މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ކުއްލި ގޮތަކަށް ތަންފީޒުކުރަން ފަށައިފައިވާ ބޭރު ފައިސާއާ ބެހޭ ގަވާއިދުގެ ސަބަބުން ރާއްޖެއަށް އޮތް އިތުބާރު ކުޑަވެ، އިންވެސްޓްމެންޓުތައް މަދުވާނެ ކަމަށް ޑެސްޓިނޭޝަން ފިއުޗާ ޖަމިއްޔާއިން ބުނެފިއެވެ.
ދެމެހެއްޓެނިވި ގޮތެއްގައި ފަތުރުވެރިކަމުގެ ދާއިރާ ކުރިއެރުވުމަށް، މި ސިނާއަތުގައި ޝާމިލްވާ ފަރާތްތަކާ ގުޅިގެން މަސައްކަތްކުރާ ޑެސްޓިނޭޝަން ފިއުޗާއިން ވަނީ، ބޭރު ފައިސާއާ ބެހޭ ގަވައިދާއި ޓެކްސްތައް އިތުރުކުރުމާ ގުޅޭ ކަންބޮޑުވުންތައް ރައީސް ޑރ. މުޙައްމަދު މުއިއްޒާ ސިޓީއެއް މެދުވެރިކޮށް ހިއްސާކޮށްފައެވެ.
އެ ސިޓީގައިވަނީ، އެ ބަދަލުތައް ގެންނަނީ ދިވެހި ރައްޔިތުންނަށް ފައިދާ ހުރި ގޮތްތަކެއް ހޯދުމުގެ ގޮތުން ކަމުގައިވީ ނަމަވެސް އޭގެ ސަބަބުން ކުދި ވިޔަފާރިތަކުން ފެށިގެން ބޮޑެތި ކުންފުނިތަކަށް ވެސް ލިބޭނެ ގެއްލުންމާ މެދު ކަންބޮޑުވާ ކަމަށެވެ.
އެ ޖަމިއްޔާއިން ބުނީ، ފަތުރުވެރިކަމުގެ ދާއިރާއާ ގުޅުންހުރި ސިޔާސަތުތަކަށް ގެންނަ މިފަދަ ކުއްލި ބަދަލުތަކުގެ ސަބަބުން ވިޔަފާރިތަކަށް އެވަގުތު ގެއްލުންވުމުގެ އިތުރަށް ދިގު މުއްދަތަށް ބަލާއިރު، ރާއްޖެއަށް އިތުބާރު ގެއްލި، ރާއްޖެއިންނާއި ރާއްޖެއިން ބޭރުން ވެސް މި ދާއިރާއަށް އިންވެސްޓް ކުރަން ބޭނުންވާ ފަރާތްތައް އެކަމަށް ފަސްޖެހޭނެ ކަމަށެވެ.
މީގެ އިތުރުން މި ބަދަލުތައް ގެނައުމުގައި މި ސިނާއަތުގައި ޝާމިލްވާ ފަރާތްތަކާ އެކަށީގެންވާ ވަރަށް މަޝްވަރާކޮށްފައިނުވާ ކަމުގެ ކަންބޮޑުވުން ވެސް ޑެސްޓިއުނޭޝަން ފިއުޗާއިން ފާޅުކުރިއެވެ. އެގޮތުން މިފަދަ ބޮޑެތި ނިންމުންތައް ނިންމާއިރު، އޭގެ ސަބަބުން ލިބިދާނެ ހުރިހާ ގެއްލުމެއް ރަނގަޅަށް ދިރާސާކޮށް، ގެއްލުންތައް ކުޑަކުރަން ގުޅިގެން މަޝްވަރާކުރަން ޖެހޭކަން އެ ޖަމިއްޔާއިން ފާހަގަކުރިއެވެ.
"އެފަދަ މަޝްވަރާއާ ނުލައި ފިޔަވަޅު އެޅުމުން، އެއީ ހެޔޮ ނިޔަތެއްގައި އެޅި ފިޔަވަޅުތަކެއް ނަމަވެސް ފައިދާއަށްވުރެ ގެއްލުން ބޮޑުވެދާނެ ފަދަ ފިޔަވަޅުތަކެއް މިވަނީ އެޅިފައި،" ސިޓީގައިވެއެވެ.
އެހެންވެ، އެ ޖަމިއްޔާއިން ވަނީ މި ސިޔާސަތުތައް މުރާޖާކޮށް، އިގުތިސާދާ ގުޅުންހުރި ފިޔަވަޅުތައް އެޅުމުގައި ކަމާ ގުޅުންހުރި ފަރާތްތަކުގެ ބައިވެރިވުން އިތުރުކުރުމަށް ގޮވައިލައިފައެވެ. އަދި އެފަދަ ގޮތަކަށް ކުރިއަށް ދިޔުމުން، ގައުމުގެ އެންމެ ބޮޑު ސިނާއަތުގެ ކުރިއެރުމަށް ނުރައްކާ ނުވާނެ ފަދަ ގޮތަކަށް ސަރުކާރުގެ އަމާޒުތަކަށް ވެސް ވާސިލުވެވޭނެ ކަމަށް އެ ޖަމިއްޔާއިން ބުންޏެވެ.
އެމްއެމްއޭއިން މިދިޔަ އޮކްޓޯބަރު މަހުގެ އެއް ވަނަ ދުވަހުގެ ރޭ ގެޒެޓުކުރި ގަވައިދުގައި ވަނީ ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއަކަށް ވަކި ރޭޓަކުން ރާއްޖޭގެ ބޭންކަކުން ޑޮލަރު މާރުކުރުން ލާޒިމުކޮށްފައެވެ.
އެ ގަވައިދުގެ ދަށުން، ރިސޯޓުތަކަށް ކޮންމެ މަހަކު އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ޖެހެއެވެ. އަދި ގެސްޓްހައުސްތަކުން ފަތުރުވެރިއަކަށް 25 ޑޮލަރު މާރުކުރަންޖެހެއެވެ.
އެ ގަވައިދާ ގުޅޭ ގޮތުން ރިޒޯޓުތަކާއި ގެސްޓްހައުސްތައް ހިންގާ ފަރާތްތަކުން ވެސް އަންނަނީ ކަންބޮޑުވުން ފާޅުކުރަމުންނެވެ.
މި ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ޑރ. މުޙައްމަދު މުއިއްޒު ވަނީ އެ ބަދަލުތަކާއެކު އިގުތިސާދަށް ހެޔޮ އަސަރުތައް ކުރާނެ ކަމަށާއި ގަވާއިދު ބަދަލު ނުކުރާނެ ކަމަށް ވިދާޅުވެފައެވެ.