އެޕަލްއިން މުވައްޒަފުންގެ ހައްގުތައް ގަވާއިދާ ޚިލާފަށް ހަނިކުރާ ކަމަށް އެމެރިކާގެ ލޭބާ ބޯޑުން ތުހުމަތުކޮށްފިއެވެ.
އެމެރިކާގެ ނެޝަނަލް ލޭބާ ރިލޭޝަންސް ބޯޑުން (އެންއެލްއާރުބީ)ން ވަނީ އެޕަލް އިން މުވައްޒަފުންގެ ހައްގުތައް ހަނިކުރާ ގަވާއިދުތަކެއް ގެންގުޅޭ ކަމަށް ބުނެ، ޝަކުވާއެއް ހުށަހަޅާފައެވެ. މި ޝަކުވާގައި ބުނެފައިވަނީ އެޕަލްއިން މުވައްޒަފުން ޖަމާޢަތްތަކަށް ނިސްބަތްކުރުމާއި، ވަޒީފާގެ މާޙައުލު ރަނގަޅުކުރުމަށް މަސައްކަތްކުރުމުގެ ހައްގުތައް ހަނިކޮށްފައިވާ ކަމަށެވެ.
އެންއެލްއާރުބީން ހުށަހެޅި ޝަކުވާގައި ތުހުމަތުކޮށްފައިވާ ގޮތުގައި އެޕަލްއިން މުވައްޒަފުންގެ އަތުން ގާނޫނާ ޚިލާފު ސިއްރު ހިފެހެއްޓުމުގެ އެއްބަސްވުންތަކާއި، މަޢުލޫމާތު ހާމަނުކުރުމުގެ އެއްބަސްވުންތަކާއި، އަދި މަސައްކަތުގެ ވާދަވެރިކަން ހުއްޓުވުމުގެ އެއްބަސްވުންތަކުގައި ސޮއިކުރުވާފައިވެއެވެ.
އޭގެ އިތުރުން ވެސް މުވައްޒަފުންގެ ސުލޫކާއި ސޯޝަލް މީޑިއާ ބޭނުންކުރުމާ ގުޅޭ ގޮތުން ހައްދުފަހަނައަޅާފައިވާ ސިޔާސަތުތަކެއް ވެސް އެޕަލްއިން ގެންގުޅެއެވެ.
މިއީ ވަޒީފާއާ ބެހޭ ފެޑެރަލް ގާނޫނުގެ ދަށުން މުވައްޒަފުންނަށް ލިބިދޭ ހައްގުތަކަށް "އަރައިގަތުމާއި، ހުރަސްއެޅުމާއި، އަދި މަޖުބޫރުކުރުން" ކަމަށް އެންއެލްއާރުބީން ތުހުމަތުކޮށްފައިވެއެވެ.
އެޕަލްއިން މިހާތަނަށް މި މައްސަލައާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ.
އެހެންނަމަވެސް، މި މައްސަލަ ހައްލުނުވެއްޖެނަމަ، އިދާރީ ފަނޑިޔާރެއްގެ ކުރިމަތީގައި ޖެނުއަރީ މަހު އަޑުއެހުންތަކެއް ބާއްވާނެއެވެ.
އެންއެލްއާރުބީން މަސައްކަތްކުރަނީ އެޕަލްއިން މި ގަވާއިދުތައް ބާޠިލުކޮށް، މުވައްޒަފުންގެ ގާނޫނީ ހައްގުތަކާ ބެހޭ ގޮތުން މުވައްޒަފުން ހޭލުންތެރިކުރުވާ އެ މައުލޫމާތުތައް އެންގުމަށް މަޖުބޫރުކުރުވުމަށެވެ.
މި މައްސަލަ ފެށިފައިވަނީ 2021 ގައި އެޕަލްގެ ކުރީގެ ސީނިއާ އިންޖިނިއަރިން މެނޭޖަރެއް ކަމަށްވާ އެޝްލީ ގްޖޯވިކް ހުށަހެޅި ޝަކުވާއަކާ ގުޅިގެންނެވެ.
ގްޖޯވިކް ބުނެފައިވަނީ ސިއްރު ހިފެހެއްޓުމާއި ސޯޝަލް މީޑިއާ ބޭނުންކުރުމާ ގުޅޭ އެޕަލްގެ ގަވާއިދުތަކުގެ ސަބަބުން މުސާރައިގެ ހަމަހަމަކަމާއި ޖިންސީ ތަފާތުކުރުން ފަދަ މައްސަލަތަކާ ބެހޭ ގޮތުން މުވައްޒަފުންނަށް މަޝްވަރާކުރުމަށާއި މީޑިއާއަށް މަޢުލޫމާތު ދިނުމަށް ހުރަސްއެޅޭ ކަމަށެވެ.