުން މާދަމާ ތިއްބަވާނީ ސަރުކާރު ކުންފުނިތަކުގައި ކަމަށް ޣަފޫރު ވިދާޅުވިއެވެ. އަދި އެއީ މިހާތަނަށް ކަންވެފަ އޮތް ގޮތް ކަމަށް ވެސް އޭނާ ވިދާޅުވިއެވެ.
ޚަރަދު ކުޑަކުރުމުގެ ވާހަކައިގެ ތެރެއިން ޣަފޫރު ވިދާޅުވީ އެއް އަހަރު ތެރޭގައި މި ސަރުކާރަށް ވުރެ ގިނައިން ލޯނު ނެގި ސަރުކާރެއް އަދި ނާންނަ ކަމަށެވެ.
"...އިއްޒަތްތެރި ރައީސް. ވޯކް ޕްރޮގްރާމަށް 400 މިލިއަން. އަދި އޭގެ އިތުރަށް ފައިސާ ބަދަލު ކުރުމުގެ ޕްރޮގްރާމަށް އިތުރު 200 މިލިއަން. ތިލަފުށީގައި ރިވެޓްމަންޓް ޖެހުމާ ކަންކަން ކުރުމަށް އަނެއްކާ ވެސް އިތުރު 200 މިލިއަން ރުފިޔާ. ކުވެއިތު ފަންޑުން ހޮސްޕިޓަލް އަޅަންށޭ ކިޔައި އަނެއްކާ އަނެއް 100 މިލިއަން ރުފިޔާ. އޭގެ އިތުރަށް ބޭންކް އޮފް ސިލޯނުން އެމްއޭސީއެލްއަށް ވެސް އަނެއްކާ އެ ހުރީ ލާރި ނަގާފައި. ނުވަ ބިލިއަން ރުފިޔާގެ ޓީ-ބިލް އެބަ އޮތް ވިއްކާފައި،" ޣަފޫރު ވިދާޅުވިއެވެ.
ޣަފޫރު ވިދާޅުވި ގޮތުގައި އެއް ބިލިއަން ޑޮލަރަށްވުރެ ދައުލަތުން ނަގާފައި އޮތް ދަރަނި ބޮޑެވެ.
ދިވެހިރާއްޖޭގެ ޓޫރިޒަމާ ބެހޭ ގާނޫނަށް ސަރުކާރުގެ ފަރާތުން މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން ހުށަހެޅި އިސްލާހުގައި ހުށަހަޅާފައިވަނީ މިހާރު ޓޫރިސްޓެއްގެ ބޮލަކަށް ދުވާލަކަށް ހަ ޑޮލަރު ގްރީން ޓެކްސްގެ ގޮތުގައި ނަގަމުން އަންނަ ތަންތަނުން އަންނަ އަހަރުން ފެށިގެން 12 ޑޮލަރު ނެގުމަށެވެ. އަދި، މިހާރު ތިން ޑޮލަރު ނަގަމުން އަންނަ ތަންތަނުން އަންނަ އަހަރުން ފެށިގެން ހަ ޑޮލަރު ނެގުމަށެވެ.
މި ބަދަލާ އެކު އަންނަ އަހަރު އެ ޓެކްސްގެ ގޮތުގައި ދައުލަތަށް 963.6 މިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފައެވެ.