ސިޔާސީ ޕާޓީ ބަދަލުކުރުމާއި ވަކިވާން އިލެކްޝަންސް ކޮމިޝަން (އީސީ)އަށް ފަސޭހައިން ހުށަހެޅޭނެ ގޮތަށް ސިޔާސީ ޕާޓީގެ ގަވާއިދު އިސްލާހުކޮށްފިއެވެ.
އެ ގަވާއިދުގައިވާ ގޮތުން ޕާޓީއެއްގެ މެންބަރަކު އެ ޕާޓީއަކުން ވަކިވާން އެދިއްޖެ ނަމަ، ލަސްވެގެން 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭންޖެހޭނެއެވެ.
ސިޔާސީ ޕާޓީގެ ގަވާއިދަށް ގެނައި ނުވަވަނަ އިސްލާހުގައިވާ ގޮތުން، ޕާޓީއަށް ހުށަހަޅައިގެން 14 ދުވަހުގެ ތެރޭގައި ޕާޓީން ވަކިކޮށްނުދީފި ނަމަ، އިލެކްޝަންސް ކޮމިޝަން (އީސީ)ން ކަނޑައަޅާ ނިޒާމުގެ ތެރެއިން ހުށަހެޅުމުން، އެ މީހެއްގެ ނަން ޕާޓީގެ ދަފުތަރުން އުނިކޮށްދޭން ވާނެއެވެ.
އަދި ޕާޓީއެއްގެ މެންބަރަކު ސިޔާސީ ޕާޓީއެއްގައި އުޅުން މަނާ މަގާމަކަށް ކުރިމަތިލުމަށް ނުވަތަ އެ މީހަކަށް ނޭނގި ޕާޓީއެއްގައި ރަޖިސްޓްރީކޮށްގެން، ޕާޓީން ވަގުތުން ވަކިވާން އެދި އިލެކްޝަންސް ކޮމިޝަނުން ކަނޑައަޅާ ނިޒާމުގެ ތެރެއިން ހުށަހެޅުމުން ވެސް، ޕާޓީގެ ދަފުތަރުން ވަގުތުން އުނިކޮށްދޭންވާނެ ކަމަށް ބަޔާންކޮށްފައިވެއެވެ.
މީގެ އިތުރުން، ކުރިން ހުރި ޕާޓީއަށް ނޭނގި އެހެން ޕާޓީއަކަށް ބަދަލުކޮށްފައިވާނަމަ، ކުރިން ހުރި ޕާޓީއަށް ބަދަލުވުމަށް ހުށަހެޅުމުން، ނޭނގި ރެޖިސްޓާކޮށްފައި އޮތް ޕާޓީން ވަގުތުން ވަކިކޮށް، ކުރިން ހުރި ސިޔާސީ ޕާޓީއަށް ރުޖޫއަކޮށްދޭންޖެހޭނެ ކަމަށް ވެސް އެ އިސްލާހުގައި ބުނެފައިވެއެވެ.
ސިޔާސީ ޕާޓީއެއްގެ މެންބަރަކު ޕާޓީން ވަކިވުމަށް އެދިއްޖެ ނަމަ، ލަސްވެގެން 14 ދުވަހުގެ ތެރޭގައި އެކަން ކޮށްދޭންވާނެ ކަމަށް މީގެ ކުރިން ވެސް އެ ގާނޫނުގައި ބުނެފައި އޮވެއެވެ. އެހެން ނަމަވެސް އޭރު، 14 ދުވަހުގެ ތެރޭގައި ޕާޓީން ވަކިވާން އެދޭ މީހާ ވަކިކޮށްނުދީފި ނަމަ، އޮންނަނީ އެ ކަން ބަޔާންކޮށް ޖަދުވަލު ހައެއްގައިވާ ފޯމު އިލެކްޝަންސް ކޮމިޝަނަށް ހުށަހެޅުމުން އެ ކޮމިޝަނުން އެ މީހެއްގެ ނަން ޕާޓީ ދަފުތަރުން އުނިކޮށްދޭންވާނެ ކަމަށެވެ.
ސިޔާސީ ޕާޓީތަކަށް ވަންނަ މީހުން ޕާޓީތަކުން ވަކިވާން ބޭނުންވާ ނަމަ، ޕާޓީން ވަކިވުމަށް ހުށަހަޅާތާ 14 ދުވަހުގެ ތެރޭގައި ޕާޓީ ދަފްތަރުން އުނިނުކޮށްދީފި ނަމަ، އަމިއްލައަށް އިސީއަށް ހުށަހަޅައިގެން ވަކިވެވޭނެއެވެ. އެ ގޮތަށް ޕާޓީން ވަކިވާން އެދޭއިރު، ސިޔާސީ ޕާޓީއަށް ފޮނުވި ސިޓީގެ ކޮޕީއާއި އެ މައުލޫމާތު ވެސް އީސީއަށް ހުށަޅަންޖެހެއެވެ.