އިންޑިއާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި ރާއްޖޭގެ މިނިވަންކަމާއި ސިޔާދަތަށް އެއްވެސް ގެއްލުމެއްވާ އެއްބަސްވުމުގެއްގައި ސޮއިނުކުރައްވާކަމުގެ ޔަގީންކަން ރައީސް ޑރ. މުޙައްމަދު މުއިއްޒު ދެއްވައިފިއެވެ.
އެ މަނިކުފާނު މި ފަދައިން ވިދާޅުވެ ޔަގީންކަން ދެއްވީ، އިންޑިއާގެ ބެންގަލޫރުގައި ދިރިއުޅޭ ރައްޔިތުންނާ ބައްދަލުކުރައްވައި ވާހަަކަފުޅުދައްކަވަމުންނެވެ. އެ މަނިކުފާނު އިޝާރާތްކުރެއްވީ ރާއްޖެއާއި އިންޑިއާއާ ދެމެދު ގާއިމްކުރެވުނު "އަ ވިޝަން ފޯ ކޮންޕްރެހެންސިވް ޕާޓްނާޝިޕް އޮން އިކޮނޮމިކް އެންޑް މެރިޓައިމް ސެކިއުރިޓީ ޕާޓްނާޝިޕް" އަށެވެ.
https://presidency.gov.mv/Press/Article/31823
ރައީސް ވިދާޅުވީ އެ އެއްބަސްވުމަކީ އާންމުންނަށް ފެންނާނެެހެން އޮތް އެއްބަސްވުމެއް ކަމަށް ވިދާޅުވިއެވެ. އެއިން އެއްބަސްވުމަކުން އެހެން ގައުމެއްގެ ސިފައިން ރާއްޖެ ނާންނާނެ ކަމަށާއި އެހެން ގައުމެއްގެ އަތްމައްޗަށް ރާއްޖޭގެ އެއްވެސް ކަމެއް ވެސް ނުދާނެ ކަމަށް ވިދާޅުވިއެވެ.
"އެއީ މިހާރު ވެސް ތިއިން ކޮންމެ ބޭފުޅަކު ބައްލަވައިލައްވަން ބޭނުންފުޅު ވިޔަސް ފެންނަން އޮތް އަކުރުން ފިއްޔަށް ލިޔެފައި އޮތް އެއްޗެއް،" ރައީސް ވިދާޅުވިއެވެ.
ރައީސް ވިދާޅުވީ އެ އެއްބަސްވުން އެކުލަވައިލައިފައިވަނީ ދިވެހި ސަރުކާރުގެ ސިޔަސަތާ އެއްގޮތަށް ކަމަށެވެ. އެގޮތުން އެ އެއްބަސްވުމުގައި ދިފާއީ ގޮތުން ލިޔެފައިވާ ކޮންމެ ވާހަކައަކީ އެމްއެންޑީއެފުން ބަލައި، ޑިފެންސް މިނިސްްޓްރީން ފާސްކޮށްފައިވާ ވާހަކަތަކެއް ކަމަށް ވިދާޅުވިއެވެ.
އަދި އެ އެއްބަސްވުމުގައިވާނީ ދިވެހީންގެ ގާބިލްކަން އިތުރުކުރުމުގެ ވާހަކަ ކަމަށާއި، އެހެން ބަޔަކަށް ކަންކަން ދޫކުރުން ނޫން ކަމަށް ވެސް ފާހގަކުރެއްވިއެވެ. އަދި ކުރީ ސަރުކާރުގައި އަމަލުކުރިކަމަށް ތުހުމަތުކުރެވުނު ގޮތަށް ރާއްޖެއަށް ގެއްލުންވާ ކަމެއް އެ އެއްބަސްވުމުގައި ނުހުންނާނެކަމަށް ވިދާޅުވިއެވެ.
ރައީސް ވިދާޅުވީ ރާއްޖޭގެ މިނިވަންކަމާއި ސިޔާދަތަކީ ދިވެހީންނަށް އެންމެ މުހިންމު ކަންތައްކަމަށެވެ.
އަދި ރާއްޖޭގައި އިންޑިއާގެ އެއްވެސް ސިފައިންގެ ބަޔަކު ދެން ނުތިބޭނެކަމަށް ވިދާޅުވެ އެ މަނިކުފާނު ވިދާޅުވީ އެކަމަށް ރާއްޖެއާއި އިންޑިއާއާ ދެމެދު ޑިޕްލޮމެސީގެ އުސޫލުން ދާއިމީކޮށް ހައްލުކޮށްފައިވާ ކަމަށެވެ.
ރައީސް ޑރ. މުއިއްޒު އިންޑިއާއަށް ކުރެއްވި މި ފުރަމާނަ ދަތުރުފުޅާއެކު، އިދިކޮޅުގައި މިހާރުގެ ވެރިން ތިއްބަވައި ދެއްކެވި ބައެއް ވާހަކަފުޅުތަކާއި، އިންޑިއާއާ ދެކޮޅަށް ހިންގި ބައެއް ހަރަކާތްތަކާ ގުޅިގެން ފާޑުކިއުންތައް އަމާޒުވިއެވެ.
އެ ހަރަކާތްތައް ހިންގީ އެއިރުގެ އެމްޑީޕީ ސަރުކާރުން ރާއްޖޭގެ މިނިވަންކަމަށް ނުރައްކާވާ ގޮތް ނޭނގޭ އެއްބަސްވުންތައް އިންޑިއާއެކު ވާކަމަށް ތުހުމަތުކޮށެވެ. އަދި އިންޑިއާ އަސްކަރީ ސިފައިން ރާއްޖޭގައި ގާއިމްވެ ތިބިކަމަށް ބުނެއެވެ.
ރައީސް ޑރ. މުއިއްޒު ވެރިކަމާ ހަވާލުވެވަޑައިގެން މާ ގިނަ ދުވަހެއް ނުވެ، ރާއްޖެއާއި އިންޑިއާގެ ގުޅުން ހީނަރުވި ނަމަވެސް މިހާރު އެ ގުޅުން އޮތީ ވަރަށް ރަނގަޅަށެވެ.