ރައްޔިތަކު ފުލުހެއް ކައިރިއަށް ކަމަކު އަތުވެއްޖެނަމަ، އެމީހަކު މާޔޫސްނުކުރުމަށް ޕޮލިސް ކޮމިޝަނަރު އަލީ ޝުޖާއު އެދިވަޑައިގެންފިއެވެ.
ސީޕީ ޝުޖާއު ހއ. އަތޮޅަށް ކުރައްވާ ރަސްމީ ދަތުރުފުޅުގެ ތެރެއިން އިއްޔެ ވަނީ ދިއްދޫއާއި ކެލާ އަދި އުތީމަށް ޒިޔާރަތްކުރައްވާފައެވެ.
މި ޒިޔާރަތުގެ ތެރެއިން ސީޕީ ވަނީ އެރަށްރަށުގެ ކައުންސިލް މެމްބަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި އެރަށްތަކުގައި މަސައްކަތް ކުރާ ފުލުހުންނާ ބައްދަލުކުރެއްވާފައެވެ.
ސީޕީ ހއ. އަތޮޅަށް ކުރައްވާ ރަސްމީ ދަތުރުފުޅުގެ ތެރެއިން: ސީޕީ ވަނީ ރައްޔިތަކު ފުލުހެއް ކައިރިއަށް ކަމަކު އަތުވެއްޖެ ނަމަ މާޔޫސްކޮށްނުލުމަށް --- ފޮޓޯ/ ފުލުހުން
ފުލުހުންނާ އެކު ކުރިއަށް ގެންދިޔަ ބައްދަލުވުންތަކުގައި ޝުޖާއު އެދިވަޑައިގަތީ ރައްޔިތުން ބޭނުމެއް ޖެހިގެން ފުލުހުން ކައިރިއަށް އައިސްފިނަމަ އެ ރައްޔިތަކު މާޔޫސްކޮށް ނުލުމަށެވެ. ރައްޔިތުންނާ ބައްދަލުވެ، ކަންބޮޑުވުންތައް އޮޅުންފިލުވައި، ރައްޔިތުންނާ ގާތުން ފުލުހުންގެ ޚިދުމަތް ފޯރުކޮށްދިނުމަށް ސީޕީ ވަނީ އެދިވަޑައިގެންފައެވެ.
ޝުޖާއު ވަނީ ރަށްރަށުގެ ތަރައްގީގެ މަސައްކަތްތަކުގައި ފުލުހުންގެ ދައުރު މުހިންމުކަން ވެސް ފާހަގަކުރައްވާފައެވެ.
ފުލުހުންގެ ޚިދުމަތުން ބުނީ، މި ދަތުރުފުޅުގެ މަގުސަދަކީ ރަށްރަށުގެ ކުށުގެ ހާލަތާއި ރައްޔިތުންގެ ކަންބޮޑުވުންތައް ދެނެގަނެ، އެކަންކަން ހައްލުކުރުމަށް ކުރެވިދާނެ މަސައްކަތްތަކާ ގުޅޭގޮތުން މަޝްވަރާ ކުރުން ކަމަށެވެ.
ސީޕީގެ މި ދަތުރުފުޅުގެ ތެރެއިން ހއ. އަތޮޅުގެ އިތުރު ރަށްތަކަށް ވަޑައިގެންނެވުމަށް ހަމަޖެހިފައިވާ ކަމަށް ފުލުހުންގެ އިދާރާއިން ބުނެފައިވެއެވެ.