ރާއްޖޭގައި މެރިކަލްޗާ ދާއިރާ ފުޅާކުރަން ހަތަރު ޒޯނެއް ތަރައްގީކުރަން ސަރުކާރުން ނިންމައިފިއެވެ.
ފިޝަރީޒް މިނިސްޓްރީން ބުނީ، މިދިޔަ ހޯމަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި، ރާއްޖޭގެ އިގުތިސާދު ފުޅާކޮށް ސިންދަފާތުކުރުމަށް ކަނޑުގެ ވަސީލަތްތަކުން ލިބޭ ނަފާ އިތުރުކުރުމުގެ ގޮތުން ކުރެވިދާނެ ކަންތައްތަކާ ބެހޭ ގޮތުން މަޝްވަރާކުރި ކަމަށެވެ.
އެގޮތުން، ކުރިއަށް ގެންދާނެ ކަންތައްތަކެއް ނިންމާފައިވާ ކަމަށާއި، އެ ކަންތައްތައް ނިންމާފައިވަނީ އެ މިނިސްޓްރީއިން ހުށަހެޅި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށް ފަހު ކަމަށް ބުންޏެވެ.
އެ ބައްދަލުވުމުގައި، ރާއްޖޭގައި މެރިކަލްޗާގެ ވިޔަފާރިތައް ގާއިމުކުރުމަށްޓަކައި ހެޗަރީތައް ބިނާކުރުމާއި، ހެޗަރީގައި އުފައްދާ ބާވަތްތައް މޫދުގެ މާހައުލުގައި ބޮޑުކުރުމަށް ނިންމިއެވެ. އެގޮތުން، ފޮރިން އިންވެސްޓްމަންޓްތައް ހިމެނޭގޮތަށް އާންމުކޮށް ހުޅުވާލައިގެން ވަކި ޒޯނުތަކެއް މެރިކަލްޗާ ތަރައްގީކުރާ ޒޯންތަކެއްގެ ގޮތުގައި ކަނޑައެޅުމަށް ނިންމާފައިވާ ކަމަށް އެ މިނިސްޓްރީން ބުންޏެވެ.
އެގޮތުން ކަނޑައެޅި ހަތަރު ޒޯނަކީ:
- ބޮޑުތިލަދުންމަތި (ހދ. އަދި ށ. އަތޮޅު)
- މާޅޮސްމަޑުލު އުތުރުބުރީ (ރ. އަތޮޅު)
- މުލަކަތޮޅު (މ. އަތޮޅު)
- ކޮޅުމަޑުލު (ތ. އަތޮޅު)
މީގެ އިތުރުން ވެސް މާލެއަތޮޅު ދެކުނުން، ވާދޫ ކަނޑުއޮޅިން ފެށިގެން ގާތްގަނޑަކަށް ހަތް ކިލޯމީޓަރު ދެކުނުން އޮތް 73 ހެކްޓަރުގެ ފަރުގެ ސަރަޙައްދަކީ، ކޮމާޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ޚާއްސަކުރެވޭ މޫދުކޮށީގެ ސަރަޙައްދެއްގެ ގޮތުގައި ކަނޑައެޅުމަށް ނިންމާފައިވާ ކަމަށް މިނިސްޓްރީން ބުންޏެވެ.
އަދި، މެރިކަލްޗާ ކުރުމަށް ކަނޑައަޅާ ޒޯނުތައް ކުއްޔަށް ދިނުމުގައި އަމަލުކުރާނެ އުސޫލުތަކެއް ކަނޑައެޅުން މީގެ ތެރޭގައި ހިމެނޭ ކަމަށް ރައީސް އޮފީހާ ހަވާލާދީ އެ މިނިސްޓްރީން ވަނީ ބުނެފައެވެ.