ރާއްޖެއަށް މިހާރު ކުރަމުންދާ ވިއްސާރައިގައި ރާއްޖޭގެ އެކި ސަރަހައްދުތަކަށް ބޮޑެތި ގެއްލުންތަކެއް ވެއްޖެއެވެ.
ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ބުނީ، ގެއްލުން ލިބޭ ރަށްތަކަށް އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ވިލަރެސް ކުރަމުންދާ ކަމަށެވެ. މި ގޮތުން ހާލުގައި ޖެހޭ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ފޯރުކޮށްދިނުމުގެ މަސައްކަތް ވެސް ކައުންސިލް އިދާރާތަކާ ގުޅިގެން ކުރަމުންދާ ކަމަށް ބުނެފައިވެއެވެ.
އެ އޮތޯރިޓީން ވަނީ މިހާރު ރާއްޖެއަށް ކުރަމުންދާ ވިއްސާރައިގައި ލިބުނު ގެއްލުމާއި، ކަމާގުޅޭ ފަހުގެ މައުލޫމާތު ހާމަކޮށްފައެވެ.
ޅ. ކުރެންދޫ: ބޯކޮށް ވާރޭވެހި، ރަށު ތެރޭގައި އެއްކޮށް ފެންބޮޑުމުގެ ސަބަބުން އެ ރަށުގައި ހުރި ޕަމްޕު ބޭނުންކޮށްގެންނާއި، ކޯރު ކަނޑައިގެން ފެންހިންދުމުގެ މަސައްކަތް ކުރަމުންދާ ކަމަށް އެންޑީއެމްއޭއިން ބުނެއެވެ. އަދި އެ ރަށުގައި ބޮޑުވެފައިވާ ފެންގަނޑު ހިންދުމުމުގެ މަސައްކަތުގައި ނޮދާން އޭރިޔާ ކޮމާންޑުގެ ސިފައިން ވެސް އަންނަނީ ހަރަކާތްތެރިވަމުންނެވެ.
އެންޑީއެމްއޭއިން ބުނި ގޮތުގައި ފެންބޮޑުވެ، ގެއްލުން ލިބުނު ގެތަކުގެ ތެރެއިން ދިރިނޫޅެވޭ ހާލަތަށް ގޮސްފައިވާ ގެތައް ދެނެގަނެ، އެ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ފޯރުކޮށްދިނުމުގެ މަަސައްކަތް، އެ ރަށު ކައުންސިލާ ގުޅިގެން އަންނަނީ މިހާރު ކުރަމުންނެވެ.
ކުރެންދޫގެ 70 ވަރަކަށް ގެއަށް ފެންވަދެ، ބޮޑެތި ގެއްލުންތަކެއް ލިބިފައިވާތީ، ގެއްލުންތައް ގެނެގަތުމުގެ މަސައްކަތް އެ އޮތޯރިޓީން ކުރަމުން އެބަދެއެވެ.
ރާއްޖެއަށް މިހާރު ކުރަމުންދާ ވިއްސާރައިގައި އެކި ހިސާބުތަކަށް ވަނީ ބޮޑެތި ގެއްލުންތަކެއް ލިބިފައި. އެންޑީއެމްއޭއިން ދަނީ އެހީތެރިކަން ފޯރުކޮށްދެމުން -- ފޮޓޯ/ އެންޑީއެމްއޭ
ދ. ބަނޑިދޫ: މިއަދު ހެނދުނު އެ ރަށަށް އެރި ކޮޅިގަނޑެއްގައި އެއް ގޭގެ ބަދިގޭ ފުރާޅުން ބައެއް ވަނީ އެއްލާލައިފައެވެ. އަދި ބޯކޮށް ވާރޭވެހުމުގެ ސަބަބުން ހިފާގެންގުޅޭ ތަކެއްޗަށް ގެއްލުން ލިބިފައިވާ ކަމަށް އެންޑީއެމްއޭއިން ބުނެއެވެ.
