ބޭރު ފައިސާގެ މައްސަލަ ހައްލުކުރަން މި ސަރުކާރުން އެކުލަވައިލި އާ ގަވާއިދުގެ ދަށުން ބޭރު ފައިސާ ގަނެވިއްކުމުގެ ވިޔަފާރިކުރުމުގެ ލައިސަންސަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
"މަނީ އެކްސްޗޭންޖިން ވިޔަފާރިއާ ބެހޭ ގަވާއިދު"ގެ ދަށުން ދެ ބާވަތެއްގެ މަނީ އެކްސްޗޭންޖް ލައިސަންސް ދޫކުރެއެވެ. އެއީ, 'ޓިއާ 1' މަނީ އެކްސްޗޭންޖިން ލައިސަންސާއި 'ޓިއާ 2' މަނީ އެކްސްޗޭންޖިން ލައިސަންސެވެ.
- ޓިއާ 1 މަނީ އެކްސްޗޭންޖިން ލައިސަންސް: ބޭރު ފައިސާ ގަތުމާއި ވިއްކުމުގެ ލައިސަންސް
- ޓިއާ 2 މަނީ އެކްސްޗޭންޖިން ލައިސަންސް: ބޭރު ފައިސާ ވިއްކުމުގެ ލައިސަންސް
މަރުކަޒީ ބޭންކު، އެމްއެމްއޭއިން ބުނީ އެމްއެމްއޭއިން ދޫކުރާ ލައިސަންސެއް ލިބިގެން ބޭރު ފައިސާ ގަނެވިއްކުމުގެ ވިޔަފާރި ކުރާ ފަރާތްތަކުން، އާ ގަވައިދުގެ ދަށުން ލައިސަންސަށް އެދި ހުށަހަޅާ ހުށަހެޅުމަށް ވަކި ގޮތެއް ނިންމަންދެން މިހާރު ދޫކޮށްފައިވާ ލައިސަންސްގެ ދަށުން ވިޔަފާރި ކުރިއަށް ގެންދެވޭނެ ކަމަށެވެ. އަދި, އާ ގަވައިދަށް އަމަލުކުރަން ފަށާ ތާރީޚުން ފެށިގެން ދެ މަސް ތެރޭގައި ޓިއާ 1 ނުވަތަ ޓިއާ 2 ލައިސަންސަށް އެދެން ޖެހޭނެ ކަމަށް އެމްއެމްއޭއިން ބުންޏެވެ.
އެހެން ނޫން ނަމަ އާ ގަވަައިދަށް އަމަލުކުރަން ފަށާތާ ދެ މަސް ތެރޭ މިހާރު ދޫކޮށްފައިވާ ލައިސަންސް ބާތިލު ވާނެ ކަމަށް ބުންޏެވެ.
ލައިސަން އާ ކުރަން ހުށަހަޅާނީ އެ ކަމަށް ޚާއްސަ ޕޯޓަލް މެދުވެރިކޮށް ފޯމު ހުށަހަޅައިގެންނެވެ.
އެމްއެމްއޭއިން ބުނި ގޮތުގައި އާ ލައިސަންސް ދޫކުރާނީ ޖުމްލަ 50 ފަރާތަށް ވުރެ އިތުރު ނުވާނެހެންނެވެ. އަލަށް ލައިސަންސްއަށް އެދޭ މީހުންގެ އަދަދު އެއަށްވުރެ އިތުުރުވާނަމަ، ލައިސަންސް ދޭނީ ޝަރުތު ހަމަވާ މީހުންގެ މެދުގައި ގުރުއަތު ނަގައިގެން ކަމަށް ވެސް އެމްއެމްއޭއިން ބުންޏެވެ.
ޓިއާ 1 ލައިސަންސް ދޫކުރާނީ ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމަށް އުފައްދާފައިވާ ކުންފުނިތަކަށެވެ. މި ކުންފުނީގެ ވެރިފަރާތަކަށް ވާންޖެހޭނީ ދިވެހި ރައްޔިތެކެވެ. މި ލައިސަންސް ދޫކުރާނީ ފަސް އަހަރުގެ މުއްދަތަކަށެވެ. އަދި، ލައިސަންސް ދޫކުރަނީ ބޭރު ފައިސާ ގަތުމާއި ވިއްކުމުގެ ވިޔަފާރިއަށް ރާއްޖޭގައި ތަނެއް ގާއިމުކޮށް އެ ތަނުގައި ވިޔަފާރި ހިންގާ ގޮތަށެވެ.
މި ލައިސަންސަށް އެދި ހުށަހަޅާއިރު އެޕްލިކޭޝަން ފީގެ ގޮތުގައި 20،000 ރުފިޔާ ދައްކަން ޖެހޭނެކަމަށް ގަވާއިދުގައި ވެއެވެ. އަދި، ލައިސަންސް އާކުރުމަށް އެދި ހުށަހަޅާއިރު 10،000 ރުފިޔާ ހުށަހަޅަންޖެހޭނެއެވެ.
މި ގަވައިދުގައިވާ ގޮތުން ޓިއާ 2 ލައިސަންސް ދޫކުރާނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ލިބިފައިވާ ނުވަތަ ލައިސެންސް ލިބިފައިވާ ކުންފުނިތަކަށެވެ.
މި ލައިސަންސުގެ މުއްދަތަކީ ޓޫރިސްޓު ރިސޯޓު ހިންގަން ލިބިފައިވާ ހުއްދަ ނުވަތަ ލައިސަންސްގެ މުއްދަތެވެ. މި ފަރާތްތަކުން ފައިސާ ވިއްކުމުގެ މުއާމަލާތް ކުރަންވާނީ ބޭންކަކާ އެކު ނުވަތަ ޓީއާ 1 ލައިސަންސް އޮންނަ ފަރާތަކާ އެކުއެވެ.
ޓިއާ 2 ލައިސަންސަށް އެދި ހުށަހަޅާއިރު 1300 ޑޮލަރު ދައްކަން ޖެހޭނެއެވެ. އަދި ލައިސަންސް އާކުރުމަށް އެދި ހުށަހަޅާއިރު 650 ޑޮލަރު ދައްކަން ޖެހޭނެކަމަށް ގަވާއިދުގައި ވެއެވެ.