ގޫގުލް އިން އެ ކުންފުނީގެ މެސެޖިން ޕްލެޓްފޯމް ކަމުގައިވާ ގޫގުލް ޗެޓަށް އައު އަޕްޑޭޓްތަކެއް ތަޢާރަފުކޮށްފިއެވެ. މި އަޕްޑޭޓްތަކުގެ ތެރޭގައި ވީޑިއޯ މެސެޖު ފޮނުވުމުގެ ފީޗާ ވެސް ހިމެނެއެވެ. މި އައު ފީޗާތައް ތަޢާރަފުކޮށްފައިވަނީ ބޭނުންކުރާ ފަރާތްތަކުގެ މެދުގައި މުވާސަލާތުކުރުން ފަސޭހަކޮށް، ވަގުތު ސަލާމަތްކޮށް، އަދި މުވާސަލާތު އިތުރަށް ހަރުދަނާކުރުމުގެ މަޤްޞަދުގައިކަމަށް ގޫގުލްއިން ބުނެއެވެ.
ގޫގުލްގެ ވޯކްސްޕޭސް ބްލޮގެއްގައި ބަޔާންކޮށްފައިވާ ގޮތުގައި، ވީޑިއޯ މެސެޖު ފޮނުވުމުގެ ފީޗާ ބޭނުންކުރެވޭނީ ސީދާ މެސެޖު ފޮނުވުމަށާއި، ގްރޫޕް މެސެޖުތަކަށާއި، އަދި ސްޕޭސްތަކުގައެވެ. މި ފީޗާ ބޭނުންކޮށްގެން ފޮނުވާ މެސެޖުތަކަށް ޖަވާބުދާރީވުމާއި، ރިއެކްޓްކުރުމާއި އަދި ކޯޓްކުރުމުގެ ފުރުސަތު ލިބިގެންދާނެއެވެ.
މީގެއިތުރުން، ފޮނުވާ އަދި ލިބޭ މެސެޖުތައް ޝެއާޑް ޓެބްގެ މީޑިއާ ސެކްޝަނުގައި ރައްކާކުރެވޭނެއެވެ.
ނަމަވެސް، މި އައު ފީޗާ ބޭނުންކުރުމުގައި ބައެއް ގޮންޖެހުންތައް ހުރިކަން ގޫގުލްއިން ފާހަގަކޮށްފައިވެއެވެ. އެގޮތުން، ކްރޯމްއޯއެސް، ލިނަކްސް އަދި ފަޔާފޮކްސްގައި މި ފީޗާ ބޭނުންކުރެވެން ނެތްކަން ފާހަގަކޮށްފައިވެއެވެ. އަދި ހުރިހާ ޕްލެޓްފޯމްތަކެއްގައި ވީޑިއޯ މެސެޖު ލިބޭނެ ނަމަވެސް، ވީޑިއޯ މެސެޖު ފޮނުވޭނީ ވެބް މެދުވެރިކޮށް އެކަނި ކަމަށް ގޫގުލްއިން މަޢުލޫމާތު ދީފައިވެއެވެ.
މި އައު ފީޗާތައް ތަޢާރަފުކުރުމާއެކު، ކަސްޓަމާ ސަޕޯޓް އަދި ސޭލްސް ޓީމުތަކަށް އައު ފީޗާތަކާއި އެކައުންޓް ބަދަލުތަކާ ގުޅޭ އަޕްޑޭޓްތައް ވީޑިއޯ މެދުވެރިކޮށް ޙިއްސާކުރުމުގެ ފުރުސަތު ލިބިގެންދާނެކަމަށް ގޫގުލްއިން ބުނެފައިވެއެވެ.
މީގެ އިތުރުން، ކުންފުނީގެ މުވައްޒަފުންނަށް ފޯރުކޮށްދޭންޖެހޭ އަޕްޑޭޓްތައް ޙިއްސާކުރުމަށާއި، ބައްދަލުވުމަކަށް ހާޒިރުނުވެވުނު މުވައްޒަފުންނަށް އެ ބައްދަލުވުމުގެ މަޢުލޫމާތު ފޯރުކޮށްދިނުމަށް މި ފީޗާ ބޭނުންކުރެވިދާނެކަމަށް ވެސް ގޫގުލްއިން ބުނެފައިވެއެވެ.
އޭގެ ފަހުން ނެރުނު ބްލޮގް ޕޯސްޓެއްގައި ގޫގުލް އިން ވަނީ ގޫގުލް ޗެޓްގައި ވޮއިސް މެސެޖުތަކަށް ޓްރާންސްކްރިޕްޝަން ކެޕޭސިޓީތައް ތައާރަފުކުރިކަން ވެސް އިއުލާންކޮށްފައެވެ.
މިފީޗާ ތައާރަފު ކުރުމާ ގުޅިގެން މިހާރު ވެބް އަދި މޯބައިލްގައި ޗެޓްގައި ވޮއިސް މެސެޖްތަކުގެ އޮޓޮމެޓިކް ޓްރާންސްކްރިޕްޝަންތައް ޔޫޒަރުންނަށް ފެންނާނެއެވެ. އެއީ ވޮއިސް މެސެޖުގެ ދަށުން ފެންނަ އާ ވިއު ޓްރާންސްކްރިޕްޓް އޮޕްޝަނަށް ފިތާލުމުން ބަލާލެވޭނެ އެއްޗެކެވެ. ނުވަތަ ޓްރާންސްކްރިޕްޓްތައް ފޮރުވުމަށް ވެސް ޔޫޒަރުންނަށް އިޚްތިޔާރު ކުރެވިދާނެއެވެ.
ގޫގުލް އިން ބުނާ ގޮތުގައި ވޮއިސް މެސެޖް ޓްރާންސްކްރިޕްޓްތަކަކީ ސްކްރީން ރީޑަރުންނަށް ކިޔަން ފަސޭހަ ޓެކްސްޓެއްގެ ގޮތުގައި ބަލާ އެއްޗެކެވެ. އެއީ ޑިވައިސްގެ ބަހުގެ ސެޓިންގްސް އަށް ތަބާވާނެ އެއްޗެކެވެ.