މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން މިދިޔަ ހަފުތާގައި އިއުލާންކުރި ބޭރު ފައިސާއާ ބެހޭ ގަވައިދާއި މަނީ އެކްސްޗޭންޖް ވިޔަފާރިއާ ބެހޭ ގަވައިދާއެކު، ފަތުރުވެރިކަމުގެ ދާއިރާގައި އިންވެސްޓަރުންގެ އިތުބާރު އިތުރުކުރެވޭނެ ކަމަށް އެ އޮތޯރިޓީގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
ސަންގެ 'އެޑިޓަރުގެ ސުވާލު' ޕްރޮގްރާމުގައި، ދެ ގަވައިދަށް ގެނައި ބަދަލުތަކާއެކު އިންވެސްޓަރުންނަށް ލިބިދާނެ ގެއްލުމަކާ ގުޅޭ ގޮތުން ސުވާލުކުރުމުން މުނައްވަރު ވިދާޅުވީ، އޭގެ ސަބަބުން އިންވެސްޓަރުންނަށް އެއްވެސް ގެއްލުމެއް ލިބޭނެ ކަމަށް ގަބޫލުނުކުރައްވާ ކަމަށެވެ.
އޭނާ ވިދާޅުވީ މިއީ ރާއްޖޭގައި އެތައް އަހަރުތަކެއް ވަންދެން އަމަލުކުރަމުން އައި ގޮތަށް ގެނައި ބަދަލެއް ކަމަށާއި ނަމަވެސް، މި ގަވައިދުތަކުގައިވާ ގޮތަށް ފައިސާ މާރުކުރުމަކީ ދުނިޔޭގެ އެހެން ގައުމުތަކުގައި އާ ކަމެއް ނޫން ކަމަށެވެ. އެގޮތުން ބޭރު ގައުމުތަކުގެ ފައިސާ، އަމިއްލަ ގައުމުގެ ފައިސާއަށް މާރުކޮށްގެން އެ ފައިސާއަށް ޑިމާންޑު އިތުރުކުރުމަކީ ކުރާ ކަމެއްކަން އޭނާ ފާހަގަކުރެއްވިއެވެ.
"އަޅުގަނޑުމެން މިސާލަކަށް ކޮންމެ ގައުމަކަށް ދިޔަ ކަމުގައިވީ ނަމަވެސް އަޅުގަނޑުމެން އެގައުމަށް ގޮސް އެގައުމެއްގެ ކަރެންސީ ނުވަތަ އެގައުމެއްގެ ފައިސާ މާރުކޮށްގެން ނޫންތޯ އަޅުގަނޑުމެން ބޭނުން ކުރަމުންދަނީ،" އޭނާ ވިދާޅުވިއެވެ.
މުނައްވަރު ވިދާޅުވި ގޮތުގައި، ރާއްޖޭގައި މިހާރު ފަތުރުވެރިކަމުގެ ދާއިރާއާއި ގައުމުގެ އިގުތިސާދު އޮތީ ވަކިވެފައެވެ. ނަމަވެސް ބޭރު ފައިސާއާ ބެހޭ ގަވައިދުން މި ދެ ދާއިރާ ގުޅުވައި ދޭނެ ކަމަށާއި އޭގެ ފައިދާ ފަތުރުވެރިކަމަށް ވެސް ކުރާނެ ކަމަށް އޭނާ ވިދާޅުވިއެވެ.
"މިސާލަކަށް 80 ވަރަކަށް ރިޒޯޓު މިހާރު އެބަހުރި ނެހެދި، އެ ރިޒޯޓުތަކަށް ލިބޭނެ ވޯކިން ކެޕިޓަލް ފައިސާ ވެސް ލިބިގެންދާނެ، ހަމަ އެގޮތަށް އެ ބޭނުންވާ އިތުރު އިންވެސްޓުމެންޓުތަކަށް ވެސް އިތުރު ފައިސާ ލިބިގެންދާނީ، އިތުރު ގްރޯތެއް އަންނާނީ ވެސް އަޅުގަނޑުމެންގެ ފައިނޭންޝަލް ސެކްޓާ ބޮޑުވެގެން ކަމަށް އަޅުގަނޑު ގަބޫލުރަނީ،" މުނައްވަރު ވިދާޅުވިއެވެ.
