މާލެއިން ހުޅުމާލެއަށް ދުއްވާ ހައިވޭގައި ކުޑަކުއްޖަކަށް ސައިކަލު ހުންގާނުގެ ކޮންޓްރޯލު ދީގެން ދުއްވި މައްސަލައި ތަހުގީގުކުރަން ފަށައި، ފިޔަވަޅު އަޅަން ފޮނުވައިފައިވާ ކަމަށް ފުލުހުން މިރޭ ބުނެފިއެވެ.
ސޯޝަލް މީޑިއާގައި މިއަދު ވައިރަލްވި ވީޑިއޯއެއްގައި ފެންނަނީ ބްރިޖު ހައިވޭއިން މާލެއިން ހުޅުމާލެއަށް ދުއްވާފައި ދިޔަ ސައިކަލެއްގެ ކޮންޓްރޯލް ކުޑަ ކުއްޖަކަށް ދީފައިފައިވާ މަންޒަރެވެ.
ސްކޫލު ޔުނީފޯމުގައި ކުއްޖާ އިންއިރު ސައިކަލުގައި އިން ފިރިހެން މީހާ އެ ކުއްޖާއަށް ސައިކަލުގެ ކޮންޓްރޯލް ހަވާލުކޮށް، އޭނާގެ ކަނާއަތް ފަލަމަސްގަނޑު މަތީ ބާންދައިގެން، ވާއަތުން ކުޑަކޮށް ހުންގާނުގައި އަތް ޖައްސާލައިގެން އިން މަންޒަރު ފެނެއެވެ.
އެ މައްސަލަ އާންމުނާއި އިދާރާތަކުގެ ސަމާލުކަމަށް މިހާރު އައިސްފައިވާއިރު، މިރޭ މީޑިއާތަކާ ހިއްސާކުރި މެސެޖެއްގައި ފުލުހުން ބުނީ އެ ކަމުގައި ހިމެނޭ މީހާ ހާޒިރުކޮށް މިއަދު ސުވާލުކޮށްފައިވާ ކަމަށެވެ.
މި މައްސަލައިގެ ތެރެއިން، ގަސްތުގައި ކުޑަކުއްޖަކު ނުރައްކަލަށް ހުށަހެޅިކަމުގެ ތުހުމަތުކޮށް، އެ ކަން ވަކި މައްސަލައެއްގެ ގޮތުގައި ތަހުގީގުކުރަމުން އަންނަކަމަށް ފުލުހުން ބުންޏެވެ.
މީގެ އިތުރުން އޭނާގެ އެ އަމަލަކީ ޓްރެފިކް ގާނޫނާ ޚިލާފު އަމަލެއްކަމުން، އެ ކަމުގައި ފިޔަވަޅު އެޅުމަށް ޓްރާންސްޕޯޓު މިނިސްޓްރީއަށް ފޮނުވުމުގެ މަސައްކަތް ކުރަމުން އަންނަކަމަށް ފުލުހުން ބުންޏެވެ.
އެއާއެކު ފުލުހުން ވަނީ މި މައްސަލައާ ގުޅިގެން އަޅަންޖެހޭ ފިޔަވަޅުތައް އަޅާނެކަމުގެ ޔަގީންކަން އާންމުންނަށް ދޭކަމަށް ބުނެފައެވެ.
މި ގޮތަށް ނުރައްކާތެރިކޮށް ދުއްވާ މީހުންގެ ވީޑިއޯ އާންމުވުމަށް އެ މައްސަލަތައް ބެލުމަށް ފަހު ފުލުހުން ފިޔަވަޅު އަޅައެވެ. އެ ގޮތުން، ބުރިޖު މަތިން ހެލްމެޓް ނާޅައި ދުއްވާ ވީޑިއޯއެއް އާންމުވުމުންނާއި ބުރިޖުމަތިން ސައިކަލުގައި ބައިވަރު ގަސްތަކެއް އުފުލާ ވީޑިއޯއެއް އާންމުވުމުން މީގެ ކުރިން ފުލުހުން ފިޔަވަޅު އަޅާފައިވެއެވެ.
މަގުމަތީގެ އެކްސިޑެންޓުތައް މަދުކުރަން ފުލުހުން އަންނަނީ ގިނަ މަސައްކަތްތަކެއް ކުރަމުންނެވެ. އެ ގޮތުން، ސައިކަލުގައި ބުރިޖު ޕެޓްރޯލްކުރަން ވެސް ފުލުހުން ވަނީ ފަށާފައެވެ.