މި ހާދިސާގައި އެ ގޭގައި ދިރިއުޅޭ ހަތް މީހުންނަށް ވެސް ބޭނުންވާ އެހީތެރިކަން ކައުންސިލް މެދުވެރިކޮށް އެ އޮތޯރިޓީންވަނީ ފޯރުކޮށްދީފައެވެ.
އަދި މި ހާދިސާގައި އިތުރު ގެއެއްގެ ފުރާޅުން އެއްބައި ޓިނުތައް ވެސް ވަނީ އެެއްލާލައިފައެވެ. މި ހާދިސާގައި ޓިނުތައް އެއްލާލައިގެން ގޮސްފައިވަނީ އެ ގޭގެ ތަކެތި ރައްކާތެރި ކުރުމަށް ބަހައްޓާފައިވާ ކޮޓަރިއެއްގައެެވެ. އަދި މި ގޭގެ ފުރާޅު މަރާމާތު ކުރުމުގެ މަސައްކަތް މިހާރު ކުރަމުންދާ ކަމަށް އެންޑީއެމްއޭއިން މައުލޫމާދު ދެއެވެ.
ސ. ފޭދޫ: މިއަދު ކުރި ވިއްސާރައިގައި އެއް ގޭގެ ފުރާޅަށް ގެއްލުންވެ، ސީލިންގަށް ފެންއެޅުމުގެ ސަބަބުން ސީލިން ވަނީ ވެއްޓިފައެވެ. މި ހާދިސާއާ ގުޅިގެން އެ ގޭގެ ފުރާޅު މަރާމާތު ކުރުމުގެ މަސައްކަތް ކޮށްފައިވާ ކަމަށް އެންޑީއެމްއޭއިން ބުނެއެވެ.
މާލެ: ބޯކޮށް ވާރޭވެހި މަގުތަކުގައި ފެންބޮޑުވުމާ ގުޅިގެން އެމްއެންޑީއެފްގެ އެހީތެރިކަމާ އެކު ވަނީ ފެންހިއްކުމުގެ މަސައްކަތް ކުރިޔަށް ގެންގޮސްފައެވެ.
އަދި އާންމުކޮށް މާލޭގައި ފެންބޮޑުވެ ގެއްލުން ލިބޭ ކަމަށް ފާހަގަކުރެވިފައިވާ ގެތަކުގައި މާލެ ސިޓީ ކައުންސިލާއި ގުޅިގެން ވެލިބަސްތާ ޖެހުމުގެ މަސައްކަތް ވެސް ކުރިޔަށް ގެންގޮސްފައިވެއެވެ.
މޫސުމާބެހޭ އިދާރާ (މެޓް)އިން މިހާރު ވެސް އޮތީ ހއ. އަތޮޅުން ފެށިގެން ބ. އަތޮޅަށް، މިރޭ 00:30ގެ ނިޔަލަށް ހުދު ސަމާލު ނެރެފައެވެ.
މެޓުން ބުނީ އެކިހިސާބަށް ވިއްސާރަކޮށް، ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ.
އިރުއުތުރާއި އިރުން ގަޑިއަކު ފަސް މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ވިލާގަނޑުގައި ގަނޑިއަކު 35 މޭލު ބާރުމިނަށް ވައިގަދަވުން އެކަށީގެންވާކަމަށް މެޓުން ބުނެއެވެ.
ކަނޑުތައް ވިލާގަނޑުގައި ގަދަވާނެ ކަމަށް ލަފާކޮށްފައިވާއިރު، ރާޅުގެ އުސްމިން ފަސް ފޫޓަށް އުފުލޭނެ ކަމަށް އަންދާޒާކޮށްފައިވެއެވެ.
އެހެން ކަމުން މެޓުން އިލްތިމާސްކުރަނީ ހުރިހާ ފަރާތްތަކުން ވެސް މޫސުމަށް ސަމާލުވުމަށެވެ.