އޭނާ ވިދާޅުވީ ރާއްޖޭގައި އޮންޝޯ ސެކްޓާ ނުވަތަ ގައުމުގައި އުޅޭ މީހުންނަށް ދޭ މާލީ ޚިދުމަތްތަކުގެ އިތުރުން، ގައުމުގައި ދިރިނޫޅޭ މީހުންނަށް ޚިދުމަތްދޭ އޮފްޝޯ ސެކްޓާ ވެސް ތަރައްގީ ކުރަން ޖެހޭ ކަމަށެވެ.
"މިހާރު މިވާގޮތަކީ ރާއްޖޭގެ ފައިނޭންޝަލް ސެކްޓާ ބަލިކަށި ކަމުން ލޯނު މި ނަގަން ޖެހެނީ ސިންގަޕޫރުން ނުވަތަ ދުބާއީއިން، އެހެން ތަންތަނުން. އެއީ އަޅުގަނޑުމެންގެ ފައިނޭންޝަލް ސެކްޓާގައި ނެތް އެ ސްޓްރެންތެއް،" މުނައްވަރު ވިދާޅުވިއެވެ.
"އެހެންވީމަ އިންޓަނޭޝަނަލް ފައިނޭންސިން ސެންޓާތަކެއް އައިމަ ވާގޮތަކީ މި ތަންތަނަށް އަންނާނީ ވަރަށް ބޮޑެތި ހަމަ ވިޔަފާރި ކުރާ ބޭންކްސްތައް، އެ ބޭންކްސްތައް މެދުވެރިކޮށް އަޅުގަނޑުމެންގެ އިންޑަސްޓްރީއަށް ވެސް ފައިސާތަކެއް ވަދެގެން ދާނެ ގޮތަކީ އޭރުން."
އެއާއެކު ރާއްޖެއަށް އިތުރު އިންވެސްޓްމެންޓުތައް ވެސް ލިބޭނެ ކަމަށް ބެލެވޭ ކަމަށް އޭނާ ވިދާޅުވިއެވެ.
ފަތުރުވެރިންތަކެއް ތޮއްޑޫގައި: އެމްއެމްއޭގެ އާ ގަވައިދުގެ ދަށުން ރިޒޯޓުތަކާއި ގެސްޓްހައުސްތަކަށް ދާ ކޮންމެ ފަތުރުވެރިއަކަށް ވަކި އަދަދަކަށް ފައިސާ މާރުކުރަން ޖެހޭ -- ފޮޓޯ: ޓްވިޓާ
އެހެންވެ، މި ގަވައިދަށް ފުރަތަމަ އަމަލުކުރަން ފަށާއިރު ހިތްހަމަނުޖެހުންތަކެއް ހުރި ނަމަވެސް އިގުތިސާދަށް ކުރިއެރުންތައް ލިބި، ބޭރު ފައުސާގެ މައްސަލަ ހައްލުވާން ފެށުމުން އިންވެސްޓަރުންގެ އިތުބާރު ބޮޑުވާނެ ކަމަށް އޭނާ ވިދާޅުވިއެވެ. އަދި އިންވެސްޓަރުންގެ އިތުބާރާ ގުޅިފައިވާ ގައުމުގެ ކްރެޑިޓް ރޭޓިން މިފަހުން ދަށްކުރިކަން ފާހަގަކުރައްވައި މުނައްވަރު ވިދާޅުވީ އޭގެ އެންމެ ބޮޑު އެއް ސަބަބަކީ ދައުލަތުގެ ރިޒާވް ދަށްވުން ކަމަށެވެ.
