ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަވަހާރަކޮށްލާނެ ކަމުގެ އިންޒާރު ދިން މީހާގެ ބަންދަށް ކްރިމިނަލް ކޯޓުން 15 ދުވަސް ޖަހައިފިއެވެ.
ފުލުހުން މިރޭ ހިއްސާކުރި މެސެޖެއްގައި ވަނީ މި މައްސަލައާއި ގުޅިގެން ހައްޔަރު ކުރެވުނު މީހާގެ ބަންދާމެދު ގޮތެއް ނިންމުމަށް، ކްރިމިނަލް ކޯޓަށް ހާޒިރުކުރުމުން އޭނާ 15 ދުވަހަށް ބަންދުކުރުމަށް އެ ކޯޓުން އަމުރުކޮށްފައި ވާކަމަށެވެ.
މި މައްސަލައިގައި ފުލުހުން ހައްޔަރުކޮށަފއި ވަނީ ގ. ސަންސަންގެއާގޭ އުމުރުން 40 އަހަރުގެ އަބްދުﷲ މިޔާދެވެ.
އޭނާ ރާއްޖެއިން ބޭރުގައި ހުރެފައި ރޭގެ ވަގުތެއްގައި ރާއްޖެ އައުމާ އެކު ފުލުހުން ވަނީ އޭނާ ހައްޔަރުކޮށްފައެވެ.
އޭނާ ވަނީ މީސްމީޑިއާގައި ރައީސް މުއިއްޒު އަވަހާރަކޮށްލާނެ ކަމަށް ބުނެ އިންޒާރު ދީފައެވެ. އޭގެ އިތުރުން ވެސް ސިޔާސީ ބައެއް ބޭފުޅުންނަށް އޭނާ އިންޒާރު ދީފައިވާއިރު އެއް ޖިންސުން ގުޅުން ހިންގަން ހިތްވަރުދީ ވެސް އޭނާ މީސްމީޑިއާގައި ޕޯސްޓްކުރާ ކަމަށް ވަނީ ތުހުމަތުކުރެވެއެވެ.
ފުލުހުން އޭނާގެ މައްޗަށް ސީރިއަސް ތުހުމަތުތަކެއް ކުރެއެވެ. އެ ގޮތުން، ރައީސް މުއިއްޒާއި ދައުލަތުގެ އެކި ފެންވަރުގެ ވެރިން އަވަހާރަކޮށްލަން ޖެހޭ ކަމަށް ބުނެ، މީސްމީޑިއާގައި ޕޯސްޓްކުރާ ކަމަށް ތުހުމަތުކުރެއެވެ.
މިޔާދު ގެންގުޅޭ ކަމަށް ތުހުމަތުކުރެވޭ ފޭސްބުކް އެކައުންޓުން މީހުންނަށް އެކި ކަހަލަ އިންޒާރު ދީ، ހަޑިހުތުރު ބަހުން މުއާމަލާތްކޮށް، އެއް ޖިންސުން ގުޅުން ހިންގަން ހިތްވަރު ދީފައިވާ ކަމަށް ފުލުހުން ބުންޏެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ.