މާދަމާއިން ފެށިގެން ސިޔާސީ ޕާޓިތަކުގެ ދަފުތަރުން ވަކިވާން އޮންލައިންކޮށް ހުށަހަޅަން ޖެހޭ ގޮތަށް އިލެކްޝަން ކޮމިޝަން (އީސީ)އިން ބަދަލުކޮށްފިއެވެ.
އީސީން މިއަދު ބުނީ، ސިޔާސީ ޕާޓީތަކުގެ ދަފުތަރުން ވަކިވާން މާދަމާއިން ފެށިގެން ހުށަހަޅަން ޖެހޭނީ އެ ކޮމިޝަންގެ ޕޯޓަލް މެދުވެރިކޮށް ކަމަށެވެ.
އެ ކޮމިޝަނުން މިދިޔަ މަހުގެ ތެރޭގައި ވަނީ ސިޔާސީ ޕާޓީ ބަދަލުކުރުމާއި ވަކިވާން ފަސޭހައިން ހުށަހެޅޭ ގޮތަށް ސިޔާސީ ޕާޓީގެ ގަވާއިދު އިސްލާހުކޮށްފައެވެ.
އެ ގަވާއިދުގައިވާ ގޮތުން ޕާޓީއެއްގެ މެންބަރަކު އެ ޕާޓީއަކުން ވަކިވާން އެދިއްޖެ ނަމަ، ލަސްވެގެން 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭންޖެހޭނެއެވެ.
ސިޔާސީ ޕާޓީގެ ގަވާއިދަށް ގެނައި ނުވަވަނަ އިސްލާހުގައިވާ ގޮތުން، ޕާޓީއަށް ހުށަހަޅައިގެން 14 ދުވަހުގެ ތެރޭގައި ޕާޓީން ވަކިނުކޮށްފިނަމަ ނަމަ، އީސީން ކަނޑައަޅާ ނިޒާމުގެ ތެރެއިން ހުށަހެޅުމުން، އެ މީހެއްގެ ނަން ޕާޓީގެ ދަފުތަރުން އުނިކޮށްދޭން ވާނެއެވެ.
އަދި ޕާޓީއެއްގެ މެންބަރަކު ސިޔާސީ ޕާޓީއެއްގައި އުޅުން މަނާ މަގާމަކަށް ކުރިމަތިލުމަށް ނުވަތަ އެ މީހަކަށް ނޭނގި ޕާޓީއެއްގައި ރަޖިސްޓްރީކޮށްގެން، ޕާޓީން ވަގުތުން ވަކިވާން އެދި އިލެކްޝަންސް ކޮމިޝަނުން ކަނޑައަޅާ ނިޒާމުގެ ތެރެއިން ހުށަހެޅުމުން ވެސް، ޕާޓީގެ ދަފުތަރުން ވަގުތުން އުނިކޮށްދޭންވާނެ ކަމަށް ބަޔާންކޮށްފައިވެއެވެ.