ބޮލީވުޑްގެ ކުރީގެ މަޝްހޫރު އެކްޓަރު ގޯވިންދާ ހަށިރައްކަލަކަށް ގެންގުޅުނު ފިސްތޯލަ ސާފުކުރުކުރުމުގެ ތެރޭ އޮޅިގެން އެއަށް ފިތި، އޭނާއަށް އަނިޔާވެއްޖެއެވެ.
ގޯވިންދާ ފިސްތޯލަ ގެންގުޅެނީ އިންޑިއާގެ ކަމާބެހޭ އިދާރާއިން ޚާއްސަ ހުއްދައެއް ނަގައިގެންނެވެ.
ފިލްމީ ޚަބަރުތަކުގައި ބުނެފައިވާ ގޮތުން އެކްޓަރަށް އަނިޔާވެފައިވަނީ ފިސްތޯލަ ސާފުކުރުމުގެ ތެރޭ ގޯވިންދާގެ އަތުން އެ ކައްސާލައިގެން ވެއްޓުނު ގަޑީގައެވެ. ފިސްތޯލައަށް ފިތުނު ގަޑީގައި ވަޒަން ގޯވިންދާގެ ކަކުލަށް އަރާފައިވާއިރު ޒަޚަމުތަކާ އެކު ވަރަށް ބޮޑަށް އެކްޓަރަށް އަނިޔާވެފައިވާ ކަމަށް ރިޕޯޓުތައް ބުނެއެވެ.
ރޭ ފަތިހުގެ ވަގުތެއްގައި މި ހާދިސާ ހިނގާފައިވަނީ މުމްބާއީގެ ޖުހޫގައި ހުންނަ ގޯވިންދާ ދިރިއުޅޭ ގޭގައެވެ.
މި ހާދިސާ ހިނގާފައިވަނީ އިންޑިއާގެ ކޮލްކަތާގައި އޮންނަ ރަސްމިއްޔާތެއްގައި ބައިވެރިވުމަށް އެކްޓަރު ފުރަން ތައްޔާރުވަމުން ދަނިކޮށެވެ. ކުއްލި ގޮތަކަށް ދިމާވި މި ހާދިސާއާ ގުޅިގެން ގޯވިންދާ ވަނީ އަނދޭރީ ވެސްޓުގައި ހުންނަ ކްރިޓިކެއާ އޭޝިއާ ހޮސްޕިޓަލަށް އަވަސް ފަރުވާ ދިނުމަށް ގެންގޮސްފައެވެ.
ގޯވިންދާ އަންހެނުން ސުނީތާ އަހޫޖާއާ އެކު--ފޮޓޯ/އިންޑިއަންއެކްސްޕްރެސް
އެކްޓަރުގެ އާއިލާއާ ހަވާލާދީ ރިޕޯޓުތަކުން ބުނެފައިވަނީ އަވަސް ފަރުވާއަށް ފަހު، ކަކުލަށް އެރި ވަޒަން ނަގާފައިވާ ކަމަށާއި ގޯވިންދާގެ ހާލު މިހާރު ރަނގަޅު ކަމަށެވެ. އެހެންނަމަވެސް، ފަރުވާ ކުރިއަށްދާތީ ގޯވިންދާ ހޮސްޕިޓަލުން ގެއަށް ދޫކޮށްލާނެ ދުވަހެއް ކަށަވަރެއް ނުވެއެވެ.
ގޯވިންދާއަކީ ފިލްމީ ދާއިރާގައި ގިނަ ދުވަހު މަސައްކަތްކުރުމަށް ފަހު އިންޑިއާގެ މަޖިލިސް ކުރާ ގޭގެ މެންބަރުކަން ވެސް ކޮށްފައިވާ މީހެކެވެ.
އަމިއްލަ ހަށި ރައްކަލަށް ޚާއްސަ ހުއްދައެއްގެ ދަށުން ވަރަށް ގިނަ ފިލްމީ ތަރިން ހަތިޔާރު ގެންގުޅެއެވެ. އޭގެ ތެރޭގައި އިންޑިއާގެ އޭ-ލިސްޓު ވަރަށް ގިނަ އެކްޓަރުން ހިމެނެއެވެ. އޭގެ ތެރޭގައި، އަމީތާބް ބައްޗަން، ސަނީ ޑިއޯލް، ސަލްމާން ޚާން އަދި ބަތަލާ ޕޫނަމް ދިލޮން ހިމެނެއެވެ.