މަރުކަޒީ ބޭންކް، އެމްއެމްއޭއިން އެކުލަވައިލި ބޭރު ފައިސާއާ ބެހޭ އާ ގަވާއިދު ތަންފީޒުކުރަން ފެށުމުން މިހާރު ހުރި ޑޮލަރު ރޭޓު މަޑުމަޑުން ދަށްވާން ފަށާނެ ކަމަށް މަރުކަޒީ ބޭންކްގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
އެމްއެމްއޭއިން ވަނީ ބޭރު ފައިސާއާ ބެހޭ ގަވާއިދާއި މަނީ އެކްސްޗޭންޖްގެ ގަވާއިދަށް ބޮޑެތި ބަދަލުތަކެއް ގެނެސްފައެވެ.
ސަންގެ މި ހަފުތާގެ 'އެޑިޓަރުގެ ސުވާލު' ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކަފުޅުގައި މުނައްވަރު ވިދާޅުވީ، އާ ގަވާއިދާ އެކު އެމްއެމްއޭއަށް ލިބޭ ޑޮލަރު އިތުރުވާނެ ކަމަށެވެ. އެހެންވެ، އެ ކަމުގެ ސަބަބުން ޑޮލަރުގެ ރޭޓު ވެސް ދަށްވާނެ ކަމަށާއި ބޭރު ފައިސާ ދެވޭ މިންވަރު ވެސް އިތުރުކުރެވޭނެ ކަމަށް އޭނާ ވިދާޅުވިއެވެ.
"މިހާރު އަޅުގަނޑުމެންނަށް 25 އިންސައްތަ ލިބޭއިރު އެމްއެމްއޭގެ އިންޓަވެންޝަންއަށް ގެނެވެނީ ގާތްގަނޑަކަށް 300 ނުވަތަ 400 މިލިއަން ޑޮލަރު،" ގަވަރުނަރު ވިދާޅުވިއެވެ.
މުނައްވަރު ވިދާޅުވީ، ރާއްޖެއިން ބޭރަށް ފުރާ މީހުންނަށް ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ދެމުން އަންނަ 500 ޑޮލަރަކީ އެމްއެމްއޭއިން ދޭ އެއްޗެއް ކަމަށާއި މި ބަދަލާ އެކު އެ އަދަދު ވެސް އިތުރުކުރެވޭނެ ކަމަށް އަންދާޒާކުރެވޭ ކަމަށެވެ.
އޭނާ ވިދާޅުވީ، ރާއްޖެއަށް ޒިޔާރަތްކުރާ ކޮންމެ ފަތުރުވެރިއަކު 500 ޑޮލަރު މާރުކުރާ ނަމަ، އެ އަދަދު ދެގުނަ ކުރެވޭނެ ކަމަށް އެމްއެމްއޭގެ ހިސާބުތަކުން ދައްކާ ކަމަށެވެ.
އެޑިޓަރުގެ ސުވާލު ޕްރޮގްރާމްގެ ތެރެއިން ގަވަރުނަރު އަދި ޑެޕިއުޓީ ގަވަރުނަރާ އެކު ސަންގެ މެނޭޖިން އެޑިޓަރު އަހުމަދު ސާއިލް އަލީ: ގަވަރުނަރު ވިދާޅުވީ، އާ ބަދަލާ އެކު ޑޮލަރު ރޭޓު މަޑުމަޑުން ދަށްވާނެ ކަމަށް -- ސަން ފޮޓޯ
ފަތުރުވެރިން ރާއްޖެއަށް ޒިޔާރަތްކުރާ އަދަދު އިތުރުވަމުން އަންނައިރު، ސަރުކާރުން ވަނީ މި އަހަރުގެ ނިޔަލަށް ދެ މިލިއަން ފަތުރުވެރިން ގެނައުމުގެ އަމާޒެއް ކަނޑައަޅައިފައެވެ.
"އެމްއެމްއޭއަށް މިހާރު 500 ޑޮލަރު ދެވޭކަމުގައި ވާނަމަ، ރާއްޖެއަށް އަންނަ ކޮންމެ ފަތުރުވެރިއަކު 500 ޑޮލަރު މާރުކުރާނަމަ އެއަށް ވުރެ އިތުރެއް ނުންތޯ ވާނީ. އަޅުގަނޑު ގަބޫލުކުރަނީ 500 ޑޮލަރު އިތުރަށް ވެސް ދެވޭނޭ،" ގަވަރުނަރު ވިދާޅުވިއެވެ.
"އަޅުގަނޑުމެންގެ ހިސާބުތަކުން ދައްކާ ގޮތުން ވެއްޖިއްޔާ އަޅުގަނޑުމެންގެ އިންޓަވެންޝަން ކެޕޭސިޓީ ޑަބަލް ކުރެވޭނެ،"
މީގެ އިތުރުން، ގަވަރުނަރު ވިދާޅުވީ ދިވެހި ރުފިޔާ މާކެޓުގައި ގިނަވެ، ޑޮލަރަށް އޮތް ޑިމާންޑް ބޮޑުވުމުގެ ސަބަބުން ބީއެމްއެލްގެ ރުފިޔާ ކާޑުތަކަށް ދެމުން އަންނަ ޑޮލަރުގެ ޚިދުމަތް ވެސް އޮތީ ހުއްޓައިލާ ހިސާބުގައި ކަމަށެވެ. އެކަމަކު، އާ ގަވާއިދާ އެކު އެ ޚިދުމަތްތައް ދޭން ފަސޭހަވާނެ ކަމަށް އޭނާ ވިދާޅުވިއެވެ.
ގަވަރުނަރު ވިދާޅުވީ، އެމްއެމްއޭއިން ކުރާ ކަމަކީ ނުރަސްމީކޮށް ހިނގަމުން އައި ޑޮލަރު މާރުކުރުމުގެ ވިޔަފާރި ރަސްމީކޮށް ބޭންކިން ނިޒާމުގެ ތެރެއަށް ވެއްދުން ކަމަށެވެ. އެހެންވެ، އެ ބަދަލު ރަނގަޅަށް ތަންފީޒުކުރަން ފެށުމުން ޑޮލަރު ރޭޓު ވެސް ދަށްވާނެ ކަމަށް އޭނާ ވިދާޅުވިއެވެ.
ބޭރު ފައިސާ ލިބުން ދަތިވެ، ރަސްމީ ޑޮލަރު ރޭޓަކީ 15.42 ރުފިޔާ ނަމަވެސް މިހާރު ޑޮލަރު ރޭޓު ހުރީ 18 ރުފިޔާއިން މަތީގައެވެ.
މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ތަފާސްހިސާބުތަކުން ދައްކާ ގޮތުގައި، ފާއިތުވީ ފަސް އަހަރު، ފަތުރުވެރިކަމުން އަހަރަކު ގާތްގަނޑަކަށް ހަތަރު ބިލިއަނެއްހާ ޑޮލަރު ލިބުނެވެ.
އެމްއެމްއޭއިން ގެނައި ބަދަލާ އެކު ފަތުރުވެރިކަމުގެ ދާއިރާއިން ލިބޭ ހުރިހާ އާމްދަނީއެއް ދިވެހި ބޭންކިން ސިސްޓަމަށް ޖަމާކުރަން މަޖުބޫރުވާނެއެވެ.
އެ ގަވާއިދުގައި ވާގޮތުން، ރިސޯޓުތަކަށް ކޮންމެ މަހަކު އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ޖެހެއެވެ. އަދި، ގެސްޓްހައުސްތަކުން ފަތުރުވެރިއަކަށް 25 ޑޮލަރު މާރުކުރަންޖެހެއެވެ.