މަރުކަޒީ ބޭންކު (އެމްއެމްއޭ)ގެ މުވައްޒަފެއްގެ ޒާތީ މައުލޫމާތު ލީކުވި މައްސަލައެއް ބަލަމުން އަންނަ ކަމަށް އެ އޮތޯރިޓީން ބުނެފިއެވެ.
އެމްއެމްއޭގެ އިސް މުވައްޒަފެއްގެ ޒާތީ މައުލޫމާތުތަކެއް މި ހަފުތާގެ ތެރޭގައި ސޯޝަލް މީޑިއާގައި ވަނީ އާންމުކޮށްފައެވެ. އޭގެ ތެރޭގައި އެ މުވައްޒަފާ ގުޅުންހުރި، އެ އޮތޯރިޓީގެ ނިންމުމެއް ކަމަށް ބުނާ ނިންމުމަކާ ބެހޭ ލިޔެކިޔުން ވެސް އާންމުކޮށްފައިވެއެވެ.
އެ މައްސަލައާ ގުޅިގެން އެމްއެމްއޭއިން މިއަދު "ސަން"އަށް މައުލޫމާތު ދެމުން ބުނީ އެ އޮތޯރިޓީގެ މުވައްޒަފުންގެ ޒާތީ މައުލޫމާތު ރައްކާތެރިކުރަން ބޭނުންވާ ކަމަށެވެ.
އެހެންވެ، އެ މައުލޫމާތު ލީކުވި މައްސަލަ މިހާރު އެ އޮތޯރެޓީގެ އިންޓާނަލް އޮޑިޓުން ބަލަމުން އަންނަ ކަމަށާއި މިކަމާ ގުޅޭ ބައެއް ކަންކަމުގައި ފުލުހުންގެ ފަންނީ އެހީތެރިކަން ވެސް ހޯދާފައި ވާކަމަށް އެ އޮތޯރިޓީން ބުންޏެވެ.