މެދުރައްޖެތެރެއާއި އުތުރުގެ ބައެއް އަތޮޅުތަކަށް މިރޭ ގުގުރުމާއެކު ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ (މެޓް)އިން ބުނެފިއެވެ.
މެޓް އޮފީހުން ލަފާކޮށްފައިވާ ގޮތުގައި ދެކުނުގެ އަތޮޅުތަކަސް މޫސުން އާންމު ގޮތެއްގައި ރަނގަޅު ވާނެއެވެ.
މިރޭ ހުޅަނގާއި ހުޅަނގު އުތުރުން، އުތުރުގެ އަތޮޅުތަކަށް ގަޑިއަކު ތިން މޭލާއި 13 މޭލާ ދެމެދަށް ވައި ޖެހޭނެ ކަމަށް މެޓުން ވަނީ ލަފާކޮށްފައެވެ. އަދި މެދުރާއްޖެތެރެއާއި ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު ހަތް މޭލާއި 17މޭލަށް ވައިގަދަވާނެ ކަމަށް ވަނީ ލަފާކޮށްފައެވެ.
މެދުރައްޖެތެރެއާއި އުތުރަށް ކަނޑުތައް ވެސް އާދައިގެ ވަރަކަށް ގަދަވާނެއެވެ.
މިދިޔަ މަހުގެ ކުރީކޮޅު ވެސް މެދުރާއްޖެތެރެއަށް މޫސުން ގޯސްވިއެވެ. އެގޮތުން ބޯކޮށް ވާރޭ ވެހުމުގެ ސަބަބުން މާލެއާއި ބައެއް ރަށްރަށުގައި ފެންބޮޑުވީއިރު، އުދައަރާފާނެކަމަށް ލަފާކޮށް، އެކަމަށް ސަމާލުވުމަށް ވެސް މެޓުން އިލްތިމާސް ކުރިއެވެ.
ރާއްޖެއަށް މިހާރު ކުރަމުން މިދަނީ މޫސުމީ ވިއްސާރަ ކަމަށް މެޓް އޮފީހުން ވަނީ މައުލޫމާތު ދީފައެވެ.