ހުޅުމާލޭ ތިންވަނަ ފިޔަވަހީގައި ގަވައިދާ ޚިލާފަށް ބަހައްޓާފައި ހުރި ތަކެތި ނަގަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އަނެއްކާވެސް އަންގައިފިއެވެ.
ހުޅުމާލޭ ދެވަނަ ފިޔަވަހީގެ ޗެނަލް ޕްރޮޖެކްޓް 02 ފެށުމަށް ހަމަޖެހިފައިވާ ސަރަހައްދު ހުސްކުރުމަށް، ދެވަނަ އަދި ތިންވަނަ ފިޔަވަހީގެ ހުސް ބިންތަކުގައި ގަވާއިދާ ޚިލާފަށް ބަހައްޓާފައި ހުރި ތަކެތި ނެގުމަށް މިދިޔަ މެއި މަހުގެ އަށެއްގައި ވެސް އެޗްޑީސީން އިއުލާންކުރިއެވެ. ނަމަވެސް، ގިނަ ފަރާތްތަކުން އެކަމަށް އިޖާބަދީފައިނުވާ ކަމަށް އެޗްޑީސީން ބުންޏެވެ.
ހުޅުމާލޭ ތިންވަނަ ފިޔަވަހީގެ ހުސް ބިންތަކުގައި ގަވައިދާ ޚިލާފަށް މުދަލާއި ތަކެތި ބަހައްޓައި، ބައެއް ފަރާތްތަކުން އަދިވެސް އެ ބިންތައް ބޭނުންކުރާކަން އެ ކޯޕަރޭޝަނުން ފާހަގަކުރިއެވެ.
އެހެންވެ، އެ ތަކެތި މިމަހުގެ 11ގެ ކުރިން ނެގުމަށް އެޗްޑީސީން ވަނީ އެދިފައެވެ.
"ދެންނެވުނު މުއްދަތުގެ ތެރޭގައި އެތަކެތި ނަގާފައި ނުވާނަމަ، އެތަކެއްޗަކީ ވެރިފަރާތްތަކުން ބޭނުން ނެތިގެން ދޫކޮއްލާފައިވާ ތަކެތި ކަމުގައި ބަލައި، މި ކޯޕަރޭޝަނުން އެފަދަ ތަކެއްޗާމެދު އަމަލުކުރުމަށް ހަމަޖެހިފައިވާ ގޮތުގެ މަތިން އަމަލު ކުރެވޭނެއެވެ." އެޗްޑީސީގެ އިއުލާނުގައިވެއެވެ.
އެ މަސައްކަތުގެ ތެރޭގައި މުދަލަށް ނުވަތަ ތަކެއްޗަށް ލިބިދާނެ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށް ވެސް އެޗްޑީސީން ފާހަގަކުރިއެވެ.
ހުޅުމާލެ ތިން ވަނަ ފިޔަވަހި ހިއްކުމުގެ މަސައްކަތްތައް ކުރަމުން އަންނައިރު، އެ ބިން ބޭނުންކުރަން ކުރީ ސަރުކާރުން ރާވައިފައި ވަނީ މާލޭ ރައްޔިތުންނަށް ގޯތި ދިނުމަށެވެ.