ރާއްޖެއަށް ވަންނަ ބޭރު ފައިސާއާ ބެހޭ ގަވާއިދު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އެކުލަވައިލީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ހުށަހެޅުންތަކަށް އިޖާބަ ނުދީ ކަމަށް އެ ޖަމިއްޔާއިން މިއަދު ބުނެފިއެވެ.
އެމްއެމްއޭއިން ރޭ ގެޒެޓުކުރި ގަވައިދާ ގުޅޭ ގޮތުން މަޓީން ނެރުނު ނޫސްބަޔާނެއްގައި ބުނީ، ބޭރު ފަައިސާއާ ބެހޭ ގަވައިދާއި މަނީ ޗޭންޖިން ވިޔަފާރީއާ ބެހޭ ގަވައިދު އެކުލަވައިލައިފައިވަނީ ސްޓޭކްހޯލްޑަރުންނާ މަޝްވަރާކުރުމަށް ފަހު ކަމަށް އެމްއެމްއޭއިން ބުނި ނަމަވެސް، އެކަން ހިނގައިފައި ވަނީ އެގޮތަށް ނޫން ކަމަށެވެ.
މަޓީން ބުނީ، އެ ގަވައިދު އެކުލަވާލުމާ ގުޅޭ ގޮތުން އެމްއެމްއޭގެ އެދުމަށް މަޓީން އެ އޮތޯރިޓީއާ ބައްދަލު ކުރި ކަމަށާއި ނަމަވެސް ބޭރު ފައިސާއާ ބެހޭ އައު ގަވައިދުގައި ހިމެނުމަށް އެމްއެމްއޭއިން ހުށަހެޅި ހުށަހެޅުންތަކަކީ އެ ޖަމިއްޔާއަށް އެއްބަސްވެވޭނެ ކަންތައްތަކެއް ނޫންކަން އެންގި ކަމަށެވެ.
"ގަވައިދު ގެޒެޓުކުރެވުނުއިރު، މި ޖަމްއިއްޔާގެ ފަރާތުން ހުށަހެޅު އެއްވެސް ކަންބޮޑުވުމަކަށް އެމްއެމްއޭގެ ފަރާތުން އިޖާބަ ދެއްވާފައި ނުވާކަން ފާހަގަކުރަމެވެ." ބަޔާނުގައިވެއެވެ.
އެހެންނަމަވެސް، ގައުމަށް ދިމާވާ ކޮންމެ ކަމެއްގައި ވެސް މަޓީން އަބަދުވެސް އެއްބާރުލުން ދިނުމުގައި ދެމިއޮންނާނެ ކަމަށް އެ ޖަމިއްޔާއިން ބުނެފައިވެއެވެ.
އެމްއެމްއޭއިން ގެޒެޓުކުރި ބޭރު ފައިސާއާ ބެހޭ ގަވައިދުގައި ވަނީ ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއަކަށް ވަކި ރޭޓަކުން ރާއްޖޭގެ ބޭންކަކުން ޑޮލަރު މާރުކުރަންޖެހޭ ކަމަށް ބަޔާންކޮށްފައެވެ.
އެ ގަވާއިދުގައި ވާގޮތުން، ކެޓަގަރީ އޭގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނުން ކޮންމެ މަހެއްގެތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެމަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު އެ މަހަށްފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ވާނެއެވެ.
އަދި ކެޓަގަރީ ބީގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނުން ވެސް މިފަދައިން ޑޮލަރު މާރުކުރަން ޖެހެއެވެ. ނަމަވެސް، މި ކެޓަގަރީން މާރުކުރަން ޖެހެނީ 25 ޑޮލަރެވެ.
އޭ ކެޓަގަރީގައި ހިމެނެނީ ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ރާއްޖޭގައި ހިންގާ ޓޫރިސްޓު ރިސޯޓުތަކާއި އިންޓަގްރޭޓެޑް ޓޫރިސްޓު ރިޒޯޓުތަކާއި ރިޒޯޓު ހޮޓާތަކެވެ.
ބީ ކެޓަގަރީގައި ހިމެނެނީ ގްރީންޓެކްސް ދައްކަންޖެހޭ ޓޫރިސްޓު ގެސްޓްހައުސް ތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުގެތެރެއިން 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓްރީކޮށްފައިވާ ތަންތަނެވެ.
އެ ގަވައިދުގެ ސަބަބުން ރާއްޖޭގައި ދައުރުކުރާ ޑޮލަރު އިތުރުވާނެ ނަމަވެސް، ކޮންމެ ފަތުރުވެރިއަކަށް ޑޮލަރު މާރުކުރަން ޖެހުމަކީ ގެސްޓްހައުސްތައް ފަދަ ވިޔަފާރިތަކަށް ގެއްލުންވާނެ ކަމެއް ކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ.