ސިނާއީ ބޭނުމަށް ހުޅުމާލޭގެ ދެވަނަ ފިޔަވަހިން ބީލަމުގެ އުސޫލުން ބިން ވިއްކުމަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ން ހުޅުވާލައިފިއެވެ.
އެ ކުންފުނިން ބީލަމުގެ އުސޫލުން ވިއްކާ ހުޅުމާލޭ ބިންތަކުގެ ތެރޭގައި ހިމެނެނީ، ހުޅުމާލޭ ދެވަނަ ފިޔަވަހިން ވިއްކާ، 3,689 އަކަފޫޓާއި 3,746 އަކަފޫޓާ ދެމެދުގެ 12 ބިމެކެވެ.
އަދި މި ބިންތައް ވިއްކަން ހުޅުވާލާފައި ވަނީ ހަމައެކަނި ދިވެހީންނަށް ކުރިމަތިލެވޭ ގޮތަށެވެ. އެގޮތުން އުމުރުން 18 އަހަރު ވެފައިވާ ކޮންމެ ދިވެހި ރައްޔިތަކަށް ވެސް ބީލަން ހުށަހެޅޭނެ ކަމަށް އެ ކުންފުނިން ވަނީ ބުނެފައެވެ.
އެޗްޑީސީއިން ވަނީ ބީލަން ހުށަހަޅަނީ ކުންފުންޏަކުންނަމަ، އެ ކުންފުންޏަކީ ރާއްޖޭގައި ރަޖިސްޓްރީ ކޮށްފައިވާ 100 ޕަސަންޓު ދިވެހިންގެ ހިއްސާ އޮންނަ ކުންފުންޏެއް ކަމުގައި ވާން ޖެހޭނެ ކަމަށް ވެސް ބުނެފައެވެ.
އެގޮތުން ބިން ވިއްކުން ކުރިއަށް ގެންދާނީ ދެ މަރުހަލާ އަކަށް ބަހާލައިގެން ކަމަށާއި ފުރަތަމަ މަރުހަލާ އަކީ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުން ކަމަށް އެ ކުންފުނިން ވަނީ ބުނެފައެވެ.
އަދި ދެވަނަ މަރުހަލާއަކީ ގަންނަން ކަނޑައަޅާފައިވާ ބިމަށް އެއް ފަރާތަށް ވުރެ ގިނަ ފަރާތުން އީއޯއައި ހުށަހަޅާފައި ވާނަމަ ބިޑް ކުރުން ކަމަށް ވެސް ވަނީ ބުނެފައެވެ.
އެ ކުންފުނިން ބުނީ ބިންތަކުގެ ބީލަން ފެށޭ އަގަކީ އަކަފޫޓަކަށް 7،500 ރުފިޔާ ކަމަށެވެ. އަދި ކޮންމެ ފަރާތަކަށް ވެސް ޖުމުލަ ތިން ބިން ގަނެވޭނެ ކަމަށް ވަނީ ބުނެފައެވެ.
އެޗްޑީސީއިން ބުނީ ބީލަންތައް ކުރިއަށްގެންދިއުމަށް ހަމަޖެހިފައި ވަނީ އެ ކޯޕަރޭޝަންގެ އޮންލައިން ބިޑް ޕޯޓަލް މެދުވެރިކޮށް ކަމަށެވެ.
އެގޮތުން، މިހާރު ވިއްކުމަށް ހުޅުވާލާފައިވާ ބިންތަކުގެ މައުލޫމާތު ބިޑް ޕޯޓަލް މެދުވެރިކޮށް ލިބެން ހުންނާނެ ކަމަަށާއި މިކަމާ ގުޅޭ އިތުރު މައުލޫމާތު އެ ކޯޕަރޭޝަނުގެ ހޮޓްލައިން ނަންބަރު 1516އަށް ގުޅައިގެން ސާފުކުރެވޭނެ ކަމަށް ވެސް ވަނީ ބުނެފައެވެ.