މޯލްޑިވްސް ޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލްގެ ނަމުގައި ސްކޭމް ކޯލްތަކެެއް ކުރާތީ އެކަމަށް ސަމާލުވުމަށް މެނޭޖިން ޑިރެކްޓަރު ޝަކީލް މިރޭ އެދިވަޑައިގެންފިއެވެ.
ޝަކީލް އެކްސްގައި ކުރެއްވި ޕޯސްޓެެއްގައި ވިދާޅުވީ، ގ. ދަލާސްޓް އަބްދުﷲ ރަޝީދު ކިޔާ މީހަކު އެކި ފަރާތްތަކަށް ޝަކީލްގެ ނަމުގައި ގުޅައިގެން ފައިސާ ހޯދާ ކަމުގެ މައުލޫމާތު ލިބިފައިވާ ކަމަށެވެ.
މިގޮތުން، އެކި ފަރާތްތަކުގެ އަތުން ބޮޑެތި އަދަދުތަކުން ފައިސާ ހޯދުމަށް އެ މީހާ ސްކޭމް ކޯލުތައް ކުރާތީ ޝަކީލް ވަނީ އެކަމަށް ސަމާލުވުމަށް އިލްތިމާސްކުރައްވާފައެވެ.
ޝަކީލްގެ ފަރާތުން ކަމަށް ބުނެ، އެއްވެސް މީހަކު ކުރާ ކޯލަކަށް އިޖާބަ ނުދިނުމަށް ޝަކީލް އެދިވަޑައިގަތެވެ. މީގެއިތުރުން، އެ މައްސަލަ ބެލުމަށް ފުލުހުންނަށް ހުށަހަޅާފައިވާކަން އޭނާ ވަނީ ފާހަގަކުރައްވާފައެވެ.
އެކި ގޮތްގޮތުން މަކަރާއި ހީލަތް ހަދައިގެން ފޭރުމުގެ މައްސަލަތައް މީގެ ކުރިން ވަނީ ސޯޝަލް މީޑިއާއަށް ފެންމަތިވެފައެވެ. އެގޮތުން މިފަހުން އުމުރުން ދުވަސްވީ މީހުންނަށް އަމާޒުކޮށްގެން ހިންގާ ހީލަތުގެ މައްސަލަތައް އިތުރުވެފައިވާ ކަމަށް ފުލުހުން ބުނެފައިވެއެވެ.
ފުލުހުން ވަނީ މިފަދަ ކަމެއް ދިމާވެއްޖެ ނަމަ، ނުވަތަ އެ ފަދަ ކަމަކަށް ތުހުމަތު ކުރެވިއްޖެ ނަމަ، ދިވެހި ފުލުހުންގެ ޚިދުމަތުގެ ހޮޓްލައިން ނަންބަރު 3322111 އަށް ނުވަތަ އިމަޖެންސީ ނަންބަރު 119 އަށް ގުޅުއްވައި ރިޕޯޓްކުރެއްވުމަށް އެދިފައެވެ.