ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުން ބޭރު ފައިސާއާބެހޭ އާ ގަވާއިދުގެ ދަށުން އެ ވިޔަފާރިތައް އެމްއެމްއޭގައި ރެޖިސްޓްރީ ކުރުމަށް މަރުކަޒީ ބޭންކު، އެމްއެމްއޭއިން ހުޅުވާލައިފިއެވެ.
ފޮރިން އެކްސްޗޭންޖް ރޭޓްގެ ނިޒާމު ތަންފީޒުކުރުމަށްޓަކައި ދިވެހިރާއްޖޭގައި ބޭރު ފައިސާއިން ކުރެވޭ މުޢާމަލާތްތައް ކަނޑައެޅުމާއި ފޮރިން އެކްސްޗޭންޖް ރޭޓާބެހޭ އެހެނިހެން ސިޔާސަތުތައް ކަނޑައެޅުމެގެ ގަވާއިދު ގެޒެޓުކޮށް، އެއަށް އަމަލުކުރަން ފެށީ އިއްޔެއިން ފެށިގެންނެވެ.
އެމްއެމްއޭއިން މިއަދު ކުރި އިއުލާނެއްގައިވަނީ ޓޫރިޒަމް ދާއިރާގެ މުދާ ވިއްކާ ފަރާތްތަކާއި، ޚިދުމަތް ފޯރުކޮށްދޭ ފަރާތްތަކުގެ ގޮތުގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގައި ރެޖިސްޓްރީކޮށްފައިވާ ހުރިހާ ފަރާތްތަކުން މި ހިނގާ އޮކްޓޫބަރުގެ ނިޔަލަށް، އެ އޮތޯރިޓީގެ ރިޕޯޓިން ރިކުއާމެންޓެއްގެ ގޮތުގައި އެކުލަވާލާފައިވާ "މޯލްޑިވްސް މަނިޓަރީ އޮތޯރިޓީ އެފްއެކްސް ޕޯޓަލް ރެޖިސްޓްރޭޝަން ފޯމް" މެދުވެރިކޮށް ރެޖިސްޓްރީ ކުރުމަށް އެދިފައެވެ.
އެމްއެމްއޭއިން ބުނީ، މި ގަވާއިދަށް އަމަލު ކުރަން ފަށާ ދުވަހުގެ ފަހުން މީރާގައި ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ފޯރު ކޮށްދޭ ފަރާތްތަކުގެ ގޮތުގައި ރަޖިސްޓްރީ ކުރާ ފަރާތްތަކުން، މީރާގައި ރަޖިސްޓްރީ ކުރާތާ 30 ދުވަހުގެ ތެރޭގައި އެ އޮތޯރިޓީގައި ރަޖިސްޓްރީ ކުރަންވާނެ ކަމަށެވެ.
މިފަދަ ކަންކަމަކީ ދިވެހިރާއްޖޭގެ ފޮރިން އެކްސްޗޭންޖް މާކެޓް އިތުރަށް ފުޅާ ކުރުމަށާއި ފޮރިން އެކްސްޗޭންޖް ސިޔާސަތުތައް ފުރިހަމައަށް ތަންފީޒު ކުރުމަށް މުހިންމު ކަމަކަށްވާތީ، ހުރިހާ ފަރާތްތަކުން ވެސް މި ކަމަށް އެއްބާރުލުން ދިނުމަށް އެމްއެމްއޭއިން އެދެއެވެ.
އެ އޮތޯރިޓީންވަނީ މި ކަަމާ ގުޅޭގޮތުން އިތުރު މަޢުލޫމާތު ބޭނުންފުޅު ނަމަ، 3012121 ނަންބަރަށް ރަސްމީ ގަޑީގައި ގުޅުއްވުމަށް، ނުވަތަ އީމެއިލްއަށް އީމެއިލް ކުރެއްވުމަށް އެދިފައެވެ.