ދިވެހިރާއްޖެއިން ސައުދީ އަރަބިއްޔާއަށް ކަނޑައަޅުއްވާ ސަފީރު ކަމަށް މ. ވެސްޓްސައިޑް އަހުމަދު ސަރީރު އައްޔަންކުރުމުގެ މައްސަލަ ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.
ސައުދީ ސަފީރުގެ މަގާމު ހުސްވީ، ކުރިން އެ މަގާމަށް އައްޔަން ކުރި މުހައްމަދު ތާހާ، ޕާކިސްތާން ސަފީރަކަށް ބަދަލުކުރުމާ ގުޅިގެންނެވެ.
މިއަދުގެ ޖަލްސާގައި ސައުދީ ސަފީރަކަށް ސަރީރު އައްޔަން ކުރުމަށް އެދިވަޑައިގެން ރައީސް ޑރ. މުހައްމަދު މުއިއްޒު ފޮނުއްވި ސިޓީފުޅު ވަނީ އިއްވާފައެވެ.
އެއާއެކު އެ މައްސަލަ ދިރާސާކުރުމަށް ވަނީ ޚާރިޖީ ގުޅުންތަކުގެ ކޮމިޓީއަށް ފޮނުވާފައެވެ.
ސަރީރު ވަނީ މީގެ ކުރިންރާއްޖޭގެ ޚާރިޖީ ދާއިރާގެ އެކި މަގާމުތައް ފުރުއްވާފައެވެ. އަދި ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް ވެސް އަދާކުރެއްވިއެވެ.
އެގޮތުން ފޮރިން ސެކްރެޓަރީގެ މަގާމު އަދާކުރެއްވިއެވެ. މީގެ އިތުރުން އދ. އަށް ރާއްޖެއިން ކަނޑައަޅުއްވާފައި ހުންނަވާ ޕާމަނަންޓް ރެޕްރެޒެންޓޭޓިވްގެ މަގާމާއި އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމު ވެސް އަދާކުރެއްވިއެވެ.
ސަރީރު ވަނީ ފޮރިން އެފެއާޒް އެންޑް ޓްރޭޑް ދާއިރާއިން މާސްޓާސް ޑިގްރީ ހާސިލްކުރައްވާފައެވެ.