"އަޅުގަނޑުމެންގެ ރިޒާވް ރަނގަޅު ކުރެވޭނެ ގޮތަކީ ކޮބައިތޯ؟ އަޅުގަނޑުމެންނަށް ބޭރު ފައިސާއިން އަޅުގަނޑުމެންނަށް މި ލިބޭ 4.5 ބިލިއަންގެ ތެރެއިން ކޮންމެވެސް މިންވަރެއް އަލުގަނޑުމެންގެ އިންޑަސްޓްރީއަށް ވަނީމަ. މިހާރު މި ވަންނަނީ އެންމެ 25 ޕަސެންޓް. އެހެންވީމަ އަދި މިއަށްވުރެ އިތުރުވާން ފެށީމަ، އަޅުގަނޑުމެންގެ ރިޒާވް އިތުރުވެގެންދާނެކަން އަޅުގަނޑު އެއްވެސް ޝައްކެއް ނުކުރަން،" އޭނާ ވިދާޅުވިއެވެ.
ރިޒާވް އިތުރުވުމުން، ރޭޓިން އިތުރުވާ ވަރަކަށް އިންވެސްޓަރުންގެ އިތުބާރު ވެސް އިތުރުވާނެ ކަމަށް މުނައްވަރު ވިދާޅުވިއެވެ.
ރާއްޖޭގެ ދަރަނި ބޮޑުވެފައިވާއިރު، ފައިސާ އަނބުރާ ދެއްކުމުގައި ހުރި ދަތިތައް ފާހަގަކޮށް މިދިޔަ މަހުގެ 11 ގައި ބައިނަލްއަގުވާމީ ކްރެޑިޓް ރޭޓިން އެޖެންސީ މޫޑީސްއިން ވަނީ ރާއްޖޭގެ ރޭޓިން 'ސީއޭއޭ2'އަށް ދަށްކޮށްފައެވެ. އޭގެ ކުރިން މިދިޔަ އޮގަސްޓު މަހުގއ 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.
ކްރެޑިޓް ރޭޓިންތައް ދަށްކުރުމުން، އިންވެސްޓަރުންގެ އިތުބާރު އަލުން ހޯދަން އަވަސް ފިޔަވަޅުތަކެއް އަޅަން ޖެހޭކަން އިދިކޮޅުން ފާހަގަކޮށްފައިވެއެވެ.
ރާއްޖެއަށް ޑޮލަރު ލިބުން ދަތިވެ، ތަކެތީގެ އަގު ވެސް އުފުލިފައިވާއިރު ސަރުކާރުން ވަނީ މިހާރު ދިމާވެގެން އުޅެނީ ވަގުތީ ކޭޝްފްލޯ މައްސަލައެއް ކަމަށާއި ރިސޯޓުތަކަށް ވަންނަ ފައިސާ ބޭންކިން ނިޒާމުގެ ތެރެއިން މާރުކުރުމުން ޑޮލަރުގެ ދަތިކަމުން އަރައިގަންނަން ވަރަށް ބޮޑު ލުޔެއް ލިބޭނެ ކަމަށް މީގެ ކުރިން ވެސް ބުނެފައެވެ.
އެމްއެމްއޭގެ ބޭރު ފައިސާއާ ބެހޭ އާ ގަވައިދުގައިވާ ގޮތުން، ފަތުރުވެރިކަމުގެ ދާއިރާއިން ލިބޭ ހުރިހާ އާމްދަނީއެއް ދިވެހި ބޭންކިން ސިސްޓަމަށް ޖަމާކުރަން މަޖުބޫރުވާނެއެވެ. އަދި ރިސޯޓުތަކަށް ކޮންމެ މަހަކު އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ޖެހެއެވެ.
އެ ގަވައިދުގެ ދަށުން ގެސްޓްހައުސްތަކުން ވެސް ފަތުރުވެރިއަކަށް 25 ޑޮލަރު މާރުކުރަންޖެހެއެވެ.