ހުޅަނގު މޫސުމުގެ ބާރުގަދަވެ، ވިއްސާރަ ކުރާނެ ކަމަށް މޫސުމާ ބެހޭ ގައުމީ އިދާރާއިން ލަފާކޮށްފައިވާތީ، އުސް ތަންތަނަށް ތަކެތި ބަދަލު ކުރުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު އެދިއްޖެއެވެ.
އެންޑީއެމްއޭއިން ނެރުނު ބަޔާނެއްގައި ބުނީ، ކުރިއަށް އޮތް ފަސް ދުވަހު ހުރިހާ އަތޮޅުތަކަށް ވިއްސާރަކުރާނެ ކަމަށް ލަފާކޮށްފައިވާތީ ރައްޔިތުންގެ މުދަލާއި ގެދޮރަށް ލިބިދާނެ ގެއްލުންތަކުން ސަލާމަތްކުރުމަށް އިލްތިމާސްކުރާ ކަމަށެވެ.
އާދަޔާ ހިލާފަށް ފެންބޮޑުވެ، ގޭގެއަށް ބޮޑެތި ގެއްލުންތަކެއްވުން: މޫސުން ވަރަށް ގޯސް، ފެންބޮޑުވާނެތީ އުސް ތަންތަނަށް ތަކެތި ބަދަލު ކުރަން އެދެފި -- ސަން ފޮޓޯ/ ފަޔާޒު މޫސާ
ރައްކާތެރިވުމަށް އެޅޭނެ ބައެއް ފިޔަވަޅުތަކަކީ:
- ވާރޭވެހި ފެންބޮޑުވެދާނެ ކަމަށް ސަމާލުވުން
- ގެއަށް ފެން ނުވަންނާނެ ގޮތަށް ވެލި ބަސްތާ ފަދަ ތަކެތި ޖެހުން
- ގޭގައި ފެންބޮޑުވެއްޖެ ހާލަތެއްގައި، ގެއްލުންވާފަދަ ތަކެތި އުސް ތަންތަނަށް ބަދަލުކުރުން
- އުސް ތަންތަނަށް ބަދަލުނުކުރެވޭ ތަކެތި ފެން ނުފޯރާ ހިސާބަށް ބަދަލުކުރުން
- ގޭގެ ފުރާޅު އެއްލައިލާނެ ކަމަށް ލަފާ ކުރެވޭނަމަ، ކުރިއާލާ ރައްކާތެރިކުރުން
- ވައިގެ ސަބަބުން އެއްލާލާނެ ފަދަ ތަކެތި ބަނނުން
- ބޭނުންނުކުރާ ކަރަންޓު ސާމާނު ނިއްވާލާފައި ބެހެއްޓުން
- ކަނޑު ދަތުރުކުރާއިރު މޫސުމަށް ސަމާލުވުން
- ކަނޑު ދަތުރަށް ނުކުންނައިރު ސަލާމަތީ ކަންކަން ފުރިހަމަކުރުން
ބޯ ވިއްސާރަޔާއެކު މާލޭގެ މަގުތަކުގައި ފެންބޮޑުވުން: މޫސުން ވަރަށް ގޯސް، ފެންބޮޑުވާނެތީ އުސް ތަންތަނަށް ތަކެތި ބަދަލު ކުރަން އެދެފި -- ސަން ފޮޓޯ/ ފަޔާޒު މޫސާ
މެޓް އޮފީހުން ވަނީ، ކުރިއަށް އޮތް ފަސް ދުވަހު މެދުރާއްޖެ ތެރެއާއި އުތުރުގެ ރަށްތަކަށް ގަޑިއަކު 15 މޭލާއި 25 މޭލު ބާރުމިނުގައި ވައިޖެހޭނެ ކަމަށް ލަފާކުރާއިރު، ދެކުނުގެ އަތޮޅުތަކަށް 13 މޭލައި 23 މޭލު ބާރުމިނުގައި ވައިޖެހޭނެ ކަމަށެވެ.
މެޓުން ބުނި ގޮތުގައި، ވިލާގަނޑުގައި ހުރިހާ ސަރަހައްދަކަށް ގަޑިއަކު 45 މޭލާއި 55 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.
ކުރިއަށް އޮތް ފަސް ދުވަހު ވެސް ހުރިހާ ސަރަހައްދެއްގެ ކަނޑުތައް ގަދަވާނެ ކަމަށް ބެލެވޭއިރު، ގަދަވަޔާ އެކު ބޯކޮށް ވާރެވެހޭނެ ކަމަށާއި ގުރުގުރާނެ ކަމަށް މެޓުން ލަފާކޮށްފައިވެއެވެ.
އަދި، ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާ ކަމަށް ބުނެފައިވެއެވެ.