މާލެ ސަރަޙައްދަށް ދިމާވެފައި އޮތް ޕާކިންގެ މައްސަލައާއިއެކު އުޅަނދުތައް ތޮއްޖެހުމުގެ މައްސަލަ ހައްލުކުރުމަށްޓަކައި ހުޅުމާލޭގައި 4،000 ޕާކިން ޔުނިޓު އެޅުމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އާ މިއަދު ހަވާލުކޮށްފިއެވެ.
ޕާކިން ޔުނިޓުތައް އެޅުމަށް އެޗްޑީސީއާ، ޓްރާންސްޕޯޓް މިނިސްޓްރީން ހަވާލުކުރީ މިއަދު އެކަމަށްޓަކައި ބޭއްވި ރަސްމިއްޔާތެއްގައެވެ. ޓްރާންސްޕޯޓް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރު މުހައްމަދު އަމީނެވެ. އަދި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ފަޒުލް ރަޝީދެވެ.
އެޗްޑީސީއާ އެ މަސައްކަތް ހަވާލުކުރައްވާ ވާހަކަދައްކަވަމުން މިނިސްޓަރު އަމީން ވިދާޅުވީ ޕާކިން ބިލްޑިންތައް އެޅުމަކީ މާލެއާއި ހުޅުމާލެ ދިމާވެފައި އޮތް އެންމެ ބޮޑު އެއް މައްސަލަ ހައްލުކުރުމަށްޓަކައި މި ސަރުކާރުން ކުރަން ނިންމި އެންމެ މުހިންމު، އެންމެ ބޮޑު އެއް މަސައްކަތް ކަމަށެވެ.
ހުޅުމާލޭގައި 4،000 ޕާކިން ޔުނިޓު އެޅުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި މިނިސްޓަރު އަމީން ވާހަކަދައްކަވަނީ -- ސަން ފޮޓޯ/ އަމަން ލަތީފް
މިހާރުވެސް މާލޭގައި ވެހިކަލްތައް ޕާކުކުރާނެ ޖާގައެއް ނެތި، ވަކިން ޚާއްސަކޮށް ގަރާޖެއް ބޭނުންވާ ފަރާތްތައް ވެސް ގިނަކަން ފާހަގަކުރެއްވިއެވެ.
ގަރާޒުތައް ބޭނުންވާ ފަރާތްތަކަށް ޕާކިން ޔުނިޓުތައް އެޅުނީމަ އެ މައްސަލައަށް ހައްލެއް ލިބޭނެ. ގަރާޖު ހުރިކަމަށް ރެޖިސްޓާކޮށްގެން މާލޭގައި ވަރަށް ގިނަ އުޅަނދު އެބަހުރި. އެ އުޅަނދުތައް ވެސް އެކި ތަންތާ ޕާކުކޮށްފަ ހުއްޓާ ނަގާނަމަ އުނދަގޫތަކެއް ވާނެ ވެހިކަލް ގެންގުޅޭ ފަރާތްތަކަށް ވެސް، ޓްރާންސްޕޯޓް މިނިސްޓަރު މުހައްމަދު އަމީން
މިނިސްޓަރު ވިދާޅުވީ މިގޮތުން އާދަޔާ ޚިލާފަށް އުޅަނދު ގިނަވެފައި އޮތީ ގާނޫނާ ގަވާއިދާ ޚިލާފަށް، އެހެން ޒޯނުތަކުގައި ވެސް ރެޖިސްޓާކޮށްފައި ހުރި ވެހިކަލްތައް ވެސް މާލެ ސަރަހައްދުގައި ދުއްވާތީ ކަމަށެވެ.
އެހެން ނަމަވެސް ޓޯކުރުމުގެ ބަދަލުގައި އެޗްޑީސީއާ ގުޅިގެން ހުޅުމާލެ ފޭސް ދެއަކަށް އެފަދަ ވެހިކަލްތައް ގެނެސް ޕާކުކުރަން ބިމެއް ހަމަޖެއްސިކަން މިނިސްޓަރު ފާހަގަ ކުރެއްވެވިއެވެ. އަދި ގާނޫނާ އެއްގޮތަށް ރެޖިސްޓާކުރަން ފުރުސަތު ދެއްވި ކަމަށް ވެސް މިނިސްޓަރު ވިދާޅުވިއެވެ.
ހުޅުމާލޭގައި 4،000 ޕާކިން ޔުނިޓު އެޅުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން -- ސަން ފޮޓޯ/ އަމަން ލަތީފް
މިނިސްޓަރު ވިދާޅުވީ މިހާރުވެސް 300-400 ވެހިކަލް އެތަނުގައި ޕާކުކުރާ ކަމަށެވެ.
ޕާކިން ބިލްޑިންތައް އަޅާ ނިމުނީމަ އެ ޕާކިން ބިލްޑިންގަ ގާނޫނުގެ ތެރެއިން ރެޖިސްޓްރީ ކުރެވޭނެ ވެހިކަލްތަކަށް. މިވަގުތު ވަރަށް ގިނަ ފަރާތްތަކަށް ދަތިވެފައި އޮތް ކަމެއް މީ. ގެދޮރުގެ ދަތިކަމާ ހުރެ ވެސް ގަރާޖެއް ނުލިބޭ މާލޭގައި، ޓްރާންސްޕޯޓް މިނިސްޓަރު މުހައްމަދު އަމީން
އެ އެއްބަސްވުމުގެ ދަށުން އެޗްޑީސީން 4،000 ޕާކިން ޔުނިޓު އެޅުމުގެ މަސައްކަތް ފަށާނެއެވެ. އޭގެ ތެރެއިން 10 ޕަސެންޓް ޔުނިޓްތަކަކީ ވަގުތީ ގޮތުން ޕާކް ކުރަން ދޫކުރާ ޔުނިޓްތަކެވެ. ބާކީ ހުރި ޔުނިޓްތައް ގަންނަ ފަރާތްތަކަށް ވިއްކައި، އެ ޔުނިޓްތައް ރަޖިސްޓަރީ ކޮށްދޭން ވަނީ ނިންމާފައެވެ.
މި ބިލްޑިންތަކުގައި އިލެކްޓްރިކް ވެހިކަލް ޗާޖް ވެސް ކުރެވޭއިރު އެތަނުގައި ބޭނުންކުރާ ހަކަތަ އުފެއްދުމަށް ނިންމާފައިވަނީ އިއާދަކުރެނިވި ހަކަތަ ބޭނުން ކޮށްގެންނެވެ. އަދި އެ ބިލްޑިންތަކުގެ ޓެރަސް ވިޔަފާރި ބޭނުންތަކަށް ކުއްޔަށް ދިނުމަށް ނިންމާފައިވެއެވެ. އެގޮތުން ކެފޭ، ރެސްޓޯރެންޓު އަދި ސްޕޯޓްސް އެރީނާތައް ފަދަ ތަންތަން ހިންގަން ޖާގަ ދޭނެއެވެ.
ފަޒުލް ވިދާޅުވި ގޮތުގައި އެންމެ ގިނަވެގެން ދެ އަހަރާއި ތިން އަހަރާ ދޭތެރޭ ޕާކިން ބިލްޑިންތައް ނިންމާނެއެވެ. އަދި އެ މުއްދަތުގައި ޕާކިން މައްސަލައަށް ހައްލެއް ހޯދޭނެ ކަމަށް އުއްމީދު ކުރައްވާ ކަމަށް ވެސް މީގެ ކުރިން އޭނާ ވިދާޅުވިއެވެ.