އަންނަ އަހަރު ބާއްވާ ޝަރަފުވެރި އޮސްކާ އެވޯޑަށް އިނގިރޭސިވިލާތުން ފޮނުވި ހިންދީ ފީޗާ ފިލްމު "ސަންތޯޝް" އަންނަ މަހު އިންޑިއާގައި ރިލީޒްކުރަން ނިންމައިފިއެވެ.
މި ފިލްމަކީ އިންޑިއާގެ ވަރަށް ގިނަ ފިލްމުތަކުންނާއި ވެބް ސީރީސްތަކުން ފެނިފައިވާ ބަތަލާ ޝަހާނާ ގޮސްވާމީ މުހިއްމު ރޯލް ކުޅެފައިވާ ފިލްމެކެވެ. އިނގިރޭސިވިލާތާއި އިންޑިއާއާއި ފްރާންސްގެ އިތުރުން ޖަރުމަނުގެ ފިލްމު ކުންފުނިތަކެއް ގުޅިގެން އުފެއްދި ކްރައިމް ޑްރާމާ "ސަންތޯޝް" އަކީ އިންޑިއާގެ ދަރިކޮޅުގެ ސަދިއާ ސޫރީ ލިޔެ ޑައިރެކްޓްކޮށްފައިވާ ފިލްމެކެވެ.
މިދިޔަ އަހަރުގެ ކާންސް ފެސްޓިވަލުގައި ވެސް ވަރަށް ގިނަ ބައެއްގެ ތަރުހީބު ލިބުނު މި ފިލްމަށް އިންޑިއާގެ އޯޑިއަންސްގެ ފަރާތުން ވެސް ހޫނު ތަރުހީބެއް ލިބޭނެ ކަމަށް އުއްމީދުކުރާ ކަމަށް ޑައިރެކްޓަރު ސަދިއާ ސޫރީ ވަނީ ބުނެފައެވެ.
ޝަހާނާ ފިލްމު "ސަންތޯޝް'ގެ މަންޒަރެއްގައި--ފޮޓޯ/ބޮލީވުޑްހަންގާމާ
އަންނަ މަހުގެ 10 ވަނަ ދުވަހު އިންޑިއާގައި ރިލީޒްކުރާ "ސަންތޯޝް"ގައި ޝަހާނާ ކުޅެފައި ވަނީ ޒިންމާދާރު ފުލުސް ކޮންސްޓަބްލްއެއްގެ ހުވަފަތްވެފައިވާ އަންހެނެއްގެ ރޯލެވެ. ފިރިމީހާ ހުވަފަތްވުމާ ގުޅިގެން އޭނާ އަދާކުރި ވަޒީފާ ޝަހާނާއަށް ލިބި ވަޒީފާގެ މާހައުލުގައި ދިމާވާ ވަރަށް ގިނަ ގޮންޖެހުންތައް މި ފިލްމުން ބެލުންތެރިންނަށް ފެންނާނެއެވެ.
އެގޮތުން އަންހެން ކުއްޖެއްގެ މަރުގެ ތަހުގީގު ހިންގުމުގެ ތެރޭގައި ފެންމަތިވާ ކޮރަޕްޝަންގެ މައްސަލަތަކާ އެކު އެ އާއިލާއަށް އިންސާފު ހޯދުމަށް ޝަހާނާ ކުރާ މަސައްކަތް ފިލްމުން ދައްކުވައިދޭނެއެވެ.
ޝަހާނާގެ އެންމެ ފަހުން ރިލީޒްވި ވެބް ސީރީސް އަކީ އޮސްޓްރޭލިއަން-އިންޑިއަން ރޮމޭންޓިކް ޑްރާމާ "ފޯ ޔިއާސް ލޭޓާ"އެވެ. ޝަހާނާގެ އެންމެ ފަހުގެ ފިލްމަކީ މި މަހުގެ 13 ވަނަ ދުވަހު ޒީ5ގައި ޕްރީމިއާކުރި ފިލްމު "ދެސްޕެޗް"އެވެ.