އިންޑިއާއިން ގެންނަ ބޭސްތަކުގެ ތެރެއިން، ބޭހުގެ ކޮލެޓީގައި މައްސަލަ އުޅޭކަން ފާހަގަކުރެވުނު ބޭހުގެ އެއްވެސް ބެޗެއް ރާއްޖެއަށް އިމްޕޯޓު ކޮށްފައި ނުވާކަމަށް މޯލްޑިވްސް ފުޑް އެންޑް ޑްރަގް އޮތޯރެޓީ (އެމްއެފްޑީއޭ)އިން ބުނެފިއެވެ.
މިކަމާއި ގުޅުވާ އެ އޮތޯތެޓީން ނެރެފައިވާ ބަޔާނުގައި ވަނީ އިންޑިއާގެ އެކި ކުންފުނިތަކުން އުފައްދާފައިވާ 16 ބޭހަކުން ކޮލެޓީގެ މައްސަލަތައް ފާހަގަކުރެވިފައި ވާތީ އެ ގައުމުގެ ބޭސް ރެގިއުލޭޓްކުރާ މައި އިދާރާ ސީޑީއެސްސީއޯއިން އެލާޓު ނެރެފައި ވާކަމަށެވެ.
އަދި މި އެލާޓާ ގުޅިގެން ރާއްޖޭގެ މާކެޓުގައާއި އެޕްރޫވް ކޮށްފައިވާ ޑްރަގް ލިސްޓުގައި އެ ބޭސްތައް ހިމެނޭތޯ ބެލުމަށް އެ އޮތޯރެޓީގެ ފަރާތުން ގިނަ މަސައްކަތްތަކެއް ކޮށް މާކެޓް އިވެލުވޭޝަންތަކެއް ހަދާފައި ވާކަމަށް ވަނީ ބުނެފައެވެ.
އެގޮތުން ބެލި ބެލުމުން އެ ލިސްޓުގައި ހިމެނޭ އެއްވެސް ބޭހެއްގެ އެއްވެސް ބެޗެއް ބޭސް އެތެރެކުރުމުގެ އެއްވެސް އުސޫލެއްގެ ދަށުން ރާއްޖެއަށް އިމްޕޯޓު ކޮށްފައި ނުވާކަން އެ އޮތޯރެޓީއަށް ޔަގީންކުރެވިފައި ވާކަމަށް ވެސް އެ ބަޔާނުގައި ވަނީ ބުނެފައެވެ.
ނަމަވެސް އިންޑިއާއަކީ ގިނަ އަދަދެއްގެ ދިވެހީން ބޭސްފަރުވާއަށް ގޮސްއުޅޭ ގައުމަކަށް ވުމުން ބައެއް ހާލަތްތަކުގައި އަމިއްލަ ބޭނުމަށް ބޭސް އެތެރެކުރާތީ އެކަމަށް ސަމާލުވުމަށް އެމްްއެފްޑީއޭއިން ވަނީ އާންމުންނަށް އިލްތިމާސްކޮށްފައެވެ.
އެ އޮތޯރެޓީއިން ސަމާލުވުމަށް އަންގާފައި ހުރި ބައެއް ބޭސްތަކުގެ ތެރޭގައި:
* ފަލްމޮސިލް
* ޑިފްލެޒާކޯޓް ޓެބްލެޓް
* ތެލްމާ އެޗް
* އުރިސޮކޮލް 300
* ޕެންޓޯސިޑް
ރައްކާތެރިކަމުގެ ފިޔަވަޅެއްގެ ގޮތުން ރާއްޖެއަށް ބޭސް އެތެރެކުރާ ޕޯޓުތަކުގެ އިންސްޕެކްޝަންތައް އިތުރަށް ވަރުގަދަކޮށް އެފަދަ ބޭސްތައް އެތެރެވިޔަ ނުދިނުމަށް ކުރަންޖެހޭ އެންމެހާ މަސައްކަތްތައް ކުރަމުންދާކަމުގެ ފުރިހަމަ ޔަގީންކަން އެ އޮތޯރެޓީން ވަނީ ދީފައެވެ.
އަދި އެކަމާ ގުޅޭ އިތުރު މައުލޫމާތު ބޭނުންވާނަމަ އެ އޮތޯރިޓީގެ ހޮޓްލައިން ނަމްބަރު 7200321އަށް ގުޅުއްވާ މައުލޫމާތު ސާފުކުމަށް ވެސް އެ އޮތޯރިޓީން ވަނީ އެދިފައެވެ.