މެމޮރީ ޗިޕް އަދި ސްމާޓްފޯނު އުފައްދާ ދުނިޔޭގެ އެންމެ ބޮޑު ކުންފުނި ސެމްސަންގް އިލެކްޓްރޯނިކްސްއިން އެކި ގައުމުތަކުގައި ތިބި އެތައްހާސް މުވައްޒަފުން ވަޒީފާއިން ވަކިކުރަން ނިންމާފައިވާ ކަމަށް ރޮއިޓާސްއިން ރިޕޯޓު ކޮށްފިއެވެ.
ރޮއިޓާސްއިން ބުނީ މި ކުންފުނިން މުވައްޒަފުން މަދުކުރުމުގެ މަސައްކަތް ފަށާފައިވަނީ ދެކުނު އޭޝިއާ، އޮސްޓްރޭލިއާ އަދި ނިއުޒީލަންޑުގެ ސަރަހައްދުތަކުން ކަމަށެވެ. ބައެއް ސަރަހައްދުތަކުގައި މުވައްޒަފުންގެ 10 އިންސައްތަ ވަޒީފާއިން ވަކިކޮށްފާނެ ކަމަށް ވެސް ވަނީ ބުނެފައެވެ.
ސެމްސަންގްގެ އެންމެ ފަހުގެ ރިޕޯޓުތަކުން ދައްކާގޮތުގައި މި ކުންފުނީގައި މަސައްކަތްކުރަނީ ޖުމުލަ 267,800 މުވައްޒަފުންނެވެ. މީގެ ތެރެއިން 147,000 މުވައްޒަފުން މަސައްކަތްކުރަނީ ކުންފުނީގެ މައި އޮފީސް ހުންނަ ދެކުނު ކޮރެއާއިން ބޭރުގައެވެ. ނަމަވެސް ކުންފުނިން ބުނެފައިވަނީ ދެކުނު ކޮރެއާގައި މުވައްޒަފުން ވަކިކުރުމުގެ ރޭވުމެއް ނެތް ކަމަށެވެ.
މި ކުންފުނިން މުވައްޒަފުން ވަކިކުރަން ނިންމާފައިވަނީ ކުންފުނީގެ ހިއްސާގެ އަގު 20 އިންސައްތައަށް ވުރެ ބޮޑަށް ދަށްވެ، މުހިންމު ބާޒާރުތަކުގައި ކުންފުނި ދަށަށް ދިޔުމާ ގުޅިގެންނެވެ. ޚާއްޞަކޮށް އާޓިފިޝަލް އިންޓެލިޖެންސް (އޭއައި)އަށް ބޭނުންކުރާ މެމޮރީ ޗިޕްސް އުފެއްދުމުގައި ސެމްސަންގް ވަނީ އެސްކޭ ހައިނިކްސްއާ ވާދަކުރުމުގައި ފަހަތަށް ޖެހިފައެވެ.
ސެމްސަންގްގެ ފަރާތުން ބުނެފައިވަނީ ބައެއް ބޭރު ގައުމުތަކުގެ ސަބްސިޑަރީތަކުން ހިންގުން ހަރުދަނާކުރުމަށް އާންމު ގޮތެއްގައި ކުރާ މަސައްކަތްތަކެއް ކުރަމުންދާ ކަމަށެވެ. އަދި ވަކި މަގާމުތަކަކަށް އަމާޒުކޮށްގެން މުވައްޒަފުން ވަކިކުރުމުގެ އަދަދެއް ކަނޑައަޅާފައި ނުވާ ކަމަށް ވެސް ކުންފުނިން ބުނެފައިވެއެވެ.