ޕެލަސް ބަލިކޮށް، ލިވަޕޫލް އެއްވަނައިގައި ހިފަހައްޓާލައިގެން

އިނގިރޭސި ޕްރިމިއާ ލީގުގައި ތާވަލުގެ އެއްވަނައިގައި އޮތް ލިވަޕޫލުން ކްރިސްޓަލް ޕެލަސް ބަލިކޮށް، އެއްވަނަ ދިފާއުކޮށްފިއެވެ.

ޕެލަސްގެ ދަނޑުގައި ކުޅުނު މި މެޗު ލިވަޕޫލުން ކާމިޔާބުކޮށްފައިވަނީ 1-0 އިންނެވެ.

މެޗުގެ ފުރަތަމަ ހާފުގައި ލިވަޕޫލްގެ ފަރާތުން ރަނގަޅު ހަމަލާތަކެއް އުފައްދާފައިވެއެވެ. ނަތީޖާއެއްގެ ގޮތުން މެޗުގެ ނުވަވަނަ މިނެޓުގައި އުފެއްދި ހަމަލާއެއްގައި ލިވަޕޫލުން ވަނީ މެޗުގައި އެ ޓީމުން ކާމިޔާބުކުރި ހަމައެކަނި ލަނޑު ޖަހައި މެޗުގެ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑިއޮގޯ ޖޮޓާއެވެ.

މެޗުގެ ދެވަނަ ހާފުގައި ވެސް ދެ ޓީމުގެ ފަރާތުން ފެނިގެންދިޔައީ ވަރަށް އެއްގޮތް ކުޅުމެވެ. މި ހާފުގައި ވެސް ލިވަޕޫލުން ނުރައްކާތެރި ހަމަލާތަކެއް އުފެއްދި ނަމަވެސް އެއިން އެއްވެސް ފުރުސަތެއް ނިންމައިނުލެވުމުގެ ނަތީޖާއަކަށް ވެގެންދިޔައީ ޕެލަސްއަށް ލިބޭ މަދު ފުރުސަތުތައް ނުރައްކާ ވެގެންދިއުމެވެ.

މި ކާމިޔާބީއާ އެކު ލިވަޕޫލް މިހާރު އޮތީ ކުޅުނު ހަތް މެޗުން ލިބިފައިވާ 18 ޕޮއިންޓާ އެކު ތާވަލުގެ އެއްވަނައިގައެވެ. ދެވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއާއި ތިންވަނައިގައި އޮތް އާސެނަލަށް ވެސް ލިބިފައިވަނީ 17 ޕޮއިންޓެވެ.

ޕެލަސް އޮތީ ތިން ޕޮއިންޓާ އެކު ތާވަލުގެ 18 ވަނައިގައެވެ.

މި މުބާރާތުގައި ލެސްޓާ ސިޓީއާއި ބޯންމޯތު ބައްދަލުކުރި މެޗު 1-0 އިން ކާމިޔާބުކޮށް، ލެސްޓާއިންވަނީ މި ސީޒަންގައި ޕްރިމިއާ ލީގުގައި ފުރަތަމަ ކާމިޔާބީ ހާސިލުކޮށްފައެވެ.

މެޗުގައި ލެސްޓާއިން ކާމިޔާބުކުރި ހަމައެކަނި ލަނޑު މެޗުގެ 16 ވަނަ މިނެޓުގައި ކާމިޔާބުކޮށްދިނީ ފަކުންޑޯ ބުއޮނަނޯޓޭއެވެ. މެޗުން ބަލިވި ނަމަވެސް ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބޯންމޯތުންނެވެ.

މި ކާމިޔާބީއާ އެކު ލެސްޓާ މިހާރު އޮތީ ހަ ޕޮއިންޓާ އެކު ތާވަލުގެ 15 ވަނައިގައެވެ. އަދި، ބޯންމޯތު އޮތީ އަށް ޕޮއިންޓާ އެކު 13 ވަނައިގައެވެ.